ЩыIэныгъэм фэусагъ
Адыгэ Республикэм инароднэ артистэу, Абхъазым изаслуженнэ артистэу, композиторэу Гъонэжьыкъо Аскэр Гъабидэ ыкъом идунай зэрихъожьыгъэр мэлылъфэгъу мазэм и 18-м мэфэ 40 мэхъу.
Макъэр Iэтыгъэу уахътэм улъыджагъэми, къэуцущтэп, къызэплъэкIыщтэп. Мурадэу уиIэр ащ къыфэпIуатэ пшIоигъомэ, угоуцон, уапэкIэ уплъэн фае. Гъонэжьыкъо Аскэр щыIэныгъэм дыригъаштэу псэугъэ. Нэм ылъэгъурэр гум ригъэкIужьызэ, иIофшIагъэкIэ цIыфхэм алъыIэсыщтыгъ.
ГукъэкIыжьхэм уагъэгъуазэ
— Дзэм къулыкъур щысхьы-гъэу Мыекъуапэ къызысэгъэзэжьым, музыкальнэ училищым Гъонэжьыкъо Аскэр нэIуасэ сыщыфэхъугъагъ, еджапIэр къызэдэтыухыгъ, — къеIуатэ Адыгэ Республикэм культурэмкIэ изаслуженнэ IофышIэу ШхончыбэшIэ Мурат. — Дунаим щыцIэрыIо ансамблэу «Налмэсым» тизэфыщытыкIэхэр щыпытагъэх.
Ижъырэ адыгэ музыкальнэ Iэмэ-псымэхэмкIэ М. ШхончыбашIэм лъэпкъ мэкъамэхэр къыригъаIощтыгъэх. Гъонэжьыкъо Аскэр пщынаоу щытыгъ.
— ЦIыфым сэнаущыгъэу хэлъыр IофшIэным къыщызэIуехы, — зэдэгущыIэгъур лъегъэкIуатэ М. ШхончыбашIэм. — Гъонэжьыкъо Аскэр орэдыбэ ыусыгъ. Композитор цIэрыIохэу Тхьабысымэ Умарэ, Натхъо Джанхъот, Анзэрэкъо Чеслав, Сихъу Рэмэзан, нэмыкIхэми афэдэу лъэпкъ искусствэм хэхъоныгъэ фишIыгъ.
«Березкэм» дэуджыгъэх
СССР хэгъэгушхоу тызыщыпсэущтыгъэр илъэс 60 зэрэхъурэм фэгъэхьыгъэ концертэу зэлъашIэрэ ансамблэу «Березкэм» Москва къыщитыгъэм Гъонэжьыкъо Аскэр зэрэхэлэжьагъэр игукъэкIыжь лъапIэхэм ащыщыгъ.
«Налмэсым» иартистхэу Бастэ Азэмат, ШхончыбэшIэ Мурат, Гъонэжьыкъо Аскэр, нэмыкIхэри нэбгыри 10 фэдиз хъурэ купым хэтхэу «Березкэм» мэзитIо Iоф дашIагъ. Художественнэ пащэу Надежда Надеждинар, концерт хэхыгъэм ирежиссерэу Игорь Моисеевыр, Адыгеим иартистхэм къафэрэзагъэх. Адыгэ къашъоу къагъэлъэгъуагъэм, лъэпкъ орэдышъоу агъэжъынчыгъэм осэ ин къыфашIыгъ.
«Ислъамыер» ипытапI
— Сигупсэу Джэджэхьаблэ пэгъунэгъу къуаджэу цIэрыIуабэ къызыдэкIыгъэ Тэуйхьаблэ Гъонэжьыкъо Аскэр къыщыхъугъ. Джэджэхьэблэ гурыт еджапIэм тыщеджагъ, — къеIуатэ «Ислъамыем» ихудожественнэ пащэу, Урысыем, Адыгеим янароднэ артистэу, Адыгеим икомпозиторхэм я Союз итхьаматэу Нэхэе Аслъан. — «Ислъамыер» зызэхэтэщэм, оркестрэм ипащэу Гъонэжьыкъо Аскэр дгъэнэфагъ. Ансамблэр зыпкъ иуцонымкIэ гуетыныгъэ ин къызыхигъэфагъ.
Композиторэу Нэхэе Аслъан «Ислъамыем» пае зэригъэфэгъэ ижъырэ орэдхэу «Щырытым», «Мэзгуащ», «Си Мурадин» зыфиIохэрэр, лъэпкъ къэшъо мэкъамэхэр оркестрэм дэгъоу къыригъаIощтыгъэх. «Ислъамыем» иконцертхэр Темыр Кавказым щыкIуагъэх. ЩытхъуцIэу «Абхъазым изаслуженнэ артист» А. Гъонэжьыкъом къыфагъэшъошагъ.
Израиль зэкIохэм
Адыгеим инароднэ артистхэу апэрэ концертыр Израиль къыщызытыгъэхэр Нэхэе Тэмарэрэ Гъонэжьыкъо Аскэррэ. Краснодар краим Адыгеир къыхэкIыжьыгъэу республикэ зыщыхъугъэ лъэхъэнэ гъэшIэгъоным Кфар-Камэ концертыр щызэхащэгъагъ.
