КъумпIыл Мурат: «Экономикэм иIофхэр дгъэцакIэхэзэ коронавирусым ебэныгъэным фэгъэхьыгъэ упчIэхэр Iэпэдэлэл тшIыхэ хъущтэп»
Непэрэ зэхэсыгъор зэрищэзэ Адыгеим и ЛIышъхьэу КъумпIыл Мурат гъэцэкIэкIо ыкIи муниципальнэ хабзэм ипащэхэм афигъэпытагъ экономикэм ылъэныкъокIэ лъэбэкъукIэхэр ашIыхэ зыхъукIэ эпидемиологическэ чIыпIэ зэжъоу тызэрытыр къыдалъытэнэу.
АР-м и Премьер-министрэ игуадзэу Сапый Вячеслав къызэриIуагъэмкIэ, мэлылъфэгъум и 10-м къыщегъэжьагъэу АР-м и ЛIышъхьэ и Унашъо кIуачIэ иIэ хъугъэ, ащ шэпхъэ гъунапкъэхэр зытырахыжьыгъэ организациехэр къыщыIуагъэх. ПсэолъэшIынымкIэ Министерствэр зыкIэтхэжьыгъэ приказымкIэ транспорт хъызмэтшIапIэхэу ыкIи таксим икъулыкъухэу Iоф зышIэн фитхэр гъэнэфагъэхэ хъугъэх. А организациехэм шIокI имыIэу агъэцэкIэн фэе шапхъэхэри къафыхахыгъэх, ахэр зыфэгъэхьыгъэр цIыфхэм ыкIи ежь водительхэм ящынэгъончъагъэ къэухъумэгъэныр ары.
IофшIапIэмэ афэгъэхьыгъэ къэбарым зэхэсыгъом хэлажьэхэрэр щигъэгъозагъэх АР-м цIыфхэм IофшIэн ягъэгъотыгъэнымкIэ гупчэм ипащэу Галина Цыганковам. Ащ къызэрэхигъэщыгъэмкIэ, непэрэ мафэм нэбгырэ 1773-рэ IофшIэн ямыIэу учетым хэтых. IофшIэн зымыгъотыхэрэм япроцент республикэмкIэ зынэсырэр 0,9-рэ. Вакансие мини 2,7-рэ къулыкъушIапIэмэ япащэмэ къагъэлъагъо. Гъэтхапэм и 30-м къыщыублагъэу Iудзыгъэ шIыкIэм тетэу цIыфэу къяуалIэрэр нахьыбэ хъугъэ.
«Хъурэ-шIэрэм хэшIыкI дэгъу фыуиIэным фэшI экономикэм инепэрэ зытет ущыгъозэн фае. ЦIыфэу IофшIэн зымыгъотырэр, ыпкIэ рамытэу отпуск агъэкIогъэ пчъагъэр е унэм исэу Iоф зышIэхэрэр, а зэкIэ зыфэдизым тыщыгъозэным мэхьанэшхо иIэу щыт. Ар тшIэ хъумэ, отраслэхэм тазэрэдэлэжьэщт шIыкIэр нахь тэрэзэу къыдгурыIощт», — къыкIигъэтхъыгъ КъумпIыл Мурат.
ПсэупIэ-коммунальнэ хъызмэтым иIофхэр гъэцэкIэгъэнхэм, псэупIэхэм язэIухын, унэ чIэхьапIэхэр, урамхэр гъэкъэбзэгъэнхэр непэрэ Iофыгъо шъхьаIэмэ зэращыщхэр зэхэсыгъом хэлажьэрэмэ АР-м и ЛIышъхьэ къариIуагъ. Электричествэм, псы Iофмэ апылъхэм, гъэстыныпхъэ шхъуантIэм дэлажьэрэмэ алъыплъэнхэ ыкIи ауплъэкIухэзэ ашIын зэрэфаер къыкIигъэтхъыгъ. Ащ дакIоу нэмыкI шъолъырхэр коронавирусым зэребэнхэрэ шIыкIэр хэбзэ къулыкъухэм зэрагъэшIэнышъ къыкIэлъыкIощт Оперативнэ штабым япредложениехэр къыхалъхьанхэу ЛIышъхьэр къяджагъ.