Илъэс къэс зэхащэрэ Урысые Iофтхьабзэу «Библионочь 2020» зыфиIорэм икIэуххэр зэфахьысыжьыгъэх. Хэгъэгу зэошхом ТекIо­ныгъэр къызщыдахыгъэр мыгъэ илъэс 75-рэ зэрэхъурэм епхыгъэ онлайн-­марафонэу «Те­кIоныгъэм и ШIэжь» зыфиIорэм Iофтхьабзэр фагъэхьыгъ.

АР-м культурэмкIэ и Ми­ни­стерствэ къызэрэщаIуагъэмкIэ, Iофтхьабзэм Адыгеим итхылъеджэпIи 144-рэ хэлэжьагъ. Зэ­кIэмкIи тхыгъэ 2 022-рэ къы­рагъэхьагъ.

Iофтхьабзэр 2020-рэ илъэсым мэлылъфэгъум и 25-м рагъэ­жьагъ. А уахътэм къыщыублагъэу культурэм ицифрэ ресурс кIэтхагъэхэм япчъагъэ фэди 2 — 3-кIэ нахьыбэ хъугъэ — ахэр нэбгырэ 23 987-рэ мэхъух, зэкIэмкIи кIэтхагъэхэр нэбгырэ 55 342-рэ. Акциер зыра­гъэжьагъэм къыщегъэжьагъэу культурэм ицифрэ ресурс зыщызгъэгъозагъэхэм япчъагъэ нэбгырэ 157 308-рэ къыхэхъуагъ ыкIи мы уахътэм ехъу­лIэу къыхаутыгъэ тхыгъэ 2022-мэ нэбгырэ 207 386-рэ яплъыгъэх.

— Iофтхьабзэм лъэпкъ зэщымыщхэр, ныбжь, сэнэхьат ыкIи еплъыкIэ зэфэшъхьаф зи­Iэхэр зэхищагъэх. Акцием хэлэжьагъэхэм Хэгъэгу зэошхом хэкIодэгъэ лIыхъужъхэм яшIэжь агъэлъэпIагъ, псаоу къэнэгъэ ветеранхэм шъхьащэ афашIыгъ, агъэлъэпIагъэх, — къеты АР-м культурэмкIэ и Министерствэ.

КIарэ Фатим.