Хэгъэгум каратэмкIэ изэнэкъокъу дышъэр къыщызыхьыгъэ Пако Алихъан Адыгэ республикэ гимназием ия 6-рэ класс щеджэ.

Илъэсищ хъугъэу Пако Али­хъан каратэм зыфегъасэ. Къыблэм изэнэкъокъу апэрэ чIыпIэр къыщыфагъэшъошагъ. КъокIыпIэм къыщежьэгъэ спорт лъэпкъхэр шIогъэшIэгъоных. Каратэм, панкратионым, ушум апыщагъэу нарт шъаор зэIукIэгъухэм ахэлэжьагъ. Медалэу къыдихыгъэм ипчъагъэ ешIэ шъхьае, игъэкIотыгъэу къатегущыIэрэп. Къызыщытхъужьыныр, иныбджэгъухэм затыриIэтыкIыныр ишэнхэп.

Зэхэпхъэгъэ спорт лъэпкъ зэнэкъокъухэм ахэлэжьэныр ыгу рехьы. Алихъан зэрилъытэрэмкIэ, псауныгъэр ыгъэпытэнымкIэ, кIуачIэр ыпсыхьанымкIэ зэIукIэгъу зэфэшъхьафхэм защеуплъэкIу.

Урысыем каратэмкIэ изэнэ­къокъоу Москва щыкIуагъэм Пако Алихъан IэпэIэсэныгъэу къыщигъэлъэгъуагъэм спортым хэшIыкI фызиIэхэм мэхьэнэ ин ратыгъ. — Пако Алихъан зэIукIэгъуи 4 бэнэпIэ алырэгъум щыриIагъ, — къеIуатэ Урысыем каратэмкIэ и Федерацие икъутамэу Адыгэ Республикэм щыIэм ипащэу, А. Паком итренерэу Владимир Васильченкэм.

Москва щыщ кIэлэеджакIом, Липецкэ ыкIи Кемеровэ къарыкIыгъэхэм А. Пакор атекIуи, дышъэм фэбэнэнымкIэ фитыныгъэ иIэ хъугъэ. Къырым испортсменэу хэгъэгум изэIукIэгъухэм медальхэр къащызыхьыгъэм Алихъан енэкъокъузэ, кIуачIэу, сэнаущыгъэу хэлъыр къыгъэлъэгъуагъэх. Нарт шъаом дышъэр къызыфа­гъэшъуашэм, хэгъэгум ишъолъыр пчъагъэхэм къарыкIыгъэхэр къы­фэгушIуагъэх.

А. Пакор Москва кIоным ыпэкIэ Шъачэ каратэмкIэ щызэхащэгъэ зэнэкъокъум апэрэ чIыпIэр къыщыдихыгъ. Москва, Ростов хэкум, Донецкэ Народнэ Республикэм, Шъачэ, Адыгеим, фэшъхьафхэм якIэлэеджакIохэр зэIукIэгъухэм ахэлэжьагъэх.

Дзюдор шIогъэшIэгъон

Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм Пако Алихъан иухьазырыныгъэ щыхегъахъо. Тренерэу Роман Оробцовыр ипащэу Олимпиадэ джэгунхэм дзюдомкIэ дышъэр къыщызыхьыгъэ Владимир Невзоровым ыцIэ зыхьырэ бэнапIэм зыщегъасэ.

Спорт еджапIэм итхьаматэу, Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлым изэфэхьысыжьхэм къащыхигъэщыгъ сэнаущыгъэ зыхэлъ кIэлэеджакIохэр дзюдомкIэ зэрэбанэхэрэр. Ащ дакIоу, тарихъым инэкIубгъохэм, спорт еджапIэм щызэрахьэхэрэ шэн-хабзэхэм защагъэгъуазэ.

Мудрэнэ Бислъан кIырэплъы

Олимпиадэ джэгунхэу Рио— де-Жанейро щыкIуагъэхэм ды­шъэр къащызыхьыгъэ Мудрэнэ Бислъан Адыгэ республикэ гимназием щеджагъ. Б. Мудранэр зыщапIугъэ еджапIэм къызэкIом, зэIукIэшхо фашIыгъагъ. Пако Алихъан зэхахьэр щыгъупшэжьырэп, Бислъан готэу нэпэеплъ сурэтэу тырахыгъагъэм еплъызэ гупшысэ гъэшIэгъонхэр ешIых.

— Спортым цIыфыр зэрипIурэр тикIэлэегъаджэхэм, тренерхэм, бэнакIохэм къытфаIуатэ, — зэдэгущыIэгъур лъегъэкIуатэ А. Паком. – ЗэIукIэгъухэм тахэлэжьэн фаеу тренерэу Владимир Васильченкэм бэрэ къызэрэтиIорэм ишIуагъэ щыIэныгъэм къыщыдгурэIо.

