РадиомкIэ къэтынхэр зыщызэхащэрэ «Щэрджэс-ФМ» зы­фиIоу Москва дэтым ипащэу Хьэсэе Тимур кIэщакIо зы­фэхъугъэ Iофтхьабзэм дунаим щеплъыгъэх.

Адыгэ Республикэм и Къэралыгъо орэдыIо-къэшъокIо ансамблэу «Ис­лъамыем» ихудожест­веннэ пащэу, Урысыем, Адыгеим янароднэ артистэу, композиторэу Нэхэе Ас­лъанрэ ткъош Къэ­бэртэе-Бэлъкъарым щапIугъэ Хьэ­сэе Тимуррэ зэзэгъыныгъэ зэдашIи, онлайн-­видео концертыр нэкIубгъом къыщагъэлъэгъуагъ.

Урысыем изаслуженнэ артисткэу, Адыгеим инароднэ артисткэу ХъокIо Сусанэ, Адыгеим инароднэ артистхэу Агъыржьэ­нэкъо Саныет, Къумыкъу Щамсудин, Мышъэ Ан­дзаур, Адыгеим изаслуженнэ артистхэу Тыгъужъ Асыет, Эльдарэ Айдэмыр, Шъымырзэ Казбек, артистхэу Нэгъой Азэ, Дзы­бэ Руслъан, компо­зиторэу Нэхэе Аслъан «Ислъамыем» пае зэригъэфэгъэ произведениехэр къаIуагъэх.

«Нарт рапсодиер», «Ныдэлъф мэкъа­мэхэр», «Сэр­мафэр», «Сиорэдыр», Айдэ­­мыркъан фэгъэхьыгъэ орэдыр, фэшъхьафхэри артистхэм агъэжъынчыгъэх.

Мышъэ Андзаур пщы­нэмкIэ къаде­жъыугъ, орэдхэри къадиIуагъ. Пщынэр ыгъэбзэрабзэзэ, лъэпкъ орэдышъохэр Урысыем имызакъоу дунаими щигъэ­Iугъэх.

Зэфэзэщыгъэх

— ЦIыфхэм тафэзэ­щыгъ, концертхэр къа­фэттын тымылъэкIэу уахътэр зыщыдгъэкIорэ лъэ­хъэнэ къиным Хьэсэе Тимур хэкIыпIэ къызэригъотыгъэм фэшI лъэшэу тыфэраз, — къытиIуагъ Адыгэ Республикэм инароднэ артистэу Къумыкъу Щамсудинэ. — Къэгъэ­лъэгъоным еплъыгъэхэу къытфэтхагъэхэм ягущыIэ фабэхэр къытлъыIэсыгъэх.

Урал щыпсэурэ бзылъфыгъэу «Ислъамыем» къыфэтхагъэр тиартистхэм къащытхъугъ.

Тыркуем, Иорданием, Израиль, Сирием ащы­псэухэрэ тилъэпкъэгъухэу «Ислъамыем» иконцерт еплъыгъэхэм композиторэу Нэхэе Аслъан, тиартистхэр ашIэх, фестивальхэм, зэкъошныгъэм ипчыхьэзэхахьэхэм ащызэIукIэхэу пчъа­гъэрэ къы­хэкIыгъ. Лъэпкъ искусст­вэр «Ислъамыем» лъагэу зэриIэты­гъэр яеплъыкIэ­хэм къащыхагъэщыгъ.

ТашIогъэшIэгъон

— Италием, Германием, Чехием, нэмыкI хэ­гъэгухэм къащытэплъы­гъэх, — тизэдэгущыIэгъу лъегъэкIуатэ Мышъэ Андзаур. — Израиль щыщхэу Нэпсэу Симэ, Натхъо Саусыр, Тыркуем щыпсэурэ Бгъуашэ Инхьам, нэмыкI тилъэпкъэ­гъухэу къытфэтхагъэхэм ташIогъэшIэ­гъон. Адыгэ орэдхэр, мэкъамэхэр дунаим зэрэщызэхахыгъэ- хэм егъэгушхох.

Москва, Санкт-Петербург, Шъачэ, Къэбэр­тэе-Бэлъкъарым, Къэрэщэе- Щэрджэсым, Адыгеим ащыпсэухэу къэгъэлъэ­гъо­ным еплъыгъэхэм ком­позиторэу Нэхэе Аслъан, тиартистхэм къэгъэлъэ­гъоным изэхэщакIохэм «тхьашъуе­гъэпсэу» къараIожьы. Псэ зыпыт концертхэм цIыфхэр афэзэщы­гъэхэу тиартистхэм къя­жэх. ЯкIэ­сэ орэдхэр зэхахы, лъэпкъ къашъохэр алъэгъу ашIоигъу.

«Ислъамыем» ихудо­жественнэ пащэу Нэхэе Аслъан тызэрэщигъэгъозагъэу, артистхэр яунэхэм арысхэу концертхэм зафагъэхьазыры. Анахьэу тызыгъэгушIуа­гъэхэм ащыщ лъэпкъ орэдыкIэхэр ансамблэм пае зэ­рагъэфэнхэу зэрэфежьагъэхэр. Быслъымэн диным фэгъэ­хьыгъэ орэдхэр «Ис­лъамыем» ты-ри­тхэщтых, концертхэм, лъэпкъ зэхахьэхэм ащызэхэтхыщтых.

ЕмтIылъ Нурбый.