Хэгъэгум футболымкIэ иапшъэрэ куп щызэнэкъокъухэрэ командэхэм зэпыугъом ыуж ешIэгъухэр рагъэжьэжьыщтых.

Урысыем футболымкIэ и Союз пэшIорыгъэшъэу зэрэрихъухьа­гъэу мэкъуогъум и 21-м зичэзыу зэIукIэгъухэр командэхэм яIэщтых. Апэрэ чIыпIитIур къыдэзыхыхэрэр занкIэу Европэм и Кубок фэбэнэщтых. Ящэнэрэ чIыпIэр зыхьырэр пэшIорыгъэшъ ешIэгъухэм ахэлэжьэн фае. ТекIоныгъэр къащыдихмэ Европэм икомандэ анахь лъэшхэр зыщызэнэкъокъухэрэ купым хэхьащт.

Командэ пэпчъ 2019 — 2020-рэ илъэс ешIэгъум зэIукIэгъуи 8 къыфэнагъ. «Зенит» дышъэр къыдихыным пэблагъ. «Локомотив», «Краснодар», «Ростов», ЦСКА-р, нэмыкIхэри медальхэм афэбэнэщтых.

ЯтIонэрэ чIыпIэм щыIэ «Локомотивым» итренер шъхьаIэу илъэсыбэрэ Iоф зышIэгъэ цIэрыIоу Юрий Семиныр иIэнатIэ зэрэIуа­гъэкIыгъэр футболым хэшIыкI фызиIэхэм агъэшIагъо, «Локомотивым» ипащэхэм я Совет ащ фэдэ унашъо зэришIыгъэм дырагъаштэрэп.

Тренер шъхьаIэр зэрэзэбла­хъугъэм шIуагъэ къыхьыщтмэ ешIэгъухэм къагъэлъэгъощт.

Сербием щыщэу Марко Николич «Локомотивым» итренер шъхьаIэу агъэнэфагъ. Юрий Семиныр тренер гъэшIуагъэу клубым иIэнэу «Локомотивым» ипащэхэм гухэлъ яIагъ, ау Ю. Семиныр ащ фэдэ IэнатIэм Iухьанэу езэгъыгъэп.

Апшъэрэ купым ешIэгъухэр зэрэщыкIощтхэм Урысыем футболымкIэ и Федерацие щытегущыIэщтых. ЗэIукIэгъум зы командэм ешIэкIуи 5 щызэблихъун ылъэкIынэу зэхэщакIохэм унашъо зэрашIыгъэр Iофыгъо дэгъоу тэлъытэ.

Германием, Европэм инэмыкI хэгъэгухэм футбол ешIэгъухэр ащырагъэжьэжьыгъэх. Зэгъэпшэнхэр ашIыхэзэ, шIыкIэшIухэм алъыхъухэзэ, Урысыеми зэнэкъо­къур щылъагъэкIотэщт.

КъыкIэлъыкIощт илъэс ешIэ­гъум гъэпсыкIэу иIэщтыр зыфэдэщтыр тшIэгорэп. ЗэлъашIэрэ футбол ешIакIоу Андрей Аршавиным къызэриIуагъэу, зы илъэс ешIэгъур гъатхэм рагъажьэмэ, бжыхьэм аухызэ ашIыныр на­хьышIу. НэмыкI еплъыкIэхэр зи­Iэхэр щыIэхэшъ, тяжэщт унашъохэу аштэщтхэм.