Адыгэ Республикэм и Камернэ музыкальнэ театрэу Хьанэхъу Адамэ ыцIэ зыхьырэр Уры­сыем иапэрэ зэIухыгъэ театральнэ онлайн-марафон хэлэжьагъ.

Советскэ народымрэ ащ и УIэшыгъэ КIуачIэхэмрэ фашист техакIохэр зэхакъутэхи, Хэгъэгу зэошхом ТекIоныгъэр къызы­щыдахыгъэр илъэс 75-рэ зэрэ­хъугъэм Iофтхьабзэр фэгъэхьыгъагъ.

Ульяновскэ хэкум и Димит­ровградскэ театрэу А. Островскэм ыцIэ зыхьырэр кIэщакIо зыфэхъугъэ марафоным Урысыем итеатрэхэр хэлэжьагъэх. Къыблэ-Сахалинскэ, Воронеж, Мурманскэ, нэмыкIхэм ятеат­рэхэм якъэгъэлъэгъонхэр гъэ­шIэгъоныгъэх.

МэфитIо кIогъэ зэнэкъокъум хагъэунэфыкIырэ чIыпIэхэр къыщыдэзыхыщтхэр къэшIэгъуаеу щытыгъ. ИнтернетымкIэ къэгъэлъэгъонхэм яплъыгъэхэр арых театрэхэм уасэ афэзышIыгъэхэр.

Адыгэ Республикэм и Урыс театрэу А. Пушкиным ыцIэ зы­хьырэр зэнэкъокъум хэлэжьагъ, Щытхъу тхылъ къыфагъэшъошагъ.

Республикэм и Камернэ музыкальнэ театрэу А. Хьанэхъум ыцIэ зыхьырэм Галина Лодянавам ытхыгъэм техыгъэу режиссерэу Алена Власовам ыгъэуцугъэ къэгъэлъэгъонэу «Джэрпэ­джэжьыр» спектаклэ анахь дэгъоу онлайн-марафоным къы­щыхахыгъ.

Хэгъэгу зэошхом лIыхъужъныгъэ щызэрахьэзэ, ТекIоныгъэм и Мафэ къэзыгъэблэгъагъэхэ бзылъфыгъэхэм «Джэрпэджэ­жьыр» афэгъэхьыгъ. Апсэ емыблэжьхэу пыйхэм язэуагъэх. Заом имашIо бзылъфыгъэ тхьа­пша хэстыхьагъэр? ШIулъэгъу къабзэу гукIэ къырахьакIырэр гъатхэм икъэгъагъ Iэрам фа­гъадэзэ, щыIэныгъэр агъэлъа­пIэщтыгъ. Унагъо ихьанхэу, сабыйхэр апIунхэу гухэлъхэр яIа­гъэх. Ары шъхьае, пыйхэр яхэгъэгу заокIэ къибэнагъэх, лъыр щагъачъэ.

Бзылъфыгъэхэр пыйхэм зэрапэуцугъэхэр, ячIыгу къызэрау­хъумэрэр, ТекIоныгъэм зэрэфэзаохэрэр артистхэм едзыгъохэм къащагъэлъагъох.

«Джэрпэджэжьым» инэпсхэр

Адыгэ Республикэм изаслуженнэ артистхэу Ирина Кириченкэм, Елена Лепиховам, Надежда Максимовам, Владислав Верещако ярольхэр узыIэпащэу къашIых. Заом имашIо гукIэ ухащэзэ, зэгъэпшэнхэр нэгум къыкIэуцох. Бзылъфыгъэр заом имашIо зэрэпхырыкIырэм ухе­гъэщэтыкIы.

Илъэси 4 хъугъэу «Джэрпэ­джэжьыр» Камернэ музыкальнэ театрэм къыщагъэлъагъо. Залым чIыпIэ нэкI зэримыIэжьым дакIоу, къэгъэлъэгъоным зы нэбгыри рэхьатэу зэремыплъырэр гукIэ къыхэтэгъэщы. Нэпсыр къызэхыхэрэм ягумэкI къыдгурэIо.

Артистхэу Кобл Зурыет, Исуп Мурат, Хьамырзэкъо Джумалдин, нэмыкIхэу рольхэр къэзы­шIыхэрэм ягупшысэ къыщыха­гъэщырэр къэгъэлъэгъоныр щыIэ­ныгъэм къызэрэхахыгъэр ары.

Грузием изаслуженнэ арти­стэу, Адыгеим инароднэ артистэу Исуп Аслъан къашъохэр ыгъэуцугъэх. Хэгъэгу зэошхом илъэ­хъан укъыпкъырыкIмэ, къашъом ыбзэ гурыIогъошIоу зэрэщытыр непэрэ щыIакIэм еогъапшэ. Ары, къашъомкIэ шIулъэгъур, гум ихъы­кIырэр къэпIотэнхэ олъэкIы.

Пьесэр зытхыгъэмрэ режиссерымрэ язэгурыIоныгъэ къэгъэ­лъэгъоныр къыгъэбаигъ. Шъыпкъагъэ хэлъэу тарихъым щыщ хъугъэ-шIагъэхэм псэ къапагъэ­кIэжьыгъ.

«ТекIоныгъэм игъогухэр»

Марафоным ащ фэдэ цIэ зэ­рэфаусыгъэм зыкъигъэшъып­къэ­жьыгъ. Хэгъэгу зэошхом Те­кIо­ныгъэр къызыщыдахыгъэр илъэс 75-рэ зэрэхъугъэр игъэкIотыгъэу хэдгъэунэфыкIын тлъэ­кIыгъэгоп. Мэфэ 1418-рэ кIогъэ Хэгъэгу зэошхом игъогухэр гъа­шIэм зэрэхэмыкIокIэщтхэр къэгъэлъэгъонхэм къаIотагъ.

ГушIуагъор

Марафоным нэбгырэ мин пчъагъэ еплъыгъ. Къэгъэлъэгъон­хэм уасэ афэзышIыгъэхэм, ама­къэхэр Камернэ музыкальнэ театрэу А. Хьанэхъум ыцIэ зы­хьырэм фэзытыгъэхэм ащыщхэм гъэзетеджэхэр тигуапэу ащытэгъэгъуазэх.

Медицинэм иIофышIэу Борсэ Мыхьамэт, республикэм общественнэ движениеу «Адыгэ Ха­сэм» итхьаматэу ЛIымыщэкъо Рэмэзан, Санкт-Петербург щы­псэоу, Адыгэ Республикэм изаслуженнэ артисткэу КIыкI Софэ, Испанием Iоф щызышIэу, Адыгеим искусствэхэмкIэ изаслуженнэ IофышIэшхоу, композиторэу Хъупэ Мурат, Адыгэ Республикэм инароднэ артисткэу Нэхэе Тэмар, Теуцожь районым икъулыкъушIэу Тыгъужъ Теуцожь, культурэм иIофышIэу Къэзэнэ МулиIэт, Камернэ музыкальнэ театрэм икъэгъэлъэгъонхэм бэрэ яплъыхэрэ Ольга Перегудовар, Ольга Серебрянскаяр, Къэ­рэщэе-Щэрджэсым щыпсэурэ Хьатикъое Мурат, Къэбэртэе-­Бэлъкъарым щыщэу ПакIэ Рамет, нэмыкIхэм амакъэхэр Камернэ музыкальнэ театрэм фатыгъэх, фэгушIуагъэх.

— «Музыкальнэ спектаклэ анахь дэгъу» зыфиIорэ щытхъуцIэр хэгъэгу зэнэкъокъум къызэрэщытфагъэшъошагъэр лъэшэу тигуапэ, тиIофшIагъэ уасэ фэзышIыгъэхэм гъэзетымкIи «тхьашъуегъэпсэу» ясIожьы сшIои­гъу, — къытиIуагъ АР-м и Камернэ музыкальнэ театрэ ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейманов Юныс. — Культу­рэмкIэ министерствэм, зэкIэ къыт­фэгумэкIыгъэхэм «тхьа­шъуегъэпсэу» ясIожьы сшIоигъу.

Тигъэзетеджэхэм ацIэкIэ Камернэ музыкальнэ театрэу ­Адыгэ Республикэм ищытхъу искусствэм лъагэу щызыIэтыгъэм тыфэгушIо, игъэхъагъэхэр фэбэгъонхэу Тхьэм тыфелъэIу. Камернэ музыкальнэ театрэу Хьанэхъу Адамэ ыцIэ зыхьырэр орэпсэу!

ЕмтIылъ Нурбый.