МэщбэшIэ Исхьакъ: «ТхакIом къызхэкIыгъэ лъэпкъым иуз зэхимышIэмэ, игушIуагъо димыIэтмэ ышIэрэм зыпари уасэ иIэп»
Зэрэдунаеу цIэрыIо щыхъугъэ тхакIом укъытегущыIэныр къин. Зы тхыгъэкIэ къыпфэгъэлъэгъощтэп, зы цIыф акъылми къыубытышъущтэп ащ иIофшIэгъэ лъэшхэмрэ игупшысэ куухэмрэ, ищыIэкIагъэмрэ непэ ыныбжькIи, изэшIокIкIи, изэчыйкIи зынэсыгъэ лъэгэпIэшхомрэ.
ЖъоныгъуакIэм и 28-м ыныбжь илъэс 90-рэ мэхъу УФ-м итхакIохэм я Союз итхьаматэ игуадзэу, Адыгеим итхакIохэм я Союз итхьаматэу, АР-м, КъБР-м, КъЩР-м янароднэ тхакIоу, УФ-м и Общественнэ палатэ хэтэу, Дунэе Адыгэ Хасэм инахьыжъхэм я Совет итхьаматэу, шIэныгъэхэмкIэ Дунэе Адыгэ Академием иакадемикэу, «Хэгъэгум ыпашъхьэ шIушIагъэу щыриIэхэм апае» зыфиIорэ урысые орденэу я 2-рэ, 3-рэ, 4-рэ шъуашэхэр зиIэу, медалэу «Адыгеим и Щытхъузехьэр», ащ нэмыкIыбэхэри зыфагъэшъошагъэу, Урысые Федерацием IофшIэнымкIэ и ЛIыхъужъэу МэщбэшIэ Исхьакъ Шумафэ ыкъор.
Ар Краснодар краим къыщыхъугъ, Адыгеим щэпсэу, Урысыем щызэлъашIэ, итхылъхэр хымэ къэралхэм ащызэбгырахы. МэщбэшIэ Исхьакъ изэчыйрэ изэшIокIрэ бэ къызэлъаубыты, чIыналъэм, лъэпкъым ягъэхъагъэхэр гурэ псэрэкIэ зэхыуагъашIэу лIыхъужъ орэдхэмрэ прозэ купкIашIохэмрэ къыIэкIэкIыгъэх. Ащ иIофшIагъэхэр лъэпкъыр зэрэппIун закIэх, итхыгъэ пэпчъ адыгэм итарихъ куу. Литературэр зигъашIэ хъугъэ МэщбэшIэ Исхьакъ бзэ зэфэшъхьафхэмкIэ зэджэхэрэ тхакIу, классик хьалэмэт.
КIэкIэу, купкI хэлъэу матхэ Исхьакъ. Къыпфэмылъытэнэу куу ащ адыгэ, урысые, дунэе литературэм иIахьэу ахэлъыр. СатыриплI хъурэ усэхэм ащегъэжьагъэу адыгэм итхыдэ куу къызщигъэлъэгъорэ романхэр зыдэт тхылъишъэм нэсэу къыдигъэкIыгъ. Къызщалъфыгъэ чIыгумрэ къызыхэкIыгъэ лъэпкъымрэ акъо шъыпкъэу къычIэкIыгъэ тхакIом итхыгъэхэм десэ къахэтэхы, блэкIыгъэр тынэгу къыкIэдгъэуцожьызэ къытфеIуатэ.
Исхьакъ ироманхэм зы лIэшIэгъоп къагъэлъагъорэр. Урыс-Кавказ заом фэгъэхьыгъэу тхылъитф къыдигъэкIыгъ, ахэм адыгэхэм гузэжъогъоу анэгу кIэкIыгъэр къахэщы.
Непэ Исхьакъ Адыгеим ищыIэныгъэ чанэу хэт, тхакIохэм я Союз итхьамат, адыгабзэкIэ къыдэкIырэ журналхэу «Зэкъошныгъэм», «Жъогъобыным», урысыбзэкIэ — «Литературнэ Адыгеим», «Родничок Адыгеи» зыфиIохэрэм яредактор шъхьаI.
