Программэм игъэцэкIэн амалышIухэр къытыщтых
Шъолъырым социальнэ-экономикэ хэхъоныгъэ ышIыным иунэе программэ фэгъэхьыгъэ Iофыгъохэм зыщатегущыIэгъэхэ зэхэсыгъом хэлэжьагъ Адыгэ Республикэм и ЛIышъхьэу КъумпIыл Мурат. Видеоселектор шIыкIэм тетэу кIогъэ Iофтхьабзэр зэрищагъ Урысыем и Правительствэ и Аппарат ипащэ игуадзэу Валерий Сидоренкэм. 
Зэхэсыгъом иIофшIэн хэлэжьагъэх Адыгеим и Премьер-министрэу Александр Наролиныр, экономикэм, псэолъэшIыным, мэкъумэщ хъызмэтым, чIыопс къэкIуапIэхэм, энергетикэм ыкIи зекIоным яIофыгъохэм афэгъэзэгъэ федеральнэ министерствэхэм ыкIи ведомствэхэм япащэхэм ягуадзэхэр.
КъызэраIуагъэмкIэ, Адыгеим социальнэ-экономикэ хэхъоныгъэ ышIынымкIэ унэе программэм Iофтхьэбзэ 30 къыдыхэлъытагъ. ИнвестициехэмкIэ шъолъырыр джыри нахь хъопсагъоу хъуным, лъэныкъо зэфэшъхьафхэмкIэ хэхъоныгъэхэр ышIынхэм ахэр афытегъэпсыхьагъэх. Федеральнэ гупчэм къикIыщт мылъкур сомэ миллиарди 5-м ехъу.
Адыгем и ЛIышъхьэ къызэрэхигъэщыгъэмкIэ, шъолъырым хэхъоныгъэ ышIынымкIэ ищыкIэгъэ пстэури программэм къыдыхэлъытагъ: инфраструктурэм ылъэныкъокIэ пэрыохъухэр дэгъэзыжьыгъэнхэр, предпринимательствэ цIыкIум ыкIи гурытым хэщагъэхэм амалэу аIэкIэлъхэр нахьышIу шIыгъэныр, псауныгъэр къэухъумэгъэнымкIэ, культурэмкIэ ыкIи спортымкIэ цIыфхэм афагъэцэкIэрэ фэIо-фашIэхэр шэпхъэшIухэм адиштэнхэр.
Энергетикэм иинфраструктурэ хэхъоныгъэ ышIыным иIофыгъо шъхьафэу тегущыIагъэх. ПАО-у «Кубаньэнерго» зыфиIорэм иподстанцие 58-м щыщэу IэпэчIэгъэнэ (резерв) тIэкIу зиIэр 14-р ары ныIэп.
— Энергетическэ комплексым иинфраструктурэ зиушъомбгъуным къыдыхэлъытэгъэ Iофтхьабзэхэр зэрифэшъуашэу зыдгъэцакIэхэкIэ, бизнесым, социальнэ лъэныкъом, псэолъэшIыным яобъектхэм хэхъоныгъэ ашIынымкIэ амалэу аIэкIэлъхэм ахэхъощт. ЭлектроэнергиемкIэ кIуачIэхэм захэдгъахъокIэ, инвестиционнэ проектыбэхэр щыIэныгъэм щыпхырыщыгъэхэ хъущт, зекIоным хэхъоныгъэ ышIыным ар фэIорышIэщт, — къыIуагъ КъумпIыл Мурат.
Сабыибэ зэрыс унагъохэм псэупIэхэр ашIынхэм фэшI къаратыгъэ чIыгу Iахьхэм инженернэ инфраструктурэр ащыгъэпсыгъэныр унэе программэм къыдыхэлъытагъ. ЦIыфхэм яфэIо-фашIэхэр шэпхъэшIухэм адиштэу зэшIохыгъэнхэр ары анахь шъхьаIэр.
Адыгэ Республикэм и ЛIышъхьэ ипресс-къулыкъу.