Мыекъопэ футбол клубэу «Зэкъошныгъэм» итренер шъхьаIэу, Адыгэ Республикэм изаслуженнэ тренерэу Ешыгоо Сэфэрбый гъэзетеджэхэм яупчIэхэм афэгъэхьыгъэу гущыIэгъу тыфэхъугъ.

— Спортыр зышIогъэшIэгъонхэр зэрэщыгъуазэхэу 2019 – 2020-рэ илъэс зэнэкъокъур зэпыдгъэугъ. ЗэIукIэгъухэр стадионхэм ащыкIохэрэп. Арэу щытми, ешIакIохэм яIэпэIэсэныгъэ хагъэ­хъоным фэшI Iоф зыдашIэжьы, бэрэ тызэжэгъэ зэнэкъокъум зыфагъэхьазыры.

— Тренерхэмрэ ешIакIохэмрэ шъузэпэчыжьэми, зэлъыIэсыкIэ амалэу жъугъэфедэрэм тыщыгъэгъуазэба?

— ТызэIукIэрэп. Телефоныр, Интернетыр тэгъэфедэх. Нэбгырэ пэпчъ кIуачIэр, IэпэIэсэны­гъэр епсыхьэ.

— Сэфэрбый, джырэблагъэ гурыт еджапIэхэм якIэлэегъа­джэхэм ягумэкIыгъохэр къысфаIотагъэх.

— Сыда къызыкIэупчIагъэхэр?

— КIэлэеджакIор умылъэ­гъоу, къыомыдэIоу къыпщыхъу­зэ, сыдэущтэу гъэцэкIэн Iофыгъор къыфэпIотэщта?

— УпчIэ дэгъу. ХэушъхьафыкIыгъэу ащ сыкъытегущыIэ сшIоигъу.

— Щысэ къэпхьыщта?

— КIэлэегъаджэхэм ягумэкIыгъохэр къызгурэIох. КIэлэеджа­кIоу шIэныгъэм зыщызыдзыерэм «ор-орэу зымыгъэпцIэжь» сэ есIощт. Цыхьэ зэфэпшIыжьыныр Iофым ищыкIагъэу сэлъытэ. «Зэкъошныгъэм» къысэмыдэIурэ ешIакIо хэтэп. Командэм лъэкIэу иIэм телъытагъэу пшъэрылъхэр зыфэтшIыжьыгъэх.

— Шъуимурадхэр жъугъэцэкIэнхэм шъуафэхьазыра?

— Апэрэ чIыпIитфыр къыдэзыхыщтхэм «Зэкъошныгъэр» ахэфэным тыпылъ.

— ТиупчIэ къыфэзгъэзэжьы сшIоигъу. ЕшIакIо пэпчъ зызэригъэхьазырырэм улъыплъэн, ущыгъозэн олъэкIа?

— Гуетыныгъэ ахэлъэу зэIукIэгъухэм зафагъэхьазырыныр ешIакIохэм шэнышIу афэхъугъ. Яунэхэм арысхэу Iоф зыдашIэ­жьы, телефонкIэ упчIэхэр къысатых. КIуачIэм, IэпэIэсэныгъэм ахэмыгъахъоу зэнэкъокъум дэгъоу ухэлэжьэн зэрэмылъэкIыщтыр хэти къыгурыIон фае.

ЕшIакIохэм якъыхэхын

— Сэфэрбый, Адыгэ Респуб­ликэм щапIугъэ кIалэхэу «Зэ­къош­ныгъэм» хэтхэм япчъа­гъэ нахьыбэ шъушIыщтэу къытэпIуагъ.

— Типшъэрылъ шъхьаIэхэм ар ащыщ.

— ЕгъэжьапIэу шъуиIэхэр къытаIохэба?

— Делэкъо Мурат, Шъхьэлэхъо Амир, Такълый Руслъан, ХъуакIо Темыр, Гъыщ ТIахьир, Хьасаныкъо Амир «Зэкъошныгъэм» тштагъэх. Футболым хэгъозагъэ­хэм акIырыплъыхэзэ, шIыкIэшIу­хэр къагъотынхэм пылъых. ЗыцIэ къесIуагъэхэм тагъэгугъэ, «Зэ­къош­ныгъэм» иешIакIэ нахь дахэ хъуным яIахь халъхьан алъэкIыщтэу сэлъытэ.

— Мыекъуапэ имызакъоу, республикэм ирайон гупчэхэм, къуаджэхэм, Адыгэкъалэ спорт псэолъэ зэтегъэпсыхьагъэхэр къащызэIуахыгъэх.

