Илъэс къэс республикэ мэхьанэ зиIэ турнир-зэнэкъокъу хьылъэ IэтынымкIэ Пщыкъэнэ Аслъан ишIэжь фэгъэхьыгъэу Улапэ щырекIокIы.

Аслъан кIэлэегъэджэн Iофыр ыгурэ ыпсэрэкIэ къыхихыгъэу, гухахъо хигъуатэу спортым, анахьэу хьылъэ Iэтыным, ныбжьыкIэхэр къыфиIэтэу щытыгъ. А Iофыгъом ищыIэныгъэ ритыгъ, къыдэхъугъэри макIэп, игугъу дахэкIэ ашIыжьы. Пщыкъаныр зыщымыIэжь мафэм тиурамышъхьэ щыщ лIыжъ хэкIотагъэм «А кIалэр лIэн нахьи сэ сылIэгъагъот» ыIогъагъ, джарэу ыгъэшIагъэр цIыфхэм ашIомэкIагъ.

Аслъан сыдигъуи щыIэныгъэр икIэсагъ, гъэсэныгъэм, шIэныгъэм зафищэищтыгъэ. Шъыпкъэ, Тхьэри къыфэупсагъэу гулъытэ чан иIагъ, сыдрэ шIэныгъэ фежьагъэми, псынкIэу пкъырыхьэщтыгъэ, ащкIэ уехъопсэнэу щытыгъ. Сыд фэдэрэ зэнэкъо­къухэм ахэлэжьагъэми, еджапIэм зычIэсыми, илэгъумэ агъэшIагъоу, упчIэмэ яджэуап хьазырэу псынкIэу къытыжьын ылъэкIынэу щытыгъ.

Апшъэрэ шIэныгъэм изэгъэ­гъотын зыфежьэм есIогъагъ: «Мыекъуапэ дэт Адыгэ къэралыгъо кIэлэегъэджэ институтым ифизкультурнэ факультет учIахьэмэ хъущтыба?» «Хьау, икъоу физкультурэмкIэ ыкIи спортымкIэ зыгорэм сыкъигъэсэжьэу, сшIэн фаер сымышIэу хъущтэп», — ыIуагъ ыкIи Волгоград кIуи, дэгъоу щеджагъ. Зэ заджэрэр псынкIэу ышъхьэ риубытэщтыгъэ, шIэгъошIу иIагъ.

Мыекъуапэ къикIыгъэгъэ хьакIэу Джарымыкъо Юсыф Пщыкъаным фэгъэхьэгъэ шIэ­жьым къыщиIогъагъ: «НасыпышIоу зысэлъытэжьы Пщыкъэ­нэ Аслъанрэ сэрырэ тызэрэшIэу зэрэщытыгъэмкIэ».

Хъуажъ Мэджыд Хьамедэ ыкъом (Тхьэм джэнэт къырет) икIэлэгъум къыщегъэжьагъэу ышым фэдэу Пщыкъаныр ылъы­тэщтыгъ, щымыIэжь зэхъуми зы илъэс блимыгъэкIэу (илъэс 37-рэ хъу­гъэ Аслъан зыщымыIэжьыр) зэнэкъокъухэм яIоф пылъэу Хъуажъыр Улапэ къа­кIощтыгъэ, зэкIэ тренер купым хэтхэр тиунагъо къакIохэти, щымыIэ­жьым идахэ аIоу, гукъэ­кIыжьхэмкIэ зэдэгуащэхэу, IофыгъуакIэхэр рахъухьэхэу, педсовет шъыпкъэу, щызэхэсыщтыгъэх. Лъэшэу сыгу къеуагъ Хъуажъ Мэджыдэ мы зэхэхьэгъум зэра­хэмытыжьыгъэр, нахьыжъ шIагъо зыпхэкIыжькIэ ар къыпщымыкIэнэу хъурэп. Бэ тхэзыгъэри: Ордэкъо Нурбый, Сэнэщэкъо Руслъан… Ау шIу зышIэхэрэм ацIэхэр цIыфхэм ащыгъупшэрэп.

«Сыдэущтэу пщыгъупшэна шIу къытэхъулIэмэ шIоигъоу цIыфхэм тахэзыщагъэу, спортым щыщ тызышIыгъэр?!» — аIо агъэса­гъэхэ спортсменхэм

Къэнагъэхэр щыIэщтых, Тхьэм шIум фещэх. Сафэраз Пщыкъаным иIоф кIэщакIо фэхъу­гъэхэу къуаджэмкIэ Бгъо­шэ Тимур, Нэгъой Мурат. Мыхэм еджакIохэр спортым хащэх, зэнэкъокъухэм ахагъэлажьэх. ЗэдэгущыIэгъухэр ахэм ыкIи Абасэ Мурат адысиIагъ. Мыхэр цIыф шIагъох, Iофым агу етыгъ, ар къахэщы, зэкIэми апшъэрэ гъэсэныгъэ яI, къыткIэхъухьэхэрэ ныбжьыкIэхэм пIуныгъэ тэрэз арагъэгъотыныр, ахэр апкъыкIэ пытэхэу, нравственнэ шэпхъэ дэгъухэр ахэлъ­хэу апIунхэм фэхьазырых.

Джырэ уахътэм типравительствэ спортыр къыткIэхъухьэ­хэрэр шэн-зекIокIэ дэйхэм ащыухъумэгъэнхэмкIэ Iоф шъхьа­Iэу елъытэ.

