Гъэрыным емызэгъыгъэр
Сятэу Уайкъокъо Щухьаиб ГуIэтыжь ыкъом ыцIэкIэ стхыгъэ
Поэм
Дунаир мэкъутэжьы:
Заор макIо.
Пыир лъэшышъ,
МашIор къырегъэкIы.
ТизэолIхэр къэщтагъэхэкIэ
Арэп.
Щэгыныр макIэ.
ЛъэкIэу яIэм ащ къыщегъакIэ.
Зым зыр ыуж итэу ахэр
Щэ шIуцIэм ехьых.
Пый мэхъаджэм
Еожьынхэ алъэкIрэп.
Къауцухьэхэшъы,
Гъэры ашIых.
Къэнагъэхэр апси фэежьхэп.
УIагъэхэр агу еIэжьых.
***
Нэмыц гъэр IыгъыпIэм,
Егъэзыгъэу афых.
Ащ фэдэ чIыпIэм
КъыщыфашIырэп шъхьэкIафэ.
Сыд фэдизэ ахэр
ЕIэжьыгъэха апсэ?
КIымафи, гъэмафи
Яшхыныгъэр хьантхъупс.
Уз Iэе зэпыхыр
Къыхэхьажьы Iофым.
ЛIэхэрэр амыгъэтIылъыжьхэу,
Щагъэстыжьых шъофым.
Адыгэгум гъэрыныр
Ыштэнэу ыдагъэп.
Гъэбылъыгъэ IофкIэ
Тятэ къыхэхьажьы.
Ар хьадэгъу чIыпIэм
КъекIыжьышъ, къэкIожьы.
КъэпIотэжьы хъуми,
Къыпщыхъурэп псынкIэ,
БгъэцэкIэнэу уфежьэмэ,
Къинышхо къыпэкIы.
Зэо гъогур кIыхьэ:
Къинышху урыкIонкIэ.
Уичылэ плъэгъужьыныр
Лъытэ насып инкIэ.
***
Хьазабэу пэкIэкIыгъэр
Алахьым къелъэгъу.
ТэкIу-шъокIу гори
Хабзэм къыфегъэгъу.
Заом тятэ Iохьажьы.
Къаухыфэ къэты.
Инасып къехьышъ,
Хъурэп ар сэкъаты.
Пкъыр псауми, гур уIагъэ –
Бэба ыщыIагъэр!
***
Мамыр щыIакIэм
Хэгъэгур техьажьы.
Ау щыгъыныр макIэ.
КъыхэкIы лIэхэу мэлакIэ.
Ay мафэ къэс нахьышIу мэхъу:
Хэхъо цIыфхэм ящыIакIэ.
Тяти инасып къычIэкIы.
Унагъо ешIэ. Сабыйхэр къэхъух.
Тяти тяни щэлажьэх
Чылэм дэтыгъэ колхозым.
Тшыпхъоу къэхъугъэр тIехыжьы
КъыфэкIогъэ узым.
Сабый дэдагъ Iубыжъыер
Фэдагъ мэлэIичым.
Тяти, тяни агъэшIэщтым
А къиным илъэсыбэ хехы.
ГъэшIэ пыеу иI
ЦIыфы цIыкIум Псэхэхыр.
ЗэкIэри хъурэп
О зэрэзэбгъафэу.
УедэIумэ аIоба ефэндхэм
Мы дунаир хьафэу.
***
КъыгъэшIагъэм
Ешъуагъэп тятэ,
Ыгъэстыгъэп тутыни.
ИкIэсагъ пчыхьэшъхьапэм,
Есэу, хэсынэу Псэкъупсэ.
ИIагъ ныбджэгъубэ.
Адыпэсыгъ Iанэм.
Шхын зэхэдз иIагъэп.
Ишэныгъэп ныбэр ыубэу,
Мыхьамелым зыхиуIубэу.
ШэнышIугъ,
Хэлъыгъ шъэбагъэ.
Чэм щыс ыгъэтэджыгъэп.
Имыем IапэкIэ нэсыгъэп.
Зыми ыгу хигъэкIыгъэп.
Лъэпкъ зэхэдз имыIэу
Тигъэсагъ, ежь тыфэдэу.
ЩыIагъ гущыIэ дыси ымыIоу,
ЗэкIэ цIыфхэр изэфэдэу.
***
ЗымкIэ дунаир кIако,
АдрэмкIэ кIыхьэ.
Хэти гъогоу къыкIущтыр
ЫIэ илъ Алахьым.
СшынахьыкIэ хэкIуадэ
Машинэ зэутэкI бэлахьым.
