«Мыекъуапэ инэфылъэхэр» гъашIэм щэнэфых
Дунаим щызэлъашIэрэ кIэлэцIыкIу къэшъокIо ансамблэу «Мыекъуапэ инэфылъэхэм» яхудожественнэ пащэу Нэныжъ Айдэмыр гущыIэгъу тызыфэхъум зэгъэпшэнхэр тшIыгъэх.
— «Мыекъуапэ инэфылъэхэр» зызэхащагъэр мыгъэ илъэс 30 мэхъу, — къеIуатэ Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр. — Ащ фэгъэхьыгъэ зэIукIэгъухэм зафэтэгъэхьазыры.
— Зэгъэпшэнхэм IофшIагъэу щыIэр къагъэлъагъо. Гъэхъагъэу шъуиIэхэм сыда къахэбгъэщырэр?
— «Лъэпкъ творчествэм изаслуженнэ коллектив» зыфиIорэ щытхъуцIэр Урысыем культурэмкIэ и Министерствэ бэмышIэу къытфиусыгъ. Хэгъэгу, дунэе фестивальхэм, республикэм щыкIорэ зэхахьэхэм гъэхъагъэхэр ащытшIыгъэх. Адыгэ къэралыгъо университетым, IофшIапIэу «МЕГА-Адыгеим», нэмыкIхэм яIофтхьабзэу 2020-рэ илъэсым тызыхэлэжьагъэхэм къаушыхьаты тикъэшъуакIохэм яIэпэIэсэныгъэ зэрэхагъахъорэр.
— Хэгъэгу зэошхом тидзэкIолIхэм ТекIоныгъэр къызыщыдахыгъэр илъэс 75-рэ зэрэхъугъэм ехьылIэгъэ Iофтхьабзэхэр бэ хъущтыгъэх.
— Мыекъуапэ культурэмкIэ и Унэу «Гигантым» Хэгъэгу зэошхом ТекIоныгъэр къыщыдэхыгъэным бзылъфыгъэхэр зэрэхэлэжьагъэхэм фэгъэхьыгъэ зэхахьэм, гъэтхапэм филармонием щыкIогъэ концертэу бзылъфыгъэхэм яхьылIагъэм, фэшъхьафхэм «Мыекъуапэ инэфылъэхэр» ащыуджыгъэх. Тарихъымрэ искусствэмрэ зэрэзэпхыгъэхэр зэIукIэгъухэм къащыхэдгъэщыгъэх. КIэлэцIыкIухэм, ныбжьыкIэхэм пIуныгъэ дэгъу ятыгъэнымкIэ ащ фэдэ зэхахьэхэр ящыкIагъэх.
— КъэшъуакIохэр яунэхэм арысхэу Iоф адашъушIэзэ, анахьэу къыжъудэхъурэр къытаIоба.
— Коронавирусым къиныгъохэр къытфихьыгъэх. Къашъо пэпчъ псэ зыпыт лъэбэкъу щыпшIын фае. ТелефонкIэ тызэфытеозэ, къашъом гупшысэу хэлъыр, шIыкIэу къыфэдгъотырэр къызэфэтэIуатэ. ТызэгурыIон зэрэтлъэкIырэм тиIофшIэн нахьышIоу лъегъэкIуатэ. ТикIэлэеджакIохэм гуетыныгъэу ахэлъыри къыхэсэгъэщы. «Шъхьахынэхэр тигъогогъухэп» зэраIожьэу къыхэкIы.
— Ансамблэм икъашъохэр оры зыгъэуцухэрэр. Сыда кIэу узылъыхъурэр?
— Лъэпкъ шIэжьым, адыгэ шъуашэм, фэшъхьафхэм яхьылIагъэхэм сягупшысэ.
— КъэшъуакIохэм къадежъыурэ оркестрэ шъуиI.
— Блэгъожъ Юныс, Цэй Аслъан, Шэуджэн Адам, нэмыкIхэм орэдышъор агъэжъынчы.
ЗэхэщакIор дэгъумэ
— Адыгэ быракъым и Мафэ къэшъуакIохэм гъэшIэгъонэу агъэмэфэкIыгъ.
— Тикъашъохэм адыгэ быракъыр ащытэгъэбыбатэ. Ащ мэхьанэу иIэр къыдалъыти, зэхэщэкIо дэгъухэр Iофым кIэщакIо фэхъугъэх. Театрализованнэ едзыгъохэр «Мыекъуапэ инэфылъэхэм ясайт къыщагъэлъэгъуагъэх.
