Ыпсэ ифабэкIэ ыгъэшIуагъэр илъэпкъ
«ЦIыфыр зыкIыщыIэр ер ыгъэкIодыныр, шIур ыгъэбэгъоныр ары». Жэнэ Къырымыз.
ЗэлъашIэрэ усакIоу Жэнэ Къырымызэ мы усэ сатыр закъомкIэ хэтрэ нэбгыри, ежь ышъхьэкIи пшъэрылъ инэу иIэр кIигъэтхъыгъ. Уегупшысэмэ, пфэлъэкIырэмкIэ хэти удеIэныр, зэхэпшIыкIыныр, анахьэу уиягъэ емыгъэкIыныр, ощ фэдэм лъэхъу емыдзыныр, уемышъугъуныр, ау амал зэриIэкIэ, ыгу къыдэпщэеныр цIыфыгъэ-къэбзагъэм щыщ. Нэпэ къабзэм, къэрарым цIыфыр лъэпытэ ешIых, пстэуми къахегъэщы.
УсакIоу, орэдусэу, тхакIоу, журналистэу, общественнэ IофшIэкIошхуагъэу Жэнэ Къырымызэ щыIэныгъэр, къешIэкIыгъэ дунэе дахэр, Родинэр, цIыфхэр – жъи, кIи, кIэлэцIыкIухэри гъунэнчъэу икIэсагъэх, илъэпIагъэх. Ипоэзие – иусэ сатыр блэрхэм зэфэдэкIэ игукIэгъу- шIулъэгъу ахэгощагъ. Къыщежьагъ а гузэхэшIэ лъэшыр икъуаджэу Афыпсыпэ, янэ-ятэхэм ячыиф унэу тхъагъор зэрызыгъэм, лэжьэкIо мыпшъыжьхэм яхъупхъэгъэ-зэфагъи, яхьалэлыгъи, нахьыжъхэм, акъылышIохэм яшэн-зекIуакIи, ягущыIэ шIыкIи, яшъхьэкIэфэ- лъытэныгъи ылъэгъугъ ыкIи зэхихыгъ, джащыгъум, гу лъимытапэу мо кIалэм, ыбгъэ гукIэгъу-шъэбагъэр, фэбагъэр игъорыгъоу къыщытIэмыгъ. Iофыр икIасэу, еджэныр игуапэу, цIыф пстэури ыгукIэ ыштэу, гущыIэр шIокъабылэу къэтэджыгъ Къырымызэ. ЗэгурыIо-зэрэлъытэ, щэIэгъэ-зэфагъэ хэткIи пхэлъын зэрэфаер исабыигъо-кIэлэгъум иунагъо щызэхишIагъ, етIанэ а зэкIэ еджэгъу лъэхъаным ащигъэпытагъ. Адыгэ педтехникумым, Адыгэ кIэлэегъэджэ институтым, етIанэ 1957 – 1959-рэ илъэсхэм М. Горькэм ыцIэ зыхьырэ Литературнэ институтым и Апшъэрэ литературнэ курсхэм ащеджагъ.
Хэгъэгу зэошхор къызежьэм, иныбжьыкIэгъу-гушхуагъэ ыпэ итэу ащ кIуагъэ, заом хэлэжьагъ, ащ ихьазаб Iае ылъэгъугъ, ынэ лъэныкъо хилъхьагъ, ныбджэгъу гупсэу къыготыгъэ Андырхъое Хъусенэ фашист пыижъмэ якIодылIагъ, ау Хъусенэ кIэлэкIагъэми, лIым ыкIоцI лIы итыгъ, изакъоу Iуашъхьэм къытени, пый дзэкIолI купэу къэзыухъурэигъэм фырикъугъ. КъыIэкIэнэжьыгъэ гранатитIур пытэу зыIэкIиубытэзэ, нэмыц хъункIакIохэм афилъэдэкъыкIыгъ ыпкъынэ-лынэ пэпчъкIэ ипытэгъэ-лъэшыгъэ къыхэщэу. «Зыкъэт, урыс!» – къызыраIом, – «Русские не сдаются!» ари-Iуагъ, благъэу къызекIуалIэхэм яфэшъуашэ ышIэу гранатэр ахидзагъ, ежьыми ыпсэ ыгъэтIылъыгъ. Ныбджэгъу-шъэогъум лIыхъужъныгъэшхоу зэрихьагъэр игъэкIотыгъэу Жэнэ Къырымызэ Хъусенэ фэгъэхьыгъэ орэдымкIэ, художественнэ-документальнэ повестэу «Андырхъое Хъусен» зыфиIорэмкIэ къыриIотыкIыгъэх. Ныбджэгъоу зэошхом батырэу зыпсэ щызыгъэтIылъыгъэм фэзафэу, зэоужым, Хъусенэ ежь щыIэзэ, къыдигъэкIынэу тхылъ игъо фимыфагъэми, Жэнэ Къырымызэ гъэзетхэм, журналхэм къащыхаутыгъэхэр зэригъэуIужьхи, «Сэ сиорэд» ыцIэу 1946-рэ илъэсым Андырхъуаем итхылъ апэрэу къыдигъэкIыгъ. Ар цIыфыгъэ иным ищысэ дэд. Ащ ыужым Хъусенэ иусэхэр заулэрэ къыдэкIыгъэх: «Орэд къэсIощт» (1971), «Сыпсаоу сышъулъыт» (адыгабзэкIи урысыбзэкIи зэголъэу, 1976).
