Пэнэшъу Уцужьыкъо ыныбжь илъэс 75-рэ хъугъэ
Чыжьэрыплъэ кIэлэегъадж, шIэныгъэлэжь
ЩыIэныгъэм цIыф зэфэшъхьафхэр тигъашIэ къыхещэх, лъэуж зэфэмыдэхэр къыхарегъахьэх. Зыр — блэгъэныгъэ-IахьылыгъэкIэ тпэблагъэ мэхъу, адрэм ныбджэгъуныгъэр дэтэгъашIо, е IофшIэным зэгъогогъу тешIы.
Пэнэшъу Уцужьыкъо иIофшIакIэкIэ, игъэхъагъэхэмкIэ къылэжьыгъэ цIэ лъапIэхэр иIэх: «Отличник народного образования», «Заслуженный деятель науки Республики Адыгея», «Заслуженный работник высшей школы РФ», Адыгэ Республикэм и Къэралыгъо тын наукэмкIэ илауреат.
КIэлэегъаджэм ифэмэ-бжьымэ зытемыт, зигъашIэ щыщ мыхъугъэ щыIэп сIомэ сыхэмыукъонэу сэгугъэ. НэмыкIхэм афэмыдэу ахэм тигъашIи, тищыIэныгъи, тидунэететыкIи бэкIэ япхыгъэхэу мэхъу.
КIэлэегъаджэр КIэлэегъэджэ шъыпкъэ зышIырэр ишIэныгъэ закъоп — ар апшъэкIэ щытын фаеми, ащ ригъаджэрэм идунай рилъэгъукIын ылъэкIэу, чыжьэрыплъэу, гукIэ Iоф гъэнэфагъэм рипхышъоу, фищэшъоу щытын фае. Ащ фэдэ КIэлэегъэджэ шIагъохэу сигъашIэ щыщ хъугъэхэм ащыщ Пэнэшъу Уцужьыкъо.
«Ар хэт?» ыIони адыгэ литературоведением игъэхъагъэхэм алъыплъэхэрэм, Адыгэ къэралыгъо кIэлэегъэджэ институтым (джы университетым) щеджагъэхэм, джырэ еджакIохэми къахэкIыщтэп. Студентхэм шIу алъэгъурэ кIэлэегъадж, пащэ. Адыгэ литературоведением, критикэм иуцун, игъэхъагъэхэм иIахьышIу ахэзылъхьэрэ шIэныгъэлэжь. Пэнэшъу Уцужьыкъо филологие шIэныгъэхэмкIэ доктор, профессор, научнэ IофшIэгъабэхэм яавтор.
*** Непэ фэдэу къэсэшIэжьы 1997-рэ илъэсым университетыр къэсыухыгъэу, аспирантурэм чIахьэхэрэм сяхъуапсэу, ащ епхыгъэ Iофыгъохэм сакIэупчIэзэ, Пэнэшъу Уцужьыкъо адыгэ пшъэшъэжъыехэм, кIалэхэм ащыщэу иеджэн лъызгъэкIуатэ, научнэ Iофым пыхьан зимурадхэм ащыщ Iоф дишIэ шIоигъоу ыIуагъэу ыIуи ХьакIэмыз Мирэ сызэрэрищэлIэгъагъэр (литературэмкIэ сыригъэджэнэу синасып къыхьыгъэп, ригъаджэхэрэм игугъу зэрашIэу зэрэзэхэсхыщтыгъэм фэшъхьафэу сшIэщтыгъэп). Щхыпэ макIэр ыIупэу, «дэгъу, ащ фэдэ гухэлъ иIэмэ Iоф тшIэн, темэр дгъэнэфэн» зыщиIогъэ мафэм щегъэжьагъэу синаучнэ гъогу икъежьапIэ Iуты хъугъэ, упчIэжьэгъу научнэ Iэшъхьэтет сфэхъугъ. Илъэсхэм къакIоцI зэрисшIыкIыгъэмкIэ цIыф рэхьат, ау щыIэныгъэм, шIэныгъэм къахэхъухьэрэ, къахэхьэрэ кIэу зылъыIэсын, зызщиушэтын, иIахь зыхилъхьан фаехэмкIэ гумызагъ. ГущыIэрыеп, къыIорэр макIэу, нафэу, рэхьатэу, ау цыхьэ зыфыуигъэшIэу мэгущыIэ. ИгущыIэ фэмышъыпкъэу пчэгум къыринэрэп, бырсыр пылъэп. Диссертацием Iоф дасшIи, кIэм фэкIуагъэу къэзгъэшъыпкъэжьын зэхъум (зэкIэри зэлъызыIыгъырэ, зыхэтырэ гумэкIым, цыхьэ зыфэмышIыжьыгъэным сэри сыкъаухьагъэп) игущыIэхэм кIочIэ лые къысхалъхьагъ: «О уиIофшIагъэ ощ нахь дэгъоу зыми ышIэрэп». А мэфэ закъор арэп, непи сыд фэдэ Iофыгъо езгъажьагъэми сыгукIэ зыдэсIыгъ: щыIэ еплъыкIэхэм защыбгъэгъозэн, уяджэн, шIэныгъэ гъэнэфагъэхэм уакъыпкъырыкIын фае, ау, зэкIэми аштэщтми-амыштэщтми, о уиеплъыкIэ, уизэхашIэхэр ахэлъын фае.
*** Пэнэшъу Уцужьыкъо Теуцожь районым ит къуаджэу Къунчыкъохьаблэ 1945-рэ илъэсым жъоныгъуакIэм и 10-м къыщыхъугъ. Еджэныр къоджэ еджапIэм щыригъэжьагъ, Адыгэ еджэпIэ интернатым къыщиухыгъ. Ар дэгъу дэдэкIэ къызеух нэуж, 1964 — 1968-рэ илъэсхэм Адыгэ къэралыгъо педагогическэ институтым филологиемкIэ ифакультет щеджагъ. Тыдэми зыгорэм щеджэни апшъэрэ шIэныгъэ иIэн закъор арэп Пэнэшъум зыдиIыгъыгъэр. ЗычIэхьащтыр гъэнэфэгъагъэ — литературэм фишIыгъэ шIулъэгъуныгъэм зыдищэрэр, ащкIэ ишIэныгъэхэм защыхигъэхъон ылъэкIыщтыр мы факультетыр ары. ИкIэлэгъум къыщегъэжьагъэу литературэм кIочIэ инэу хэлъыр зэхишIагъэу, тхъагъо хигъуатэу пыщагъэ хъугъэ. Ар зыпкъ къикIыгъэр литературэмкIэ икIэлэегъэджагъэу Цуамыкъо ФатIимэт, ащ исэнэхьат хэшIыкIэу фыриIэмрэ кIэлэеджакIохэр зылъищэнхэ ылъэкIэу къэIотэкIэ-гурыгъэIуакIэу IэкIэлъыгъэхэмрэ ары. «ШIэныгъэу къытатыгъэхэм, дунэезэхашIэу къытхалъхьагъэхэм гъогубэхэр къытфызэIуахыщтыгъ. Джы къызнэсыгъэми Цуамыкъо Фатимэ иурокхэр сщыгъупшэжьыхэрэп, ахэм сызэраумэхъыгъэу литературэм сыфэщагъ, шIу сэлъэгъу, ежь кIэлэегъаджэри сищысэтехыпIэу сиIофшIэн сэгъэпсы», — еIо Пэнэшъу Уцужьыкъо.
