Экономикэм ихэхъоныгъэ дэлэжьэнхэм фэшI
Оперативнэ штабым изэхэсыгъоу КъумпIыл Мурат зэрищагъэм зыщытегущыIэгъэхэ Iофыгъохэм ащыщыгъ непэ щыIэ режимым игъорыгъоу текIыжьынхэмкIэ, экономикэм ихэхъоныгъэхэм Iоф адэшIэгъэнымкIэ пшъэрылъэу яIэхэм.
— Пандемием ебэныгъэныр ыкIи цIыфхэм япсауныгъэ изытет зэкIэмэ анахь шъхьаIэу щыт. Ау ащ дакIоу экономикэм ихэхъоныгъэхэми тадэлэжьэщт. Эпидзыпкъитыныгъэм иягъэ рамыгъэкIэу предприятиехэр чэзыу-чэзыоу егъэжьэжьыгъэнхэ фае, — къыIуагъ КъумпIыл Мурат.
Зэхэсыгъор макIофэ автосалонхэм, псэолъэшI тучанхэм, компьютернэ техникэр зыщащэхэрэр ыкIи зыщагъэцэкIэжьхэрэр, нэмыкI хъызмэтшIапIэхэм яIофшIэн зэрэрагъэжьэжьыщт шIыкIэм атегущыIагъэх.
ХэушъхьафыкIыгъэ шъолъыр Планэу 2020-рэ илъэсым экономикэм хэхъоныгъэхэр егъэшIыгъэнхэм пае аштагъэм мы IофымкIэ ишIуагъэ къэкIонэу ары зэрэгугъэхэрэр. Ащ къыдыхэлъытагъэх предпринимательхэм ыкIи экономикэм иотраслэ зэфэшъхьафхэм, цIыфхэу чIыпIэ къин ифагъэхэм занкIэу арагъэгъотырэ IэпыIэгъур.
Мэлылъфэгъум и 28-м АР-м и ЛIышъхьэ и Унашъоу зыкIэтхэжьыгъэмкIэ ащ хэхьэрэ Iофтхьабзэхэм ахэхъуагъ (13-м текIыхи 45-м нагъэсыгъ), предпринимательствэ цIыкIумрэ гурытымрэ IэпыIэгъоу аратыщтыри хагъэхъожьыгъэхэм ащыщ.
АР-м экономикэм хэхъоныгъэмкIэ ыкIи сатыумкIэ иминистрэу Геннадий Митрофановым къызэриIуагъэмкIэ, агъэнэфэгъэ Iофхэм ащыщхэр джырэ уахътэм агъэцакIэх. ГущыIэм пае, микрозаймхэу зы процент нахьыбэ зытемыхъохэрэр атых, зиIоф къэхьылъагъэмэ кредитхэм ятын мэзих пIалъэкIэ афызэкIахьэ, бизнесым ыпшъэ дафэщтыгъэ бэджэнд уасэм итыни джащ фэдэу лъагъэкIотагъ. ХэбзэIахьым ылъэныкъокIи фэгъэкIотэнхэр афашIыгъэх. ГущыIэм пае, отраслэ зэфэшъхьафхэу пандемием ыпкъ къикIыкIэ чIыпIэ зэжъу иуцуагъэхэм апае щылэ мазэм и 1-м 2020-рэ илъэсым къыщегъэжьагъэу тыгъэгъазэм и 31-м 2020-рэ илъэсым нэс хэбзэIахьэу атырэм пылъ процентыр къафырагъэIыхыгъ, ащ хэхьэх хэбзэIахь зытырэ организациехэр ыкIи унэе сатыушIэхэр.
Адыгеим и ЛIышъхьэ зэхэсыгъом хэлажьэрэмэ анаIэ тыраригъэдзагъ УФ-м и Президент пшъэрылъэу къыгъэуцугъэхэр шIокI имыIэу зэрагъэцэкIэн фаехэм ыкIи АР-м иминистрэхэм я Кабинет унашъо фишIыгъ а IофшIэным фежьэнхэу, джырэблагъэ япредложениехэр къахьынхэу.