УсэкIо цIэрыIом, зилъэпкъ фэшъыпкъэ тхэкIо иным укIэрысэу интервью къыIыпхыныр журналистымкIи цIыф къызэрыкIомкIи осэшхо зиIэ Iофыгъу. Ау дунаим щекIокIырэ узым иягъэкIэ Мыекъуапэ тымыкIошъоу, телефонкIэ имэфэ лъапIэу къэблагъэрэмкIэ тыдэгущыIагъ.
— Исхьакъ, уисабыигъом щегъэжьагъэу отхэ, тхылъ къыдэогъэкIы, сыд фэдэ Iофи, хъурэ-шIэрэм уафэхьазырэу щыт. УимэфэкI ехъулIэу адыгэ лъэпкъым, тхылъеджэхэм зы романыкIэ зэрапэбгъохыгъэм тыщыгъуаз. Ащ игугъу къытфэшIыба.
— Шъузэрэщыгъуазэу, сиIэдакъэ къычIэкIыгъэ роман 20-р зыфэгъэхьыгъэр адыгэм итарихъ, ащ иблэкIыгъ, къырыкIуагъэр ары. Джырэ романри ащ фэд — ар хьатхэм афэгъэхьыгъ. «Эхо далекой эры или двадцать вечеров среди хаттов» — арын фае цIэу фэсшIыщтыр. Iэпэрытхыр сыухыгъэ къодый, тапэкIэ тырадзэнэу ары. Мы романыр сэ сизыеплъыкI. Хьатхэм афэгъэхьыгъэу IофшIэгъабэ щыI. ИнджылызыбзэкIэ, нэмыцыбзэкIэ бэдэдэ къыдэкIыгъ. УрысыбзэкIэ къыдэкIыгъэхэм ащыщэу къыхэзгъэщыщт Абхъаз Республикэм и Президентыгъэу Владислав Ардзинбэ иIофшIагъэхэр.
ГущыIэм пае, Маккуин Джеймс и «Хетты и их современники в Малой Азии» зыфиIорэм къыщыгъэлъэгъуагъ пэсэрэ Азие ЦIыкIум (Анатолием) неолит лъэхъаным щегъэжьагъэу иIэгъэ тарихъри шэн-хабзэри. Нахьыбэу гулъытэ зыфишIырэр Хьат къэралыгъор зыщыIэгъэ лъэхъаныр ары.
— Уироман сыд фэдэ лъэхъаныр ара къыщыгъэлъэгъуагъэр?
— Тиэрэ ыпэкIэ псэугъэ тятэжъхэр къызытекIыгъэ хьатхэр ары сэ зигугъу сшIырэр. Хьат къэралыгъор тиэрэ ыпэкIэ я 12-рэ лIэшIэгъум, 1190-рэ илъэсым зэхэтэкъуагъ. Ар зэрытыгъэр джырэ Тырку къэралыгъор ары. Ау непи ахэм ялъэуж кIодыгъэп, археологхэм къагъотых ахэм янэпэеплъхэр.
Тыркуем икъэлэ шъхьаIэу Анкара километри 140-кIэ пэчыжьэу щыI къалэу Богуской. Непэ ащ археологие Iофхэр щырагъэкIокIых. Сэ сыщыIагъ а къалэм ыкIи романым ыуж сихьаным ыпэ бэ зэзгъэшIагъ.
— Ащ фэдиз зэманкIэ узэкIэIэбэжьэу, лъэпкъыр къызытекIыгъэ хьатхэм ягугъу зыошIым, ахэм япсэукIагъэ, язэхэтыкIагъэ сыдэущтэу къэбгъэлъэгъуагъа?
— УиупчIэ джэуап кIэкIэу къестыжьын хъумэ, дунаим анахь лъэпкъыжъ дэдэу тет адыгэм итхыдэ зы унагъом ищыIэкIагъэкIэ къэзгъэлъэгъуагъ пIоми хъущт. Зэкъошхэм ящыIэныгъэ, ядунэететыкIэ къызфэзгъэфеди, тиэрэ ыпэкIэ псэугъэ адыгэхэм сатетхыхьагъ. Ащ лъэхъэнэ пчъагъэ къызэлъеубыты.