Институтыр дэгъу дэдэкIэ къызеухы ыуж, Тбилиси аспирантурэм щеджагъ. Ащ щеджэфэ диссертационнэ IофшIагъэм игъэхьазырын игъо фифагъэу, къыщегъэшъыпкъэжьы. Илъэс 27-рэ нахь зымыныбжь кIалэм шIэныгъэ куухэр IэкIэлъхэу, филологие наукэхэмкIэ кандидат хъугъэу къегъэзэжьы ыкIи 1971-рэ илъэсым Адыгэ къэралыгъо кIэлэегъэджэ институтым иIофшIэн щырегъажьэ, ар ищыIэныгъэ щыщ шъыпкъэ мэхъу. КIэлэегъадж, кафедрэм ипащ, декан — факультетым итарихъ пытэу хэуцуагъ. Ащ дакIоу лъэпкъ литературоведениеми еплъыкIэ, ушэтын шIыкIэ гъэнэфагъэ зыдэзыIыгъ кIуачIэу къыхэхьэ. Идиссертационнэ IофшIагъэ зыфэгъэхьыгъагъэр КIэрэщэ Тембот итворчеств ары. ТхакIом итворчествэ анахь игъэкIотыгъэу лъэпкъ литературоведением къыщыгъэлъэгъуагъэхэм ащыщ, ау научнэ «хыорым» хэмыгъощахьэу, творчествэм изэхэфынкIэ ежь игъогупэ Уцужьыкъо къегъоты. «О мастерстве Тембота Керашева» зыфиIорэр шIэныгъэлэжьым иапэрэ тхылъ, ары диссертациеми лъапсэ фэхъугъэр. Тхылъыр гъэшIэгъоны къэзышIырэр ушэтакIом къыIэтырэ Iофыгъохэм къызэригъэшъыпкъэжьырэ фактэу къыхьыхэрэр, зэгъэпшэн шIыкIэм тетэу творчествэм хэлъ эволюциер къэзэригъэнафэрэр ары. Тхыгъэхэм япоэтикэ, художественнэ методымрэ стилымрэ, философскэ гупшысэу ахэгъэкIухьагъэр, «IэпэIэ— сэныгъ» зыфэпIощтым екIолIакIэу иIэ— хэр — зэкIэми Пэнэшъу Уцужьыкъо ынаIэ атырегъэты. Мы IофшIагъэмкIэ шIэныгъэлэжь ныбжьыкIэм апэрэу тилитературнэ шIэныгъэкIэ мыщ фэдэ Iофыгъохэр егъэуцух: темэмрэ IэпэIэсэныгъэмрэ, текстым писателым Iоф зэрэдишIэрэр, лексикэмрэ гущыIэухы— гъэ псэумрэ. КIэращэм итхэн Iоф хабзэу хэлъхэр икъоу зэгъэшIэгъэнхэмкIэ мы тхылъ цIыкIур гъэхъэгъэ ин хъугъэ.
Ащ къыкIэлъыкIуагъ литературнэ-критическэ статьяхэр зыдэхьэгъэ тхылъэу «Традициехэмрэ амалыкIэхэмрэ» (1984). Авторым гущыIапэм пшъэрылъыр къыщегъэнафэ: «Зы лъэпкъ литератур тиIофшIагъэ зыфэгъэзагъэр, ау адыгэ литературэм гъогу зэфэшъхьафхэр къызэрикIугъэр къыдэтэлъытэ, а гъогур социалистическэ реализмэм зэрепхыгъэр ыкIи ащ къызэрэпкъырыкIыгъэр къыхэдгъэщымэ тшIоигъу». Статьяу «Апэрэ лъэбэкъухэм» адыгэхэм ятхыгъэ литературэ щыIэ зэрэхъугъэр, фольклорыр иIэубытыпэу хахъохэм ягъогу игъорыгъоу зэрэтеуцорэр къыщегъэлъагъо. ШIэныгъэлэжьым инэплъэгъу ригъэкIырэп «къэхъугъэкIэ» тхыгъэ литературэм темэхэр, художественнэ къэгъэлъэгъуакIэхэр джыри «зэрэщыхъыбэигъэхэр». «ЩыIакIэм зэхъокIыныгъэ инхэр щэхъух. Ахэр зэфихьысыжьын, поэтическэ гупшысэ ин хэлъэу