Къагъотыгъэр къаратыжьыгъ
Мэфэ заулэкIэ узэкIэIэбэжьмэ, Шъачэ пэблэгъэ мэзым тарихъым епхыгъэ пкъыгъо гъэшIэгъон къыщагъотыгъ.
Джэрзым хэшIыкIыгъэ пкъыгъор блэм фэдэу шIыгъэ. Ащ ыцыпэхэр блашъхьэм ехьщырых. Зы лъэныкъор нахь гъумэу гъэпсыгъэ, ятIонэрэ цыпэр хэпшIыкIэу нахь псыгъоу щыт.
— ИнэшанэкIэ пкъыгъор адыгэ IэшIагъэхэм адештэ, — къытиIуагъ зэлъашIэрэ археологэу, Адыгэ Республикэм культурэмкIэ изаслуженнэ IофышIэу Тэу Аслъан. — Тарихъ пкъыгъор нарт къэбархэм ащыщ. Блашъхьэхэр къыхэтэгъэщых. Щэнаутыблэхэм яхьылIэгъэ нарт къэбархэр гъэшIэгъоных, щыIэныгъэм епхыгъэх. Адыгэмэ агъэлъэпIэрэ псэушъхьэхэм блэр ахалъытэзэ, зэгъэпшэнхэр ашIыщтыгъэх.
Мэзым къыщагъотыгъэ пкъыгъор фэIо-фашIэхэр тилъэпкъэгъухэм зэрагъэцакIэщтыгъэхэм ахалъытэ. Илъэс мини 2 — 3 ыныбжьэу къэлъагъо.
Къэзэкъ хъулъфыгъэм ошIэ- дэмышIэу пкъыгъор мэзым къызыщегъотым, зыдихьыщтыр ымышIэу икIалэ упчIэжьэгъу ышIыгъ. Ятэрэ ыкъорэ зэдэгущыIэхи, кIалэм къыIуагъэм тетэу псэугъэх.
— Пкъыгъор адыгэмэ яй, ятэгъэтыжь зиехэм, — къыIуагъ кIалэм.
Ятэрэ ыкъорэ зэдашти, гъунэгъу адыгэ къуаджэм кIуагъэх, тарихъ пкъыгъор тилъэпкъэгъухэм къаратыжьыгъ.
Къэзэкъ унагъор зыщыщ лIакъом ыцIэ къетIогорэп. ЯшIушIагъэ къыхэдгъэщызэ, яти, ыкъуи гъэзетымкIэ «тхьашъуегъэпсэу» ятIожьы тшIоигъу.