Адыгэ Республикэм и Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу, Урысыем ыкIи Адыгеим искусствэхэмкIэ язаслуженнэ IофышIэшхоу Сулейманов Юныс уахътэм диштэу япшъэрылъхэр зэрагъэцакIэрэм фэгъэхьыгъэу гущыIэгъу тыфэхъугъ.

–Краснодар краим, Къэбэртэе-Бэлъкъарым, нэмыкI шъолъырхэм культурэмкIэ яIофышIэхэм телефонкIэ тафытео, коронавирусым пэуцугъэхэу зэрэпсэухэрэм зыщытэгъэгъуазэ, -къеIуатэ Сулейманов Юныс. -IофшIэныр рагъэжьэжьынэу зызыгъэхьазырыхэрэм яеплъыкIэхэр тшIогъэшIэгъоных. Анахьэу къыхагъэщырэр IэпыIэгъу зэрэзэфэхъужьыхэрэр ары.

-Адыгеим и Камернэ музыкальнэ театрэ спектаклэхэр джырэ уахътэ зэригъэуцухэрэм къытегущыIэба.

-Грузием изаслуженнэ артистэу, Адыгеим инароднэ артистэу, Камернэ музыкальнэ театрэу А. Хьанэхъум ыцIэ зыхьырэм къашъохэмкIэ ипащэу Исуп Аслъан «Адыиф» зыфиIорэ къэгъэлъэгъоныр егъэуцу.

-Ижъырэ адыгэ орэдэу «Адыифым» ар техыгъа?

-Орэдышъор ары къызы- пкъырыкIыгъэр. Гъыбзэу «Адыифыр» оркестрэм ыгъэжъынчызэ, артистхэм къашъор къыхадзэ. Гъэзетеджэхэм къясIо сшIоигъу «Адыифым» лъэпкъ къэшъо зэфэшъхьафхэр къызэрэщашIыщтхэр.

-Искусствэм лъэпкъхэр зэрэзэфищэхэрэм къэгъэлъэгъоныр фэгъэхьыгъэу плъытэ хъущта?

-Республикэм лъэпкъыбэ щэпсэу. Тигъунэгъу Краснодар краим зыбгъазэми, урысхэм, адыгэхэм, ермэлхэм, нэмыкIхэм уащыIукIэщт. «Адыифым» искусствэм ибаиныгъэ, къашъом ыбзэкIэ дэхагъэр къэбгъэлъэгъон зэрэплъэкIыщтыр къыщытэIуатэх. -«Угощэ дэгъумэ, урихьы- лIагъ» зыфиIорэр икIэрыкIэу шъогъэуцужьы. ШIэхэу теплъыщта?

-Цэй Ерстэм ипьесэ техы- гъэр цIыфхэм ашIогъэшIэгъон, къыкIэлъэIух къэдгъэлъэгъонэу. Спектаклэр къызэрыкIоу щытэп. Бжыхьэм ехъулIэу Мыекъуапэ имызакъоу, адыгэ къуаджэхэми къащыдгъэлъэгъощт.

-АдыгабзэкIэ къэжъугъэ- лъэгъощтэу къызэрэтэпIуагъэм тегъэгушIо.

-Iофым лъапсэ фэхъугъэм сыкъытегущыIэ сшIоигъу. Адыгабзэм, шэн-хабзэхэм язэгъэшIэн яхьылIэгъэ зэхахьэхэм бэрэ тахэлажьэ. Республикэм иобщественнэ движениеу «Адыгэ Хасэм» итхьаматэу ЛIымыщэкъо Рэмэзан упчIэжьэгъу зысэшIым, спектаклэм игъэуцун тызэгъусэу тыдэлэжьэнэу зэ- дэтштагъэ.

-Адыгэ Хасэмрэ Камернэ музыкальнэ театрэмрэ зэгъусэхэу спектаклэ агъэуцуныр тшIогъэшIэгъон.