Жэнэ Къырымызэ ытхыхэрэр 1935-рэ илъэсым къыщегъэжьагъэу къыхиутыщтыгъэх. Заом ыпэкIи, зэо лъэхъанми, зэо ужыми ахэр гъэзетэу «Колхоз быракъым», ыужым «Социалистическэ Адыгеим» – усэхэр, очеркхэр, репортажхэр, публицистическэ статьяхэр зэпымыоу къарыхьэщтыгъэх.
Зэо ужым иусэхэр, поэмэхэр, повестьхэр адэтхэу тхылъхэр къыдигъэкIыгъэх: «Стиххэр», (1945), «Тимафэхэр», «Жъогъо Плъыжь», «О унитIу», «Ытхыгъэмэ ащыщхэр», нэмыкIхэри. Жанэм итхылъхэр урысыбзэкIи Мыекъуапэ, Москва къащыдэкIыгъэх. Ахэр пчъагъэмкIэ 25-рэ фэдиз мэхъух, илъэсипшI пчъагъэу творчествэм зыфэгъэзэгъагъэм ытхыгъэх.
Жэнэ Къырымызэ зэ нахь мышIэми зылъэгъугъэу е зышIэщтыгъэм, цIыф зэтет гушIубзыу дэхэIуалэу, шъыпкъаIоу ары ыгу къызэринагъэр. Ытхыхэрэм, орэдхэу ыусыгъэхэм цIыфхэр лъэшэу агъэразэхэу яджэщтыгъэх, иорэдхэр непи лъэпкъым егъэжъынчых.
Къырымызэ иусэ сатырхэм ащигъэшIуагъэр иадыгэ лъэпкъ: ишэн-хабзэхэр, игъэпсыкIэ-шIыкI, иIофшIакI, икъэрар, инасып дах. ТичIыопс идэхэгъэ-хьалэмэт, тицIыф шIагъохэм ядунэететыкIэ, ным, тым яшIушIэ ин, нахьыжъ губзыгъэхэм яакъыл псыхьагъэ, ныбжьыкIэхэм ячаныгъэ псэемыблэжьныгъэ, ищыкIагъэ зэхъум, ахэм чэтэ чIэгъым «Нан!» зэрэщамыIуагъэр, лIыр лIэу къызэрыхъурэр игупшысэ купкIыгъэх. Ным илъэпIэгъэ-IэшIугъэ пэпшIын гори зэрэщымыIэр, гъэтхэ мэфэ дахэу – шIулъэгъур, тхъагъор, мамырныгъэр, ТекIоныгъэр цIыфлъэпкъым сыдигъуи зэрищыкIагъэхэр иусэ сатырхэм фэкъулаеу апхырищыгъэх: «ЦIыфыбэмэ шIу сарэлъэгъуи, цIыфыбэмэ цыхьэ къысфарэшIи, мы дунэе мылъкум ыпэ къэсэштэ» – еIо усакIом. Ащ фэдэ хъуапсэу иIэр Къырымызэ зэкIэ игупшысэ зэгъэфагъэкIэ къыушыхьатыгъ. Гум ифаби, псэм идахи ашъхьасыгъэп адыгэ лъэпкъым ыцIэ ыIэтынымкIэ, Ным иорэд дахэу ыусыгъэр адыгэхэм ямызакъоу, хэтрэ цIыф лъэпкъи зэкIэдэIукIхэзэ къызэдаIо.