— Нахь игъэкIотыгъэу къытфэпIуатэ тшIоигъу.
— ТикIэлэеджакIохэр зэдэгущыIэжьыхи, къашъоу агъэуцугъэр ансамблэм инэкIубгъо къыщагъэлъэгъуагъ. Теунэ Амин, Шипкова Лучанэ, Шипкова Динарэ, ТхьакIумэщэ Лаурэ, фэшъхьафхэм сурэтэу ашIыгъэм адыгэ быракъыр къыщагъэлъэгъуагъ. Жъогъо 12-р дахэу хадыкIыгъ. Быракъыр унэм къыщырахьакIыгъ, агъэбыбэтагъ, лъэпкъ къашъор къашIыгъ.
— ШIэжь яIэу кIэлэеджакIохэр шъогъасэх. Хэта IэпыIэгъу къышъуфэхъухэрэр?
— КIэлэегъаджэхэр, ны-тыхэр, лъэпкъ шIэжьым ыгъэгумэкIыхэрэр сыдигъуи тигъусэх. «Бессмертный полкым» ехьылIэгъэ Iофыгъохэри тинэкIубгъо къыщыдгъэлъэгъуагъэх.
— КIэлэеджакIохэм яIахьылхэу Хэгъэгу зэошхом хэлэжьагъэхэм сыда къараIолIагъэр?
— Ятэтэжъ пIашъэхэм ясурэтхэр аIыгъхэу ансамблэм инэкIубгъо щытлъэгъугъэх. ЛIыгъэу зэрахьагъэм рэгушхох. ЯIахьылхэм афэгъэхьыгъэ къашъохэр, усэу къызэджагъэхэр, къаIогъэ орэдхэр гум къегущыIыкIых. Ащ фэдэ ныбжьыкIэхэм сыд фэдэ IофкIи цыхьэ афэпшIы хъущтэу сэлъытэ.
Къашъохэр
— Къашъоу къэшъушIыхэрэр жъы хъухэрэп.
— Лъэпкъ шIэжьым, искусствэм ахэр епхыгъэх. Адыгэ къашъохэу «Уджыр», «ЗэфэкIо псынкIэр», «Пшъэшъэ къашъор», нэмыкIхэри цIыфхэм ашIогъэшIэгъоных, концертхэм къащыдгъэлъэгъонхэу къытэлъэIух.
— «Си Адыгеим» укъытегущыIэщтба?
— Ар къэшъо зэхэт къэшIыгъу. «Зыгъэлъатэр», «ХьакIулащэр», «Абхъаз къашъор», трюкхэр, фэшъхьафхэри хэтых.
— ЯпчъагъэкIэ ахэр бэ мэхъух. Ансамблэу «Казачатэмрэ» «Мыекъуапэ инэфылъэхэмрэ» зэгъусэхэу къашъоу къызэдашIырэр сэ сшIодах. «Казачатэм» хэтхэр адыгэ къашъом хелъасэх, «Мыекъуапэ инэфылъэхэм» урыс къашъор къашIы… Искусствэм ыбзэ зэрэбаир, лъэпкъхэр къашъом зэрэзэфищэхэрэр тэри тигуапэ.
Щагъэсагъэхэр
— Илъэс 30 хъурэ ансамблэм щагъэсагъэхэм гъэзетеджэхэри къакIэупчIэх.
— ЗэкIэри артист зэрэмыхъущтыр тшIэзэ, кIэлэеджакIохэр ансамблэм щытэгъасэх. Искусствэм гукIэ нахь пэблагъэ тэшIых, адыгэ къашъохэр, лъэпкъ шэн-хабзэхэр ятэгъашIэх. ЦIэрыIо, цIыфышIу хъугъэхэм тарэгушхо.
— Быщтэкъо Азэмат, Апэнэс Астемир…
— Ахэр зэлъашIэрэ орэдыIох. Быщтэкъо Азэмат илъэси 10-м нахьыбэрэ тиансамблэ къыщышъуагъ. Апэнэс Астемир ицIыкIугъом къыщегъэжьагъэу тиконцертхэм ахэлэжьагъ, непи ныбджэгъуныгъэ дытиI.