— Сыдигъо теджэшъущта ыкIи шIэхэу къыдэкIыщта тхылъыр?
— Гужъощтэп. Гъэмафэм къыдэкIыщт романыр.
— Ныдэлъфыбзэм имэхьанэ къыгурыIоу дунаим зы цIыф тетмэ, о уятIонэрэ. УиIофшIагъэхэр адыгабзэкIэ отхых, етIанэ бзэ зэфэшъхьафкIэ къыдагъэкIых. Хьатхэм афэгъэхьыгъэри ныдэлъфыбзэкIэ птхыгъа?
— Щэч хэлъэп. Сэ ащ зыкIи сытекIыгъэп, занкIэу урысыбзэкIэ зэрязгъэдзэкIыгъ. Адыгабзэри урысыбзэри хьазыр, зэгъусэу къыдэкIыщтых.
— Джыри зы къэбарышIу игугъу къэсшIымэ сшIоигъу. Уироманэу «Аиссе» техыгъэу фильм зэрагъэуцущтым тыщыгъуаз. Сыдым нэсыгъа а Iофыр?
— ТызэрэзэгурыIуагъэу, кинокомпаниеу «Орел и ракурс» зыфиIорэр ащ ыуж ихьагъ. Урысыем щызэлъашIэрэ кинорежиссер цIэрыIоу Александр Муратовыр ары тезыхырэр, сценариер зытхыгъэр Марина Сафина. НепэкIэ кастингхэр рекIокIых, актерхэр къыхахы.
Джыдэдэм коронавирусым пае Iофыр тIэкIу къызэтырагъэуцуагъ. Фильмым продюсер шъхьаIэу иIэр типрезидентыгъэу Шъэумэн Хьазрэт, ащ доллар миллион къытитыгъ.
— ЗищыIэныгъэ Кавказым къыщежьэу, Тыркуем нэсэу, Францием щызыухырэ адыгэ бзылъфыгъ романыр зыфэгъэхьыгъэр. Айщэт ироль къэзышIыщтыр лъэшэу тшIогъэшIэгъон. Хъунэу щытмэ къытаIу ролыр зыфагъэшъошагъэр.
— КъБР-м щыщ Мамрэш Светлан, Москва дэт «Гогольцентр» зыфиIорэ театрэм щэлажьэ, Щепкинскэ училищыр, ыужкIэ МХАТ-р къыухыгъэх. Режиссерыр гурыIуагъ, ежьыри хьазыр.
— Тыда фильмыр зыщытырахыщтыр?
— АР-м, Санкт-Петербург, етIанэ Тыркуем, Францием съемкэхэр ащекIокIыщтых.
— Ар мы илъэсым хьазыр хъунэу огугъа?
— ТызэрэзэгурыIуагъэмкIэ, 2020-рэ илъэсым ишэкIогъу хьазырыщт. Ау пстэури зэлъытыгъэр зэрэдунаеу ищытыкI ары.
— Исхьакъ, уитхыгъэхэм къафэдгъэзэжьынышъ, адыгэ тхакIохэм ахэтэп о птхыгъэ романым фэдиз зытхыгъэ. Анахь гъэшIэгъоныр, а пстэури зыфэгъэхьыгъэр адыгэм итхыд. Лъэпкъым итхакIоу зы дунаим тетмэ, о уятIонэрэ.
— ТиблэкIыгъэ утемытхыхьанэу щытэп. Сэ къэзгъэлъэгъуагъэр я 10-рэ лIэшIэгъум къыщежьэ. ТхакIом къызыхэкIыгъэ лъэпкъым иуз зэхимышIэмэ, игушIуагъо димыIэтмэ, ышIэрэм зи уасэ иIэп. Адыгэ тхыдэр лIыгъэм, гуфэбагъэм, пытагъэм яшапхъ, ахэр десэ афэхъунэу къысщэхъу ситхылъеджэхэм. Плъапсэ икъежьапIэмрэ уиблэкIыгъэ къыхэпхырэ десэмрэ къыкIэлъыкIощтым игъогу зыгъэнэфырэр.
