Адыгэхэм яижъырэ псэупIэу Шъачэ ифутбол командэу «Шъачэм» игъэхъагъэхэмкIэ тегъэгушIо.

Апшъэрэ купым щешIэзэ, аужырэ зэIукIэгъуищмэ текIоныгъэр къащыдихыгъ. Тренер шъхьаIэу Владимир Федотовыр Урысыем итренер анахь дэгъоу гъэтхэпэ мазэм къыхахыгъ.

«Шъачэм» бэмышIэу аштэгъэ Александр Кокориным ешIэкIо анахь дэгъоу ыцIэ къыраIуагъ. Ащ гъогогъуи 3 къэлапчъэм Iэгуаор дидзагъ, иIэпэIэсэныгъэкIэ ешIакIохэм къахэщыгъ.

Апшъэрэ купым аужырэ чIыпIэр щызыIыгъыгъэ «Шъачъэ» я 11-рэ чIыпIэм къэсыгъ. Я 15 – 16-рэ чIыпIэхэр къыдэзыхыхэрэр апшъэрэ купым занкIэу къыхагъэкIыщтых.

«Шъачъэр» ыпэкIэ лъэкIуатэми, гумэкIыгъо имыIэу тлъытэрэп. Александр Кокориныр «Локомотив» Москва рагъэблагъэ. Хэта ешIэкIо цIэрыIор зэблэзыхъущтыр?

2019 – 2020-рэ илъэс ешIэгъум «Шъачэм» зэIукIэгъуи 8 къыфэнагъ, чIыпIэу къыдихын ылъэкIыщтыр къэшIэгъуае.