къыгъэлъэгъон литературэу уцурэ къодыем зэримылъэкIыщтгъагъэр гурыIогъуаеп. Ащ фэдэ пшъэрылъи а лъэхъаным писатель ныбжьыкIэхэм зыфагъэуцущтыгъэп. ЩыIакIэр зэблэхъугъэ зэрэхъугъэр, цIыфым шъхьафитныгъэ зэригъотыгъэр, блэкIыгъэ псэукIэжъым къыкIэныгъэ хабзэхэм уябэнын зэрэфаер — джары яорэд зыфэгъэхьыгъагъэр», — етхы ушэтакIом. ЕгъэжьэпIэ лъэхъаным щыкIэгъэ шъхьаIэу иIагъэмэ ащыщ (анахь шъхьаI пIоми хъущт) цIыфым иIэкIоцI дунай, ащ ипсихологие тэрэзэу конфликтым джыри зэремыпхыгъагъэр. Щэч хэмылъэу ащ конфликтым изэшIохыни къыщигъакIэщтыгъэ. Ащ тетэу Пэнэшъу Уцужьыкъо лъэпкъ литературэм ихэхъоныгъэ гъогу рыплъэзэ, «ЛъэгапIэхэм якIурэ гъогухэм» зэфэхьысыжьэу къащыфакIо я 60-рэ илъэсхэм лъэпкъ литературэм илъэгапIэхэм зыкъызэрагъэнафэрэм. Джы адыгэ литературэм хахъо ышIыгъ. ТхакIохэм темэ зэфэшъхьафхэр къаIэтых, жанрэм ыкIи стилым ылъэныкъокIэ амал гъэшIэгъонхэр къагъотых, характерыр нахь куу, нахь гъэшIэгъон ашIы.
1990-рэ илъэсым Пэнэшъу Уцужьыкъо филологие шIэныгъэхэмкIэ докторыцIэр къылэжьыгъ. «Типологические связи и формирование художественно-эстетического единства адыгских литератур» — ары докторскэ къэгъэлъэгъон темэ инэу зыдэлэжьагъэр, лъэпкъымкIэ зэпэблэгъэ литературэ ныбжьыкIищмэ — адыгэ, къэбэртэе ыкIи щэрджэс литературэхэм — ятипологическэ зэпхыныгъэхэр анализ шIыгъэнхэр ары пшъэрылъ шъхьаIэу зыфигъэуцужьыгъагъэр. Типологическэ зэгъэпшэным тетэу литературэм хэхъухьэрэ-хэшIыхьэрэ зэхъокIыныгъэхэр, хахъохэр къэбгъэлъэгъоныр, зэхэпфыныр литературоведением изы упчIэ инхэм, хьылъэхэм ащыщ. Нафэ зэрэхъурэмкIэ, упчIэхэм якуугъэ, яшъомбгъуагъэ икъигъэлъэгъукIынкIэ зыпкъ имытырэ, хахъо зышIы зэпытырэ литературнэ процессым хэшIыкI ин фыуиIэн фае.
Диссертационнэ темэм икуугъи, къызэрэзэIухыгъэри къыхигъэщэу филологие шIэныгъэхэмкIэ докторэу, Грузием шIэныгъэхэмкIэ и Академие бзэмрэ литературэмрэкIэ иакадемик-секретарэу Г. Ш. Цицишвили етхы: «Мэхьэнэ гъэнэфагъэ иIэу щыт адыгэ литературэхэм зэкIэ советскэ литературэм щыщ Iахьэу къызэратегущыIагъэр. …Сэ сызэреплъырэмкIэ, Пэнэшъу У. М. идессертацие лъэпкъыбэмэ зэдыряе советскэ литературэм итарихъ инэу ахэуцощт. Ар зытхыгъэм ученэ степенэу филологическэ шIэныгъэхэмкIэ докторыр фэгъэшъошэгъэныр игъо шъыпкъэу сэлъытэ» (Адыгэ макъ,14.08.1991). Диссертациер тхылъ шIыгъэу 1990-рэ илъэсым къыдигъэкIыгъ, етIанэ 1995-рэм адыгабзэкIэ «Зы лъапсэ къикIыгъэхэр» ыIуи зэридзэкIыжьыгъ.