Тилъэпкъ гузэжъогъубэ ынэгу кIэкIыгъ. Адыгэм къыщышIыгъэмкIэ сэ зыгори згъэкъончэнэу арэп. Сызпылъыр документхэм къахэсхырэ шъыпкъагъэр художественнэ теплъэ иIэу апашъхьэ зэрислъхьэрэр къагурыIонэу ары.
Сыдэу щытми, мамырныгъэ тазыфагу илъэу тызэдэпсэун фае. Сыдырэ лъэпкъи ежьым ышъхьэ къырыкIогъэ хьазаб иI. Сэ сызыфаер зы — адыгэм итхыдэ ишъыпкъагъэрэ ишэн-хабзэрэ къыткIэхъухьэхэрэм ащымыгъупшэныр ары.
Тэ пстэуми тызэкъош — тыадыг. Сэ сикIасэп тилъэпкъэгъухэм «къэбэртаекIэ» е «щэрджэскIэ» сяджэнэу. ЗэкIэми тыадыгэшъ, шъхьадж фызэшIокIырэмкIэ тилъэпкъ зэрэдгъэлъэпIэщтым, ыпэкIэ зэрэлъыдгъэкIотэщтым ыуж титыщт.
— Исхьакъ, илъэситф ыпэкIэ сиинтервью къыщыпIогъагъ: «Илъэс 70-рэ хъугъэу литературэ губгъом ситышъ, зы сатыр сымытхэу зы мафи къыхэкIыгъэп». Ащ джыри илъэситф хэлъхьажьи, тыдэ къипхыра уитворчествэ тебгъэкIодэрэ уахътэр?
— Сэ тыкъэзыгъэхъугъэ Тхьэшхом сыфэраз тхэкIо зэчыир къызэрэсхилъхьагъэмкIэ. Сызэрэтхэшъурэм сыгу хегъахъо, ау литературэ IофшIэныр творческэ гурышIугъо къодыеп, ар гугъуехь. Хьаткъо Ахьмэд зэриIуагъэу, «узыфэе гущыIэр а такъикъым къэбгъотыныр гугъу — мастэкIэ псынэ птIыным фэд». Сэ анахьэу Iоф зысшIэшъурэр, творческэ къарыу зыщысиIэр пчэдыжьыпэр ары. Жьэу къэтэджрэм Тхьэр къыфэупсэу аIо. ЧIыопсыр къызыщыущрэ, мурад инхэр къызаугупшысырэ, гупшысэмрэ къарыумрэ зыщызэгъэуIугъэ уахът пчэдыжьыпэр. Тыгъуасэ къыпфэмыгъотыгъэ гущыIэхэр непэ ежь-ежьырэу тхылъыпIэм техьэх.
— Исхьакъ, уимэфэкI ехъулIэу зы романрэ зы фильмрэ тыны къытфэпшIыгъэх. Ау томыбэу зэхэт уитхылъхэм афэдэ мы илъэсым къыдэбгъэкIынэу уимурада?
— Щэч хэмылъэу тхыгъэ инхэм ягъусэу усэхэр стхынэу сикIас. Пстэуми анахьэу сатыриплI хъурэ усэхэр сыгу щышIэрэр къызэрисIотыкIышъух. Ащ фэдэ усэ цIыкIухэр зыдэт томитIу къыдэкIыщт. А зыфэпIуагъэм фэдэу, тхыгъэ хэхыгъэхэр зыдэт том 25-рэ сэгъэхьазыры. Тфым усэхэр итыщт, 20-м — тхыгъэхэр. Ахэри бэмышIэу къыдэкIыщтых.
— Тхьэм къыбдегъэхъу, Исхьакъ. КъэбарышIухэмкIэ укъыддэгощагъ, уигущыIэ Iушхэр зэхэтэбгъэхыгъ. Чанэу, нэшIо-гушIоу уимэфэкI укъекIолIагъ. Джа узтетым хэмыкIэу, узынчъагъэ пытэ уиIэу, уикъэлэмыпэ мыуцэкоу бэрэ тапэ Тхьэм урегъэт.
ДэгущыIагъэр НэкIэпыджэ Замир. Адыгэ Республикэм изаслуженнэ журналист. Къэбэртэе Адыгэ Хасэм итхьаматэ игуадз.