— КъапIомэ пшIоигъор къызгурэIо. Адыгэ Республикэм и ЛIышъхьэу КъумпIыл Мурат, республикэм и Къэралыгъо упчIэжьэгъоу ТхьакIущынэ Ас­лъан, Правительствэм тафэраз. Спорт псэуалъэу тиIэхэм япчъа­гъэ хэпшIыкIэу нахьыбэ хъугъэ. Къоджэ спортыр къэIэтыгъэнымкIэ ар амалышIоу щыт.

— Тренер кIэлэегъаджэхэу ныбжьыкIэхэр зыгъасэхэрэм зэпхыныгъэу адэшъушIыгъэм зэхъокIыныгъэхэр ищыкIагъэха?

— ИщыкIагъэх. Теубытагъэ хэлъэу ар къэсэIо. Спорт псэуа­лъэм кIэлэцIыкIухэмрэ ныбжьыкIэхэмрэ къызэрепщэлIэщтхэм, ахэр уахътэм диштэу зэрэбгъэсэщтхэм шIэныгъэ хэхыгъэ ищыкIагъ. Культурэм, физкультурэм, спортым яшIуагъэкIэ наркоманием, шъон пытэхэм тапэуцужьы. Клубэу «Шъо Iэгуаом», Адыгэ Республикэм язэнэкъокъухэм мэхьэнэ ин ятэты. Ахэр арых «Зэкъошныгъэм» тштэщтхэр къы­зыхэтхыщтхэр. Футболым гукIэ фэщэгъэ тренер-кIэлэегъа­джэхэм нахь тащэгугъы.

Тызыгъэгъуазэрэр

— КIэу къаугупшысыщтым темыжэу, IофшIэкIэшIоу тиIэ хъугъэм къыщедгъажьэмэ дэгъуба? Кобл Якъубэ игъогу тырыкIомэ…

— СССР-м изаслуженнэ тренерэу Кобл Якъубэ самбэмкIэ, дзюдомкIэ спорт еджапIэр Мые­къуапэ къыщызэIу­хыгъэным кIэщакIо зыфэхъум, ащ къы­щыуцугъэп. ЕджапIэм икъута­мэхэр районхэм ащызэхащагъэх. Адыгеим испорт дунаим щашIэнымкIэ ар лъэбэ­къушIоу щытыгъ.

— Футболри ащ фэдэ гъогу тетщэн тлъэкIыщтэу сэ­лъытэ.

— Къыбдесэ­гъаштэ, ау къуа­джэр спортышхом фэпщэным фэшI уахъти, зэхэщэн Iофыгъохэри тищыкIагъэх.

— ШIэныгъэлэжь цIэрыIоу, адыгэгу зиIэ Шъхьэлэхъо Абу Адыгэ Хасэм изэхахьэхэм ащыщ къыщиIогъагъ: «Хэта къуаджэм къыдэмыкIыгъэу тизэIукIэ хэлажьэрэр?»

— Шъхьэлэхъо Абу купкIым лъыIэсызэ гущыIэщтыгъэ, цIыфхэр ыгъэгъуазэщтыгъ. Ти­къуаджэхэм тхэкIо, шIэныгъэлэжь, артист цIэрыIохэр, Iоф­шIэнымрэ спортымрэ ялIы­хъужъхэр къадэкIы­гъэх.

— ТицIыф цIэрыIохэм тагъэгъуазэ, щысэ атетэхы. НыбжьыкIэхэм шъушIагъэр алъыдгъэIэ­сыным фэшI спорт классхэр, нэмыкI еджапIэхэр зэхэшъущэнхэр шъуиамал къыхьыщта?

— Адыгэ республикэ гимназием футболымкIэ спорт класс къыщызэIутхынэу еджапIэм ипащэхэм зэзэгъыныгъэ адэтшIыгъ. Къуаджэхэм адэс кIэлэеджакIохэу сэнаущыгъэ зыхэлъхэу футбол ешIэ зышIоигъохэр тинэплъэгъу итыхэу дгъэсэщтых.

— Тигъэзетеджэхэм яупчIэ­хэмкIэ зэдэгущыIэгъур тыухы сшIоигъу.

— Дэгъу.

— 2019 — 2020-рэ илъэс ешIэгъур зырагъэжьэщтым къыкIэупчIэх Шъыжъы Хьамедэ, Трахъо Вячеслав, ЕмтIылъ Рус­там, Бэрэтэрэ Аслъан, нэмыкI­хэри.

— Тэри ащ тегъэгумэкIы. Жъо­ныгъуакIэм и 15-м Урысыем футболымкIэ и Союз игъэцэкIэкIо куп изэхэсыгъо унашъоу щаштэщтым тежэ. Стадионым ешIэкIэ дахэ къыщыдгъэлъагъо, спортыр зышIогъэшIэгъонхэр дгъэгушIохэ тшIоигъу.

— Шъуигухэлъхэр къыжъудэхъунхэу шъуфэтэIо.

— Тхьашъуегъэпсэу.

Сурэтым итыр: Ешыгоо Сэфэрбый.