-Нурбый, нахьыпэкIи арэущтэу Iоф зэдэтшIэн фэягъэу сэлъытэ. Адыгэ Хасэм и Хэсашъхьэ шIэныгъэлэжь цIэрыIохэр, зэлъашIэрэ тхакIохэр, журналистхэр, щыIэныгъэр дэгъоу къызыгурыIохэрэр хэтых. Уиуз зимыузым уикъэбар къыфэоIуатэкIэ къыгурыIощтэп. Адыгэ Хасэм псынкIэу тыщызэгурыIуагъ. ЛIымыщэкъо Рэмэзан, ащ иIофшIэгъухэм тафэраз.

КъэзышIыщтхэр яIэх

-АдыгабзэкIэ спектаклэхэр къэжъугъэлъэгъонхэм шъуфэмыхьазырэу зылъытэхэрэм сыда къяпIощтыр?

-Театрэм къэкIонхэу, къэгъэлъэгъоным еплъынхэу къесэ- гъэблагъэх. Нысэмрэ гуащэмрэ зэрэзэгурымыIохэрэм, адыгэ шэн-хабзэхэм щыIэныгъэм узэрэфагъасэрэм, фэшъхьафхэм яхьылIэгъэ спектаклэр цIыфхэм ашIогъэшIэгъон зэрэхъущтым сицыхьэ телъ.

-Къэгъэлъэгъоным Iоф дэзышIэхэрэр къытаIоба. Ре- жиссерыр Сулейманов Юныс…

-Орэдышъор Адыгэ Рес- публикэм искусствэхэмкIэ изаслуженнэ IофышIэшхоу, композиторэу Хъупэ Мурат ыусыгъ. Артистхэу Кобл Зурыет, ЛIый Бэллэ, Хъубый Идар, нэмыкIхэри хэлажьэх.

-Унагъом игъэпытэн фэ- гъэхьыгъэ къэгъэлъэгъоныр къуаджэхэм къащыжъугъэлъэгъонэу къызэрэтэпIуагъэм тигъэгушIуагъ. -«Шахъомрэ пшъэшъэ пагэмрэ» пчъагъэрэ театрэм къыщыдгъэлъэгъуагъ. Спектаклэм цIыфыбэ еплъыгъ. Лъэпкъ шIэжьым, зэкъошныгъэм игъэпытэн афэгъэхьыгъэхэр тапэкIи къэдгъэлъэгъощтых.

-Хэгъэгу зэошхом ТекIоныгъэр къызыщыдахыгъэр илъэс 75-рэ зэрэхъурэм ехьылIэгъэ къэгъэлъэгъонхэм къатегущыIэба.

-Адыгэ Республикэм изаслуженнэ артистэу Виктор Марковым ытхыгъэм техыгъэу Адыгеим щыщхэм заом лIыхъужъныгъэу щызэрахьагъэм ехьылIагъэр, «Тиурам илIыхъужъхэр» зыфиIорэр, фэшъхьафхэри тирепертуар хэтых. Республикэм щыкIощт мэфэкI зэхахьэхэм тахэлэжьэщт.

-Узым тызыщыпэуцугъэ уахътэм артистхэм, театрэм иIофышIэхэм сыда анахьэу янэплъэгъу итыр?

-Жак Оффенбах ытхыгъэм техыгъэу итальянцэхэм япчыхьэзэхахьэ фэгъэхьыгъэм артистхэм Iоф дашIэ. Рольхэр къэзышIыщтхэр гъэнэфагъэх. Артистхэр яунэхэм арысхэу спектаклэм зыфагъэхьазыры. УпчIэ зиIэхэр телефонкIэ зэфытеох.

-Юныс, шъуиIофшIэн зэпыжъугъэугъэп. Шъуигухэлъ благъэхэр къытаIоба.

-Адыгэ Республикэм культурэмкIэ и Министерствэ къызэрэщытаIуагъэу, илъэсым те- лъытэгъэ мурадэу тиIэр дгъэцэкIэным тыпылъыщт.

-Шъуигухэлъхэр къыжъудэхъунхэу шъуфэтэIо.

-Тхьауегъэпсэу.