Бзэхэр зыщызэрагъэшIэрэ Гупчэу «Активым» ипащэу, Адыгэ Республикэм лъэпкъ гъэсэны­гъэмкIэ изаслуженнэ IофышIэу Едыдж Мэмэт гущыIэгъу тыфэхъугъ.

— Коронавирусым тыпэуцугъэу егъэджэныр зэрэзэхатщэрэм къыкIэупчIэрэр бэ, — къытиIуагъ Едыдж Мэмэт. — Уз хьылъэм къиныгъохэр къызыди­хьыгъэх.

— Егъэджэныр зэпышъумыгъэоу IофшIэныр зэ­рэлъыжъугъэкIуатэрэм укъытегущыIэ тшIоигъу.

— Хэгъэгум егъэджэн Iофхэр зэрэщызэхащэрэм тылъы­плъэзэ, тиамалхэр тэгъэфедэх. Еджа­кIохэм тапэчыжьэу Ин­тернеткIэ, телефонкIэ, нэмыкI зэлъы­IэсыкIэ амалхэмкIэ шIыкIэхэр къэтэгъотых. Анахьэу тынаIэ зы­тетыр кIэлэеджакIохэм, «Активым» зэкIэ иIофы­шIэхэм япсау­ныгъэ къэухъумэгъэныр ары.

— ЕджакIо пэпчъ шъу­лъыIэсыныр Iоф къызэ­рыкIоп. Сыда IэубытыпIэ шъушIыгъэр?

— «Активым» зэIукIэ щытиIагъ. Унагъохэм лъэкIэу яIэр къыдэтлъыти, Интернетым щыкIэхэрэр, унэм ар ищэгъэнымкIэ амал зымыгъотыхэрэм за­щыдгъэгъозагъ. ЗэкIэми IэпыIэгъу тафэхъугъ, тызэдэгущыIэн, ты­зэлъыIэсын тэлъэкIы.

— Ны-тыхэм шъуадэгущыIэба?

— ЕджакIохэм афэдэхэу ахэри яунэхэм арысых. ЯкIалэхэм яеджакIэ нахьышIоу алъэгъу хъугъэу сэлъытэ.

— КIэлэегъаджэр апа­шъхьэ итэу еджэнхэмрэ зэпэчыжьэхэу егъэджэныр зэхащэнымрэ зэрэзэтекIыхэрэм еплъыкIэу фыуиIэр къытаIоба.

— Бзэхэр зэзыгъашIэ зышIоигъохэр, яшIэныгъэ хагъэхъо­нымкIэ амалхэм алъыхъухэрэр арых «Активым» щеджэхэрэр. Фэмыер тиеджапIэ бэрэ къэкIощтэп. КIэлэегъаджэр тыдэ щыIэми, еджакIор еджакIоу къэнэжьын фае. Тхылъыр шIэныгъэм иIун­кIыбзэу тэлъытэмэ, кIэлэегъа­джэмрэ кIэлэеджакIомрэ зэшIо­кIодыщтхэп, зыщищыкIагъэм къэ­зэрэгъотыщтых.

— Мэмэт, «Активым» щызэрагъашIэрэ бзэхэм адыгабзэмрэ инджылы­зыбзэмрэ къахэтэ­гъэщых.

— А бзитIур ары тиеджапIэ нахьыбэмэ щызэрагъашIэрэр. Ны-тыхэр унэм исыхэу якIалэхэм адыгабзэкIэ адэгущыIэнхэм имэхьани къыхэсэгъэщы. КIэлэ­еджакIохэм ящыкIэгъэ тхылъхэр, нэрылъэгъу IэпыIэгъухэр ятэгъэ­гъотых.

— ШIэныгъэм лъыкIохэрэм «Активыр» еджэпIэшIу тапэкIи афэхъунэу шъуфэтэIо.

— Тхьауегъэпсэу.