Адыгэ Республикэм кушъхьэфэчъэ спортымкIэ иеджапIэ щагъэсагъэхэм дунэе зэIукIэгъухэм зафагъэхьазыры.

Урысыем ихэшыпыкIыгъэ командэхэм ахэтых Александр Евтушенкэр, СтIашъу Мамыр, Елизавета Ошурковар. Хэгъэгум изэнэкъокъоу Санкт-Петербург щыкIуагъэм Александр Евтушенкэм ятIонэрэ чIыпIэр трекым гъогогъуищэ къыщыдихыгъ.

Шъхьэзэкъо зэнэкъокъухэм, мэфэ заулэрэ зэхащэгъэ зэнэ- къокъухэм, купхэм язэIукIэгъухэм Александр Евтушенкэм тыжьын медали 3 къащыдихыгъ.

Дунаим изэнэкъокъоу Германием щыкIуагъэм А. Евтушенкэм я 10-рэ чIыпIэр къыщихьыгъ. Ылъакъо зэрэузыгъэм къыхэкIэу зэIукIэгъум чанэу хэлэжьэн ылъэкIыгъэп.

Елизавета Ошурковам Тыркуем щызэхащэгъэ дунэе зэIукIэгъум апэрэ чIыпIэр къыщыфагъэшъошагъ. Ащ итренерэу Алексей Войновым зэри- лъытэрэмкIэ, спортсменкэхэм яIэпэIэсэныгъэ къагъэлъэгъонымкIэ зэнэкъокъур уплъэкIун дэгъу афэхъугъ.

Урысыем ихэшыпыкIыгъэ командэ хэтэу СтIашъу Мамыр Тыркуем дунэе зэIукIэгъушхоу щыкIуагъэм текIоныгъэр къызэрэщыдихыгъэм ехьылIэгъэ къэбарыр тигъэзет къыщыхэтыутыгъ. Мамыр Мыекъуапэ къызегъэзэжьым тигуапэу гущыIэгъу тызэфэхъугъагъ.

Нарт шъаом хэгъэгу, дунэе зэIукIэгъухэм ахэлэжьэнэу зызэригъэхьазырырэр къытфиIотагъ.

Республикэм кушъхьэфэчъэ спортымкIэ иеджапIэ ипащэу Анатолий Лелюк тызэрэщигъэгъозагъэу, коронавирусым къыхэкIэу зичэзыу дунэе зэIукIэгъухэр зыщыIэщтхэ мафэхэр зэблахъугъэх. Тиспортсменхэм хэушъхьафыкIыгъэу Iоф зыдашIэжьы.