Хэгъэгум футболымкIэ ихэшыпыкIыгъэ командэ ныбджэгъу зэIукIэгъухэм зафегъэхьазыры.

Тренер шъхьаIэу Станислав Черчесовым къызэриIуагъэмкIэ, ешIакIохэм ясэнаущыгъэ изытет уигъэрэзэнэу щыт. Сымаджэ ахэтэп.

Коронавирусым къыхэкIэу ныбджэгъу уплъэкIун ешIэгъухэр гъэтхапэм тикомандэ иIагъэхэп. Европэм изэнэкъокъу 2020-рэ илъэсым зэхащэщтэп.

Урысыем изэнэкъокъу зырагъэ­жьэжьыкIэ анахь дэгъоу ешIэхэрэр хэшыпыкIыгъэ командэм къырагъэблэгъэщтых. Артем Дзюбэ, Юрий Газинскэм, нэмыкIхэм яшъыпкъэу загъэхьазыры. «Шъа­чэ» иешIакIоу Александр Кокориным гуетыныгъэ ин хэлъэу Iоф зыдешIэжьы, Урысыем ихэшыпыкIыгъэ командэ аштэщтэу мэгугъэ.

Зэкъошныгъэм имафэхэр

Мыекъуапэ ифутбол командэу «Зэкъошныгъэм» мэлылъфэгъу мазэм и 10-м нэс ешIэгъу иIэщтэп.

Тренер шъхьаIэу, Адыгэ Рес­публикэм изаслуженнэ тренерэу Ешыгоо Сэфэрбый тызэрэщигъэ­гъозагъэмкIэ, хэгъэгум изэнэ­къокъу зэрэзэпагъэугъэм къы­хэкIэу ешIакIохэр зэбгырагъэкIыгъэх, ядэжьхэм агъэкIожьыгъэх.

— Нэбгырэ пэпчъ «Зэкъошныгъэм» зэрэщешIэщтыр, чIыпIэу зыдэщытыщтыр къыдэслъытэхи, зэнэкъокъум зыфигъэхьазырынэу пшъэрылъ фэсшIыгъ, — къыти­Iуагъ Ешыгоо Сэфэрбый. – ТелефонкIэ тызэфытео, амалэу щыIэр нахьышIоу зэрэдгъэфедэщтым тыпылъ. Хэгъэгум икомандэ заулэмэ заугъоижьынэу рагъэ­жьагъ, тэ тыгуIэщтэп, Урысыем футболымкIэ и Союз унашъоу щырахъухьащтым тежэщт.

Зэнэкъокъум къырыкIощтыр къэшIэгъуае. Командэхэр ешIэгъухэм ахэмылажьэхэу охътэ бащэ зытешIэкIэ, футболистхэм яIэпэIэсэныгъэ къеIыхыщт. Ар къыдалъытэзэ, зэхэщакIохэр коронавирусым пэуцух, цIыфхэм япсауныгъэ къызэраухъумэщтым пылъых.

Футболыр зыгу рихьыхэрэр стадионым дамыгъахьэхэу зэнэ­къокъур гъэшIэгъон хъущтэп.

Къыхэтыутыщтыр зытэгъэхьазырым

Ешыгоо Сэфэрбый къытфиIотагъэр къыхэтыутынэу зытэгъэ­хьазырым ыуж Урысыем футболымкIэ и Союз игъэцэкIэкIо куп зэIукIэгъу иIагъ. Ащ щаштэгъэ унашъом къыщеIо жъоныгъокIэ мазэм и 31-м нэс хэгъэгум футбо­лымкIэ изэнэкъокъу зэрэзэпагъэугъэр.