«Литература изменяющегося мира» (2000) зыцIэ тхылъым, ыпэхэрэм ялъытыгъэмэ, теорием епхыгъэ гурыIоныгъэхэм, Iофыгъохэм нахь игъэкIотыгъэу чIыпIэ щаубыты, «джырэ литературэми» нахь фэгъэзагъ.
ШIэныгъэлэжьыр литературэм исыд фэдэрэ Iофыгъо дэлэжьагъэми, къызыпкъырыкIырэр ар щыIэныгъэм игъунджэу зэрэщытыр, ихахъуи илъэгапIэхэри общественнэ ыкIи историческэ хъугъэ— шIагъэхэм зэряпхыгъэр ары. Адыгэ литературэр изакъоу щыIэп, хэгъэгу литературэ процесс иным изы лъэбанэу щыщ, лъэпкъ нэшэнэ къэIокIэ-къэгъэлъэгъуакIэхэр, хабзэхэр къыдэлъытагъэхэу ащ типологическэу епхыгъ.
Пэнэшъу Уцужьыкъо научнэ конференцие зэфэшъхьафхэм чанэу ахэлажьэ, ежь ипащэу илъэситIу пэпчъ Адыгэ къэралыгъо университетым лъэкъ зэфэшъхьафхэр зыхэлэжьэрэ конференциеу «Кросс-культурное пространство литературной и массовой коммуникации» зыфиIорэр щызэхащэ, ащ иматериалхэмкIэ тхылъхэр къыдагъэкIыжьых. ВАК журналхэм ахэхьэрэ «Вестник АГУ»-м ифилологие сериекIэ пшъэдэкIыжь зыхьырэ редактор.
Кадрэхэм ягъэхьазырын ишъыпкъэу дэлажьэ. Литературэмрэ фольклорымрэ япхыгъэ диссертационнэ советым ипащ, ар уахътэм диштэу зэрэлэжьэщтым пылъ, къыщагъэшъыпкъэжьырэ IофшIагъэхэм якъыхэхын пшъэрылъ инэу егъэцакIэ. Ежь янаучнэ Iэшъхьэтетэу кандидатскэ, докторскэ диссертациехэри аухьазырых, къагъэшъыпкъэжьых.
Пэнэшъу Уцужьыкъо иIофшIакIэкIэ, игъэхъагъэхэмкIэ къылэжьыгъэ цIэ лъапIэхэр иIэх: «Отличник народного образования», «Заслуженный деятель науки Республики Адыгея», «Заслуженный работник высшей школы РФ», Адыгэ Республикэм и Къэралыгъо тын наукэмкIэ илауреат.
Хьалэлэу, ау пытагъэ зыхэлъ лъэбэкъухэмкIэ ищыIэныгъэ гъогу екIу. IофшIэныр сыдигъуи Iэпэдэлэл ышIырэп, шъхьашъорыкIоу ышIэрэр ышIэрэп, сыд фэдэ IофкIи цIыфым пшъэдэкIыжь зэриIэн фаер щыгъупшэрэп, зыдэлажьэхэрэми, ригъаджэхэрэми ар агурегъаIо.
Пэнэшъу Уцужьыкъо сызэрыгушхорэ, лъытэныгъэ зыфэсшIырэ КIэлэегъадж. Сэщ фэдабэу зигъашIэ щыщы хъугъэ «инаучнэ сабыйхэм» зэкIэми ацIэкIэ ныбжь дахэу иIэ хъугъэмкIэ сыфэгушIо. Псауныгъэ пытэ иIэу гъэшIэ гъогу кIыхьэ къыкIунэу фэсэIо.
Шэуджэн Тэмар. АРИГИ-м иIофышI.