Зэрэунагъоу къиным
Тыгухэр егъэкIоды.
— ЦIыфмэ къямыхъулIагъэ, ныо,
ПIо хъущтэп тэ къытфэкIуагъэу, —
Тятэ pelo, гъэу щысы тянэ.
Къызхигъэфагъ ащ лIыгъэ.
Ау ынэгу кIэолъагъо
Ыгу тыркъо зэрэфэхъугъэр.
***
Тян, сшыпхъу, сшынахьыкI
Сэри ахэм сахэтэу
Мыинэу илъэкI
Тыкъыфэнэ тятэ.
Къэсыгъ еджапIэм тыкIонэу.
ТыдэтIысхьэ партым.
Сыпылъыгъэп спортым.
ГъашIэм сешIагъэп карти.
Еджэныр арыгъэ
Тшъхьэхэм арылъыгъэр.
Сшыпхъурэ сэрырэ
Тызфаер къыддэхъу:
Институтыр къэтэухы,
КIэлэегъаджэ тэхъу.
***
Уахътэм иIэп зэплъэкI.
Ренэу макIо ыпэкIэ.
ЫшIагъэр къызэренэкIы.
Пшъырэп зыгорэм фэгумэкIэу.
ЦIыф цIыкIур ары
ХэмыкIрэр гумэкIым.
Чэщи мафи мэлажьэ
Тиунагъо зэрилъэкIэу.
Сшъхьэ къисэгъэхьажьы
Тятэ игукъэкIыжьхэр...
ЩыриIагъ тятэ къалэм благъэ.
Заом нэIуасэ щыфэхъугъэу.
Къин бэдэдэ зэдалъэгъугъэу.
Бэ къытэкIыгъэр ишIуагъэу
А урыс бзылъфыгъэм.
***
Гъэтхэпэ гъуй-сый.
Шхын-шкъуныр макIэ.
Сыгу егъэузы
Тятэ игуIакIэ.
Щагум дэлъыжьэп
Зы мэкъуи, къури.
Бгъэныр къырехьыхы
Къакъырашъхьэм.
Джар чэм закъом
Ретышъы регъэшхы.
***
Мэкъуогъу маф.
Фабэм узэрегъэкIокIы.
Аргъэн рихьыхы къэс,
ПкIантIэ къытырекIэ.
Тятэ зэхимышIэзэ,
ХэкIы цIэлъэкIыр.
ЫкIоцI ристыкIызэ,
Ар къызэхэфэ.
Ины Алахьым
ИIэ гукIэгъур.
Мычыжьэу мэкъум
Еошъ, щыт гъунэгъур.
Гырз макъэу къэIурэм
Ар къекIу гуIэзэ.
Ку къызэрегъэгъотышъ,
Тятэ къещэжьы чылэм.
Машинэм рагъэгъуалъхьэшъ,
Ащэ сымэджэщым.
Къин зэпымычыр ещыIэ,
АщкIэ Алахьыр
ЫнэшIукIэ къыдеIэ.
Ынэгу хъугъэ оды.
Ышъо хъугъэ пIуакIэ.
Ащ ыгу ыгъэкIодэу
КъекIугъэп зы мафэ.
Ихыягъэ паекIэ
КъыфашIыщтыгъ шъхьэкIафэ.
МакIо исымэджэ уахътэ.
Къытехьажьы ышъо тятэ.
Колхоз Iофхэм афежьэжьы.
Жьэу пчэдыжьым къэтэджы.
Трудоденьхэр ащ пае фатхых.
Ау къыкIакIорэр макIэ.
***
Бэдзэогъу, дунаир мэсты.
Тыгъэм зешIы
Минишъэ мастэ.
Жьаур хъугъэ
ШъхьэегъэзыпIэ.
Шъофым итыр ары
Егъэзыгъапэр.
Коцыр Iуехыжьы тятэ.
Ар тесэу косилкэм
Къыхэщыжьырэп сапэм.
УкIэрытэу уеплъми,
ПшIэжьынэп ынапэ.
Илъэсыбэ джаущтэу макIо.
ЩыIэныгъэр
ЫкIэм фэкIо.
Пенсием иуахътэ къэсы.
МакIэ къырапэсрэр.
***
Мэфэ закъуи зигъэпсэфынэу
КъэсшIэжьрэп уахътэ къекIугъэу.
Лъфыгъэхэр къыIэтынхэу
Ары иIагъэр гъэшIэ гугъэу.
Дысэу зэ къыддэгущыIагъэп,
ЬIIапи къыттырищэягъэп.
Тыкъэхъугъ зэхэтхызэ гъэшIуабзэр.