Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм зэхахьэу щыкIуагъэр Урысыем изаслуженнэ артисткэу, Адыгеим инароднэ артисткэу Жэнэ Нэфсэт илъэс 80 зэрэхъугъэм фэгъэхьыгъагъ.

ЗэIукIэшхо зэхащэнэу, артисткэ цIэрыIом зэрифэшъуашэу фэгушIонхэу хъугъэп. Коронавирусым къыпкъырыкIхэрэ гумэкIыгъохэр зэхэщакIохэм къыдалъытагъэх. Н. Жанэр зыгъэлъапIэ­хэрэр, хабзэм икъулыкъушIэхэр Лъэпкъ театрэм мафэм къэкIуа­гъэх, уахътэр амыгъэнафэу театрэм щызэIукIагъэх, гущыIэ фабэхэр артисткэм фаIуагъэх.

Республикэм культурэмкIэ иминистрэу Аулъэ Юрэ, министерствэм иотдел ипащэу Шэуджэн Бэлэ апэрэхэм ащыщхэу Н. Жанэм фэгушIуагъэх.

Кощхьэблэ районым иадминистрацие культурэмкIэ и ГъэIорышIапIэ ипащэу Хъурые Рауф, Адыгэ Республикэм и Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу Сулейманов Юныс, республикэ филармонием икIэлэцIыкIу театрэу «Дышъэ къошыным» ихудожественнэ пащэу Сихъу Станислав, Адыгэкъалэ, Теуцожь районым къарыкIыгъэ­хэр, Адыгэ кIэлэегъэджэ колледжэу Андырхъое Хъусенэ ыцIэ зыхьырэм илIыкIохэр, Лъэпкъ театрэу И. Цэим ыцIэ зыхьырэм иIофышIэхэу Исуп Тимур, Зыхьэ Мэлайчэт, КIыкI Юрэ, Кушъу Светланэ, Уджыхъу Марыет, Ку­кэнэ Мурат, Адыгэ къэралыгъо филармонием ипащэу Къулэ Мы­хьамэт, нэмыкIхэри Н. Жанэм фэгушIуа­гъэх, шIухьафтынхэр фашIыгъэх.

Урысыем итеатрэхэм яIофы­шIэхэм я Союз икъутамэу Адыгэ Республикэм щыIэм итхьаматэу, Урысыем, Къэбэртэе-Бэлъкъарым язаслуженнэ артистэу, Пшызэ искусствэхэмкIэ изаслуженнэ IофышIэшхоу, Адыгэ Республикэм инароднэ артистэу Зыхьэ Заурбый Урысыем итеатрэхэм яIофышIэхэм я Союз ипащэу Александр Калягиныр зыкIэтхэжьыгъэ рэзэныгъэ тхылъэу Н. Жанэм иIофшIагъэ фэгъэхьыгъэм къе­джагъ, сомэ мин 30 хъурэ ахъщэ шIухьафтыныр ащ игъусэу ритыжьыгъэх.

Адыгэ Республикэм и Урыс театрэ ыцIэкIэ Роман Корчагэ зэлъашIэрэ артисткэм къыфэгушIуагъ, бэгъашIэ хъунэу фи­Iуагъ.

— СимэфэкI къагъэдэхагъ. Адыгэ Республикэм и ЛIышъхьэу КъумпIыл Мурат, Правительствэм икъулыкъушIэхэм, культу­рэм, искусствэм, гъэсэныгъэм яIофышIэхэм, театрэр зыгу ри­хьыхэу къысфэкIуагъэхэм, телефонкIэ къысфытеуагъэхэм лъэшэу сафэраз, гъэзетымкIи «тхьашъуе­гъэпсэу» ясIожьынэу сыфай, — къытиIуагъ Жэнэ Нэфсэт. — Театрэр цIыфхэм ашIогъэшIэгъон, театрэм цIыфхэр епIух, щыIэныгъэм фегъасэх. Ролэу къэсшIыгъэхэмкIэ, сиорэдхэмкIэ сызы­лъыIэсыгъэхэм гуфэбэныгъэу афысиIэр учъыIырэп, сщыгъуп­шэхэрэп. Адыгэ Республикэм щыпсэухэрэ лъэпкъхэм язэфыщытыкIэхэр пытэнхэу, гушIуа­гъор къябэкIэу щыIэнхэу афэсэIо.

Сурэтыр зэIукIэгъум къыщытетхыгъ.

ЕМТIЫЛЪ Нурбый.