ЦIыфым икъежьапIэри, ыпсэри, ышъори нэу къэзылъфыгъэр арба, ащ шъхьащэ фешIы УсакIом:
…Мы дунаир сфэмыхъужьэу Сянэ дэжьы сыкъекIыжьы, Ным нахь IэшIу сэ зи сымышIи, Ар слъэгъуфэ сшIуабэ машIэ. (н.53-рэ) * * * …Синанэу, синэнэ дах! Дунаир сфэогъэдах, Насыпыр о къысэптыгъ, Дунаир къысфыхэпхыгъ… «Синан»
Къырымызэ ытхыгъэх лъэпкъым дыщыIэщтхэ усэ-орэдхэу лъагэу зызыIэтыгъэхэр: «Хэбзэ дахэу тэ тиIэр джащ фэд», «ЕтIэ Iэбжыб», «ЦIыфыIэмэ яорэд», бзылъфыгъэхэм ацIэкIэ къэIогъэ усэ-гимнэу «Дунаим идахэ бзылъфыгъэр игъундж», «О унитIу» — шIулъэгъум ухэтми уригъэIэтэу, нэмыкIхэри.
ТхакIом къыгъэшIагъэр илъэс 64-рэ ныIэп, ау пэкIэкIыгъэу ыщэчыгъэр ыкIи фэукIочIыгъэр бэдэд: дзэкIолI-фронтовикыгъ, тхэкIуагъ, усэкIуагъ ыкIи мамырныгъэм ибэнэкIо шъыпкъагъ. Ытхыгъэхэм ар нафэ къыпфашIы, гушъхьэлэжьыгъэ бай къыгъэнагъ.
2019-рэ илъэсэу икIыгъэм адыгэ тхэкIо нахьыжъхэм ащыщэу Жэнэ Къырымызэ Хьаджымосэ ыкъор къызыхъугъэр илъэси 100 хъугъэ. Мы мэфэкIым епхыгъэ Iофтхьэбзэ зэфэшъхьафхэу Жанэм ищыIэныгъэ ыкIи итворчествэ къизыIотыкIыхэрэр зэфэдэкIэ Адыгеим ыкIи Мыекъуапэ ащыкIуагъэх, усакIом итворчествэ илъэшыгъэ, игущыIэ фэшъыпкъэу къини гушIуагъуи иадыгэ лъэпкъ дищэчэу, итхэн-усэн ыгъэжъынчэу, цIыфым игуапэ ышIэу зэрэщыIагъэр кIагъэтхъыгъ. Лъэпкъым итхэкIо нахьыжъэу Жэнэ Къырымызэ къызыхъугъэр илъэси 100 зэрэхъугъэм ипэгъокIэу «ХэшыпыкIыгъэ тхыгъэхэр» зыфиIорэри Адыгэ Республикэм итхылъ тедзапIэ къыщытырадзагъ. Ащ къыдэхьагъэх усэхэр, орэдхэр, юморымрэ сатырэмрэ ыкIи кIэлэцIыкIухэм апае ытхыгъэхэр. Жэнэ Къырымызэ итворчествэ, адыгэ гупшысэм нахь апэблагъэ зыпшIынымкIэ тхылъыкIэм ухэтми ишIуагъэ къыокIыщт, уцIыфыным къикIырэр ыкIи ащ узэрэфэкIощтыр, адыгэр зыфэдэр, лъэпкъ шъхьэлъытэжьыр къызыщежьэрэр, уигъашIэ зэрэбгъэдэхэщтыр, узфэсакъыжьэу ущыIэмэ, лъэуж нэф чIым къызэрэтенэщтыр, адыгэ лъэпкъым ыпси зэрэмыкIодыщтыр къыщыIуагъ.
Жэнэ Къырымызэ и «ХэшыпыкIыгъэ тхыгъэхэм» лъэпэ мафэ адзынэу, тыбзэ пытэнэу, тицIыфыгъэ лъэгэнэу, усакIом ыцIи тщымыгъупшэнэу тэлъаIо.
Мамырыкъо Нуриет.