Мудрэнэ Бислъан республикэ гимназием Iофтхьабзэу щыкIуагъэр шIукIэ ыгу къэкIыжьы. Еджа­пIэм ипащэу КIыкI Нурыет, тарихъымкIэ кIэлэегъаджэу ЕмтIылъ Юсыф, тренерхэу Хъот Юныс, Хьэпэе Хьамидэ, нэмыкIхэм яIофшIакIэ ехьылIэгъэ къэбархэр кIэлэеджакIохэм ягунэсых.

Дэгъу дэдэу еджэ

Пако Алихъан я 6-рэ классым дэгъу дэдэу щеджэ, «5» нэ­мыкI къыхьырэп. Спортым упылъэу арэущтэу уеджэныр къин нахь мышIэми, тхьаусыхэу зыкIи къы­хэкIырэп.

Дунаим щыцIэрыIо кIэлэцIыкIу къэшъокIо ансамблэу «Мыекъуа­пэ инэфылъэхэм» А. Пакор къы­щышъоу пчъагъэрэ тлъэгъугъэ. Адыгэ шъуашэр щыгъэу лъэпкъ къашъом тамэ риты зыхъукIэ, ащ гушIуагъоу къекIущтыгъэр къы­фэIотэжьырэп.

— ЦIыфыбэ зычIэс Къэралыгъо филармонием, пчэгу зэIухыгъэшхом уащыуджыныр зымыуасэ щыIэп, — зэдэгущыIэгъур лъегъэ­кIуатэ Владимир Васильченкэм. — Алихъан адыгэ къашъохэр къышIыхэзэ, лъэпкъ шэн-хабзэхэри зэригъэшIагъэх. Искусствэм, спортым апыщагъэу ныбджэгъу­шIухэр иIэ хъугъэ.

— Тилъэпкъ, республикэм ятарихъ нахь куоу защызгъэгъуа­зэ сшIоигъу. ТарихъымкIэ кIэлэ­егъаджэу ЕмтIылъ Юсыф къыт­фиIуатэрэр макIэп, ау сыхьат еджэгъухэр зэрэмакIэхэм къы­хэкIэу тхылъ зэфэшъхьафхэм салъэхъу, сэр-сэрэу сяджэ, — къытиIуагъ А. Паком.

— Ныдэлъфыбзэр, тарихъыр дэгъоу зэбгъэшIэнхэ фаеу зылъы­тэрэ кIэлэеджакIом гуфэбэны­гъэу фэтшIыгъэр зыфэдизыр тшIэрэп къызэрэтлъытэщтыр, — къеIуатэ В. Васильченкэм.

Спортымрэ егъэджэнымрэ зэдиштэнхэмкIэ тренерхэр респуб­ликэ гимназием ипащэу КIыкI Нурыет, кIэлэегъаджэхэм гущыIэгъу афэхъухэу къыхэкIы. ШIушIагъэр зэгурыIоныгъэм къызэрэщежьэрэр зыгъэунэфыгъэхэм Владимир Васильченкэр ащыщ. ЕджапIэмрэ тренерхэмрэ язэгурыIоныгъэ къыпкъырыкIырэ гъэ­хъагъэхэр щыIэныгъэм щытэлъэгъух.

Къушъхьэ Самир, Егор Христофоровыр, нэмыкI кIэлэеджа­кIохэр А. Паком иныбджэгъух, каратэм зыфагъасэ. Спорт зэ­нэкъокъухэм ахэлажьэхэ зыхъукIэ упчIэжьэгъу зэфэхъух.

Лъэпкъыбэ зыщыпсэурэ Адыгэ Республикэм икIэлэеджакIохэр спорт зэIукIэгъухэм ахэлажьэхэзэ, адыгэ быракъыр зэнэкъокъум щагъэбыбэтэныр шэнышIу афэ­хъугъ. Мэлылъфэгъум и 25-м адыгэ быракъым и Мафэ тирес­публикэ игъэкIотыгъэу илъэс къэс щагъэмэфэкIы. В. Васильченкэм ыгъэсэрэ кIалэхэр мэфэкIым хэлэжьэнхэм фэхьазырых.

Спорт унагъу

Пако Алихъан спорт унагъом щапIу. Ятэу Мыхьамодэ футболым нахь пыщагъ, янэу Екатеринэ кикбоксингымкIэ зэнэкъокъоу зыхэлэжьагъэр макIэп. Унагъом шъэуи 4 щагъасэ. Мэшэлахь. Астемири, Самири спортым пыщагъэх. Хьасан илъэси 2-м ит.

Спорт унагъом инарт шъаохэм ягъэхъагъэхэм зэрахагъэхъощтым, щыIэныгъэм щыпхыращырэ гъогум ныбжьыкIабэ зэрэрыкIощтым тицыхьэ телъ.

ЕмтIылъ Нурбый.

Сурэтым итхэр: Владимир Васильченкэмрэ Пако Али­хъанрэ.