Урысыем гандболымкIэ и Федерацие изэхэсыгъо къыщаIэтыгъэ Iофыгъо шъхьаIэхэм ащыщ 2019 — 2020-рэ илъэс зэнэкъокъур зэраухыщт шIыкIэр.

Мэлылъфэгъу мазэм и 25-м ехъулIэу командэхэм ешIэгъоу яIагъэхэр федерацием щызэфахьысыжьыгъэх. ЗэхэщэкIо купым хэтхэм, командэхэм япащэхэм ИнтернетымкIэ яеплъыкIэхэр къаIуагъэх. Зэпахырэ узым къыхэкIэу 2019 — 2020-рэ илъэс ешIэгъум паублэжьыщтэп. Къыдахыгъэ чIыпIэхэр очко пчъагъэу яIэхэм ялъытыгъэх.

ЧIыпIэхэр

1. «Ростов-Дон» — 43 2. «Лада» — 37 3. ЦСКА — 34 4. «Астраханочка» — 32 5. «Звезда» — 28 6. «Кубань» — 27 7. «Ставрополье» — 22 8. «Динамо» — 13 9. «АГУ-Адыиф» — 12 10. «Университет» — 10. 11. «Уфа-Алиса» — 4 12. «Луч» — 2.

НыбжьыкIэхэм якуп

Апшъэрэ купэу нахь ныбжьыкIаIохэр зыщызэнэкъокъухэрэм командэ 16 хэт. Ахэр тIоу гощыгъэх. Куп пэпчъ апэрэ чIыпIи 4-р къыщыдэзыхыгъэ командэхэр шъхьафэу зэдешIэнхэу щытыгъэх.

Зэтэгъапшэх

1. «Звезда-2» — 20 2. «Астраханочка-2» — 18 3. «Лада-2» — 16 4. «Ростов-Дон-УОР» — 12 5. «Динамо-СШОР» — 12 6. ЦСКА-2 — 12 7. «Кубань-2» — 12 8. «Луч-2» — 0.

Мыекъопэ «АГУ-Адыифым» иятIонэрэ командэ я 10-рэ чIыпIэр къыдихыгъ. «Олимп-Толь­ят­ти», «Ростов-Дон-3», «Рос­тов- на-Дону», нэмыкI командэхэри тиешIакIохэм ауж къинагъэх.

Зэфэхьысыжьхэр

— ПэшIорыгъэшъ ешIэгъухэм ауж командэхэр медальхэм афэбэнэнхэу хъугъэп, — къытиIуагъ «АГУ-Адыифым» итренер шъхьаIэу Никита Голуб. — Тэ медаль къэтхьыным тыфэхьазырыгоп. Я 7 — 8-рэ чIыпIэхэм ащыщ тыфэбэнэн тлъэкIыщтыгъэ.

БлэкIыгъэ илъэс ешIэгъум елъытыгъэмэ, «Адыифым» мыгъэ очко пчъагъэу ригъэкъугъэр нахьыб. Арэу щытми, иамалхэр икъоу ыгъэфедагъэхэп.

Титренерхэм зэралъытэрэмкIэ, «Динамэм» зэIукIэгъур къы­шIотхьынэу шIыкIэшIухэр щыIагъэх. «Уфа-Алисэр» «Адыифым» къытекIуагъ. «Университетым» зэфэдэу тыдешIагъ. «Адыифым» ешIэгъуищ къыхьыгъ. «Универ­ситетым», «Уфа-Алисэм», «Динамэм» къызэрашIуихьыгъэр къы­хэтэгъэщы.

— «Кубань» зэIукIэгъоу Мые­къуапэ щыдытиIагъэр гъэшIэ­гъонэу кIуагъэ, — тизэдэгущы­Iэгъу къыхэлажьэ «Адыифым» ипресс-къулыкъу ипащэу Бзаго Рустам. — Аужырэ нэгъэупIэпIэгъум нэс зэIукIэгъум къыры­кIощтыр къэпшIэнэу щытыгъэп. Зым текIоныгъэр IэкIэкIы, ятIо­нэрэр гугъэм егъэлъэшы.

ЗэIукIэгъур аухынымкIэ та­къикъ 14 къэнагъ, 27:26, «Адыи­фыр» текIо. Пчъагъэр зэрэлъыкIуатэрэр: 29:28, 29:29, 30:29, 30:32, къэнагъэр такъикъи 6. 31:33, къэнагъэр такъикъи 4. 32:33, 33:30, нэгъэупIэпIэгъу 54-рэ къэнагъэр.

«Кубань» IэгоуитIукIэ тапэ итыгъэми, пчъагъэр 33:33-рэ зэхъум, тыгушIуагъ, ау тырэ­хьатыгъэп. КIэух такъикъым «Кубань» Iэгуаор ыIыгъэу ти­къэлапчъэ благъэу къекIугъ. Гур мэлъэпэрапэ, зэIукIэгъур тшIуа­хьынымкIэ щынагъо щыI. Ти­пшъашъэхэр а уахътэм пытэу зэкъоуцохи, «Адыифым» икъэлапчъэ къаухъумагъ, апэкIэ илъынхэуи шIыкIэшIухэм алъы­хъугъэх.

ЕплъыкIэхэр

— ЕшIэкIэ дэгъухэу тиIагъэхэм гукIэ къафэдгъэзэжьызэ, тапэкIэ тызэрэлъыкIотэщтым тегупшысэ, — къытиIуагъ гандбол клубэу «Адыифым» ипащэу Къудайнэт Мэджыдэ. — Джэнчэтэ СултIан лъапсэ зыфишIыгъэ гандбол еджапIэм зедгъэушъомбгъущт. Республикэм и Правительствэ зэхэщэн IофыгъохэмкIэ IэпыIэгъу къытфэхъу. Гандболыр зы­шIогъэшIэгъонхэу тиешIэгъухэм яплъыхэрэр, къытфэгумэкIыхэрэр нахьыбэрэ дгъэгушIонхэ тимурад.

Хэта хэкIыжьыщтыр?

Илъэс ешIэгъур заухыкIэ «хэта хэкIыжьыщтыр?» зыфэпIощт упчIэр къэтэджы. Хэта аштэщтыр? Ари тызыгъэгумэкIыхэрэм ащыщ. Клубым ипащэхэм къызэрэтаIуа­гъэу, джэуапхэм ягупшысэнхэу бжыхьэм нэс уахътэ яI. Къудайнэт Мэджыдэ «Адыифым» ехьылIэгъэ зэдэгущыIэгъу дэтшIынэу тызэзэгъыгъ.