КъокIыпIэм щыпсэурэ лъэпкъхэм я Къэралыгъо музей и Темыр-Кавказ къутамэ иIофышIэхэм республикэм исурэтышIхэм ящыIэныгъэрэ ятворчествэрэ зышIогъэшIэгъонхэр, къэгъэлъэгъонхэм алъыплъэхэрэр, изобразительнэ искусствэм ылъэныкъокIэ зишIэныгъэ хэзыгъахъо зышIоигъохэр ямузей исайт зыщагъэгъозэнэу къырагъэблагъэх.

— ЩыIэныгъэм чIыпIэ гъэнэфагъэхэм тазыри­гъэуцокIэ, нэмыкIэу тызекIон, тыгупшысэн фаеу мэхъу, нэмыкI зэфыщытыкIэхэр тазыфагу илъ мэхъух. ШIэныгъэлэжьы­шхохэми, цIыф къызэрыкIохэми ар афэгъэхьыгъ. Хэти къэзыуцухьэхэрэм нэмыкIэу афыщыт мэхъу, программакIэхэм зафе­гъасэ. Ау пшъэрылъэу иIагъэхэр зэригъэцэкIэн фэегъэ шапхъэр къэнэжьы, — къытыгъ музеим ипресс-къулыкъу.

Изобразительнэ искусствэм ихудожественнэ стильхэм афэгъэхьыгъэ Iэнэ хъураер видеокон­ференцие шIыкIэм тетэу музеим щы­кIуагъ.

КъокIыпIэм щыпсэурэ лъэпкъхэм я Къэралыгъо музей и Темыр-Кавказ къутамэ иIофышIэхэм гъэрекIо зэрэрахъу­хьэгъагъэм тетэу изо­бразительнэ искусствэм ихудожественнэ стильхэм афэгъэхьыгъэ Дунэе научнэ конференциер мыгъэ гъэтхапэм и 27 — 29-м зэхащэнэу щытыгъ. Ащ хэлэжьэнхэу агъэнэ­фэгъагъэхэм ядокладхэр видеом тыратхагъэх, редакторхэр статьяхэм яджа­гъэх, макетыр зэхагъэуцуи цIыфхэм алъа­гъэIэсыгъ.

— Тидокладхэу видео­хэм атетхагъэхэр конференцием хэлажьэхэрэм аIэкIагъэхьагъэх, КъокIыпIэм щыпсэурэ лъэпкъ- хэм я Къэралыгъо музей и Темыр-Кавказ къутамэ исайт идгъэхьагъэх. Арышъ, зышIоигъо пстэуми ахэм непэ нэIуасэ зафашIын алъэкIыщт, — къыщытаIуагъ музеим.

Ахэр — музеим идиректор игуадзэхэу Ф. Хь. Сулеймэнымрэ Ж. Хь. Къуекъомрэ ядокладэу «Произведения адыгских художников в собрании Северокавказского фи­лиала Государственного музея Востока: история формирования коллекции» зыфиIорэр, искусст­воведениемкIэ докторэу, профессорэу А. Н. Соколовам идокладэу «Бык как символический образ изо­бразительного искусст­ва» зыфиIорэр, музеим инаучнэ IофышIэ шъхьаIэу Л. А. ХъуакIом идокладэу «Культурное возрождение адыгов сквозь призму художественного творчества Нурбия Ловпаче» зыфиIорэр, философие шIэныгъэхэмкIэ докторэу, Краснодар щыщ И. А. Аполлоновым илъэтегъэуцо. Джащ фэдэу Тыркуем щыщхэу, социологи­емкIэ докторэу Джемре Жаде, Эльчин Башол, адыгэ лъэп­къым къыхэ­кIыгъэ, Тыркуем щыпсэурэ сурэтышI цIэрыIоу Ахмет Йозел яеплъыкIэхэми мыщ нэIуасэ защыфашIын алъэкIыщт.