Спортым пкъышъолым имызакъоу, цIыфыр зэрэщытэу епIу, елэжьы. Спортым зэфэдэкIэ Урысыем ыкIи Адыгэ Респуб­ликэм мэхьанэ щараты, мы Iофыр къэIэтыгъэным лъэшэу анаIэ щытет хъугъэ.

Гъэтхэпэ мэфэ фэбэ дахэм Улапэ щыкIогъэ спорт зэнэкъо­къум АР-м хьылъэ IэтынымкIэ испорт еджапIэу Сихъу Рэмэзанэ зипащэм къи­кIыгъэхэр, Красногвардейскэ район администрацием ипащэу А. Осмэныр, ащ къыгъэкIогъэ лIыкIоу, ГО-м иIофхэмкIэ пащэм игуадзэу А.В. Быкановыр, районымкIэ ДЮСШ-м ипащэу Шъэ­ожъ Мурадинэ, район администрацием ныбжьыкIэ политикэмрэ спортымрэкIэ иотдел ипащэу Абасэ Мурат, Улэпэ къоджэ гъэIорышIапIэм ипащэу Гъубжьэкъо Тимур хэлэжьагъэх.

Пащэхэу зигугъу къэсшIыгъэ­хэм ащыщхэм гущыIэ фабэхэмкIэ зэнэкъокъум къекIолIагъэхэ спортсменхэм закъыфагъэзагъ, гъэхъагъэхэр ашIынхэу, текIоныгъэр къыдахынэу къафэлъэ­Iуагъэх.

ЗэкIэми «тхьашъуегъэпсэу!» ясIомэ сшIоигъу, яIоф шъыпкъа­гъэ фыряIэу ныбжьыкIэхэм зэрапылъхэмкIэ.

Спорт зэнэкъокъум къэкIуагъэхэм шIухьафтынхэр къагъэ­хьазырыгъэх. Сихъу Рэмэзанэ джырэ уахътэм культурэм иIофышIэхэм, спортым пылъхэм агъэфедэхэрэ рекламнэ щитхэу «баннер» зыфаIорэм фэдэу Пщыкъаным штангыр ыIэтэу зытешIыхьагъэр, ыбгъукIэ рес­публикэ зэнэкъокъу зэрэщыIэщтыри тетхагъэу къаригъэ­шIыгъ, ар спортым пыщэгъэгъэ Пщыкъаныр зыщымыгъупшэрэмэ ялъэIоу ыгъэцэкIагъ.

Спорт турнирым сэнаущыгъэ зыхэлъхэу хэлажьэхэрэм, медаль фэдэу, Пщыкъаным исурэт зытетыр текIоныгъэр къыдэзыхыгъэхэм сэ афэзгъэшъо­шагъ, апшъэ ислъхьагъ, грамотэхэри, ахъщэ шIухьафтынхэри ясты­гъэх.

А медаль дахэхэр Красно­гвардейскэ район администрацием спортымкIэ иотдел къаригъэшIыгъэх, ахъщэр АР-м хьылъэIэтын атлетикэмкIэ и Федерацие къаритыгъ.

Тренерхэми ацIэ къесIон: Хьакурынэр, Драневыр (Мые­къуапэ), Хьагъурыр (Хьатыгъу­жъыкъуай), Сэнащэкъор (Кощ­хьабл), Шъэожъыр, Къэзэнчыр (Красногвардейскэр), Джымэр (Еленовскэр), Горловыр (Инэм), Гъубжьэкъор, Нэгъоир, Бгъуа­шэр (Улап), Шъаукъо Индар, (Джамбэчый). Чэмбэхъу Анзорэу джы гъэхъэгъэшхохэр зиIэ джамбэчые тренерыр щыIагъэп мызэгъогум Улапэ, ащ ыгъасэхэрэ кIалэхэр игъусэхэу Урысыем сборым кIуагъэу щыI.

Турнирым спортсмен 70-м ехъу хэлэжьагъ, ахэр куп 15-у гощыгъагъэх, яонтэгъугъэ елъы­тыгъэу хагъэунэфыкIхэрэ чIыпIэхэм афэбэнагъэх. Хъуажъ Мэджыдэ зэри­IощтыгъэмкIэ, хьылъэ Iэтыным уащытекIоным нахь шъыпкъагъэ зыхэлъ зэнэ­къокъу щыIэп. Мыщ дэжьым е къэпIэтыгъ, е къэпIэтыгъэп, зи хэукъощтэп.

Зэнэкъокъур мафэм сыхьатыр 11-м рагъажьи, пчыхъэм сыхьатыр 7-м ежьагъэу къау­хыгъ. Ащ елъытыгъэу еджапIэм шхыныгъо стырхэр щагъэхьазырыгъэх, ащ хэлэжьагъэхэм «тхьашъуегъэпсэушхо» къалэ­жьыгъ.

Тэ тирайон щыщ спортсмен чанхэу ащ гъэхъагъэ щызышIыгъэхэм ацIэхэр къесIоных. Апэрэ чIыпIэр къэзыхьыгъэхэр: Гъубжьэкъо Ислъам, Михайлов Александр, Дэхъумэ Рэмэзан, Мнацаканян Арсен, Даниил Шиневскэр; ятIонэрэ чIыпIэр — ШхончбэшIэ Селим, Цэй Батыр; ящэнэрэ чIыпIэр къэзыхъыгъэр Нэгъой Астемир. Турнирыр дахэу кIуагъэ.

Алахьым къыкIэлъыкIорэ спорт зэхэхьагъум узынчъэныгъэ пытэ зэкIэми тиIэу тыщызэIуегъакIэх!

Пщыкъэнэ Май. Улап.