— Адыгэу Израиль исхэм тырагъэблагъи, зэкъошныгъэм иконцерт къуаджэм къыщыттыгъагъ. Мырзэ Дзэпщрэ Гъонэжьыкъо Аскэррэ зэдаусыгъэу «КъакIоба, къакIоба» зыфиIорэр, ижъырэ адыгэ орэдхэр Кфар-Камэ къыщысIогъагъэх, — еIо артисткэ цIэрыIом.
Хьакъунэ Заремэрэ Гъонэжьыкъо Аскэррэ яорэдэу «ТызэхэкIыжьым» тамэ езыгъэгъотыгъэ Нэхэе Тэмарэ тизэдэгущыIэгъу къыщыхигъэщыгъ композиторым игупшысэ щыIэныгъэм къызэрэпкъырыкIырэр. «ТызэхэкIыжьыр» дунаим щэIу, ащ техыгъэ театрализованнэ пычыгъохэр артистхэм къашIых.
Ехъырэхъышалэу А. Гъонэжьыкъор щытыгъэп, ар Iофыр псынкIэу ыгъэцэкIэным дэгуIэщты-гъэп. ЗэлъашIэрэ МэщбэшIэ Исхьакъ игущыIэхэм атехыгъэ орэдхэм ащыщэу «Азэматыр» къаIонэу артист заулэмэ ялъэ-Iугъ шъхьае, ар ашIогъэшIэгъоныгъэп. ГъукIэлI Мирэ орэдым хэлъ гупшысэм тамыгъэ ритыгъ.
Дышъэ къыгъотыгъ
Псыхъоу Мартэ инэпкъхэм археологхэм тарихъ пкъыгъуабэ къыщагъотыгъ. Псыр къызиукIэ нэпкъыр ылъэсыхьэщтыгъ. Гъонэжьыкъо Аскэр чылэм кIожьыгъэу Мартэ имыхъо-мышIагъэхэм яплъызэ, дышъэм хэшIыкIыгъэ шы сурэт къыгъотыгъ. Пкъыгъо лъапIэр Адыгэ Республикэм и Лъэпкъ музей ритыгъ.
— Аскэр шIухьафтын къытфишIыгъэ шы сурэтыр музеим къыщагъэлъэгъорэ анахь дахэхэм ащыщ, — къытиIуагъ Адыгэ Республикэм культурэмкIэ изаслуженнэ IофышIэу, археологэу Тэу Аслъан.
ЯтIонэрэ шы сурэтыр Аскэр ышэу Азэмат къыгъоти, музеим зэрэритыгъэри бгъэшIэгъонэу щыт.
ИIэпыIэгъухэр
ГукIэгъу зыхэлъ цIыфэу А. Гъонэжьыкъор зэрэщытыр IофшIапIэм къыщылъагъощтыгъ. НыбжьыкIэ дэдэхэу оркестрэм къыхэхьагъэх пщынаохэу Лъэцэр Светланэрэ Мышъэ Андзауррэ. ТIури Адыгэ Республикэм инароднэ артист хъугъэх.
Едыдж Гушъао кIэлэцIыкIоу Тыркуем къикIыжьыгъ. Гъонэжьыкъо Аскэр ащ IэпыIэгъу фэхъуи, адыгэ орэдхэр пщынэмкIэ къыригъэIонхэу ыгъэсагъ. Нарт шъаом ыпкъынэ-лынэхэр лъэпкъ искусствэм зэлъикIугъэх. КIэлэ ищыгъэр «Налмэсым» аштагъ, къэшъокIо цIэрыIомэ ащыщ, пщынэри зэхахьэхэм ащегъэжъынчы. Адыгэ Республикэм изаслуженнэ артист цIэ лъапIэр къызэрэфаусыгъэм Гъонэжьыкъо Аскэр иIахьышхо хэлъ.
ИорэдхэмкIэ къытхэт
— Гъонэжьыкъо Аскэр иорэдхэм афэгъэхьыгъэ пчыхьэзэхахьэ филармонием зыщызэхэтэщэм, республикэм икъуаджэхэм къарыкIыгъэхэр бэ хъущтыгъэх, — къеIуатэ Нэхэе Аслъан.
«Ислъамыери», нэмыкI артистхэри зэхэлэжьэщтхэ концертэу Гъонэжьыкъо Аскэр фэгъэхьыгъэщтым коронавирусым ыуж тытегущыIэщт.
— Гупсэфэу угурыIон, зэкIэмыкIоу къыбготэу щытын зылъэкIыщтыгъэ Гъонэжьыкъо Аскэр иорэдхэр тилъапIэх, — къытиIуагъ Адыгеим инароднэ артистэу Къумыкъу Щамсудинэ. — Ащ иорэдхэу «Пшъэшъэ дэхаб», «Зара», «ШIулъэгъум ижьыбгъ» сэ къэсэIох. «Ислъамыем» ирепертуар иорэдыбэ хэт.
Гъонэжьыкъо Аскэр ишъхьэгъусэу Розэ, ыкъохэу Руслъанрэ Ринатрэ къиныр къадэзыIэтыгъэхэм «тхьашъуегъэпсэу» гъэзетымкIэ араIожьы ашIоигъу.
Тхьэм джэнэт къыует, Аскэр. УишIушIагъэ цIыфмэ ащыгъупшэщтэп.
ЕмтIылъ Нурбый.