Урысыем, Адыгеим янароднэ артистэу, Аб­хъазым изаслуженнэ артистэу Кукэнэ Мурат иеплъыкIэхэр щыIэныгъэм къыпкъырэкIых.

— Джырэ уахътэ Тэхъутэмыкъуае сыщыI, — къеIуатэ зэлъа­шIэрэ артистым. — Спектаклэхэм сахэлэжьэнэу, орэд къэс­Iонэу хъугорэп. Коронавирусым тиIофхэр зэпигъэугъэх. Бэ темышIэу узым тытекIощтэу, цIыф­хэр зэфэнэгушIохэу тиурамхэм къатехьажьыщтхэу сэгугъэ. Концертхэм, спектаклэхэм та­щызэIукIэщт, тигухэлъхэр къызэфэтIотэщтых.

Фильмэу тырахыщтым хэлэжьэнэу Кукэнэ Мурат зигъэхьазырыщтыгъ. ОшIэ-дэмышIэу дунаир зэлъызыкIугъэ узым артист цIэрыIом иIофхэр зэпигъэугъэх.

Кукэнэ Мурат ыгу ыгъэкIодырэп, дискым тетхэгъэ спектаклэмкIэ цIыфхэм адэгущыIэ. «Псэ­лъыхъохэм» еплъыгъэхэм къызэрэтаIуагъэу, Зыхьэ Заурбыйрэ Кукэнэ Муратрэ ярольхэр дэгъу дэдэу къашIы, дунэе классикэм хэхьагъэхэу алъытэ.