— «Налмэсым» хэтхэм ацIэ къепIуагъэп.
— «Мыекъуапэ инэфылъэхэм» лъапсэу щашIыгъэр «Налмэсым» щызыгъэпытэхэрэр бэ мэхъух. Едыдж Гушъау, Алыбэрд Му- рат, Симболэт Сусан, Дыбэгъо Адам, Долэ Миланэ, фэшъхьафхэу лъэпкъ искусствэр зыIэтыхэрэм зэпхыныгъэ адытиI.
— Тиансамблэ зыщызыгъэсагъэхэу Адыгэ Республикэм искусствэхэмкIэ иколледж щеджэхэрэр, фэшъхьаф еджапIэхэр къыхэзыхыгъэхэр къытIокIэх, якъэбархэр къытфаIуатэх.
Зэкъошныгъэм игъогухэр
— Тыркуем ис тилъэпкъэгъухэм адэжь илъэс къэс шъокIо, ежьхэри къешъогъэблагъэх.
— ШэнышIу тфэхъугъэу тызэлъэкIо. Адыгэ къуаджэу Сэуджакъ дэгъоу тыщашIэ. Чылэм ипащэхэр, унагъохэр къызэрэтпэгъокIыхэрэр мэфэкI шъыпкъэм фэтэгъадэ. Пчыхьэм машIоу тшIырэм ыпашъхьэ тыщысэу къэбархэр къызэфэтэIуатэх, адыгэ джэгум тыкъыщэшъо.
— Адыгабзэм изэгъэшIэн, игъэфедэн лъыжъугъэкIотэнымкIэ ащ фэдэ зэхахьэхэм шIуагъэу къахьырэм къытегущыIэба.
— Ащ хэтхэр дахэу къызэрэшъохэрэм фэдэу адыгабзэкIэ гущыIэхэуи дгъасэхэ тшIоигъу. Ны-тыхэм, кIэлэегъаджэхэм ащ ехьылIагъэу тапэкIи Iоф адэтшIэщт. Тыркуем тызыкIокIэ адыгабзэкIэ къыхаутыгъэхэ тхылъхэр, журналхэр, гъэзетхэр, дискхэм атетхэгъэ адыгэ орэдхэр, къашъохэр афэтэхьых.
— ЗэлъыIэсыкIэ амалхэр жъугъэпытэщтхэу тэгугъэ.
— Мыгъэ Тыркуем тыкIон тлъэкIыщтми тшIэрэп, арэу щытми, гъогу тытехьанэу зытэгъэхьазыры.
— «Налмэсым» и Унэ къэшъуакIохэр щагъасэх. Iоф зыдашIэжьынымкIэ амалышIухэр яIэхэу тэлъытэ.
— Куп-купэу гощыгъэхэу еджэкIуи 150-рэ тэгъасэ. Концертхэм зафагъэхьазырыным фэшI пэрыохъу яIэп.
— Мыекъопэ администрацием культурэмкIэ и ГъэIорышIапIэ ипащэу Цэй Розэ къызэрэшъущытхъугъэр гуапэ тщыхъугъ.
— Урысыем культурэмкIэ и Министерствэ щытхъуцIэ къызэрэтфиусыгъэм тигъэгушIуагъ. Къалэм иадминистрацие культурэмкIэ и ГъэIорышIапIэ тепхыгъэу Iоф тэшIэ. Цэй Розэ къызэрэтиIуагъэу, лъэпкъ ис-кусствэм зедгъэушъомбгъузэ, мурадэу тшIыгъэхэм тахэплъэжьмэ, тапэкIэ тызэрэлъыкIотэщт шIыкIэм нахь куоу тегупшысэщт.
— «Мыекъуапэ инэфылъэхэр» илъэс 30 зэрэхъухэрэр сыдигъуа зыхэжъугъэунэфыкIыщтыр?
— Джыри дгъэнэфагъэгоп мафэр. Тыфай гум шIукIэ къинэжьыщт пчыхьэзэхахьэр игъэкIотыгъэу зэхэтщэнэу. Быщтэкъо Азэмат, Апэнэс Астемир, «Налмэсым» икъэшъуакIохэр, нэмыкIхэри къедгъэблэгъэщтых.
— ШъуигухэлъышIухэр Тхьэм къыжъудегъэхъух.
— Тхьауегъэпсэу.
ЕмтIылъ Нурбый.