Урысыем, Адыгеим янароднэ артистэу, Абхъазым, Пшызэ язаслуженнэ артистэу Кукэнэ Мурат ыныбжь илъэс 70-рэ зэрэхъугъэм фэгъэхьыгъэ зэхахьэхэр республикэм щэкIох.

Республикэ Лъэпкъ театрэу Цэй Ибрахьимэ ыцIэ зыхьырэр Кукэнэ Мурат къыфэгушIуагъ. Артистыр къызыщыхъугъэ къуа­джэу Тэхъутэмыкъуае спектаклэу «Псэлъыхъохэр» къыщигъэлъэ­гъуагъ. Спектаклэм Кукэнэ Мурат хэлэжьагъ.

Адыгэ къэралыгъо университетым М. Куканэм итворчествэ ехьылIэгъэ зэхахьэр гъэшIэгъо­нэу щызэхащагъ. Университетым шIэныгъэмкIэ и Совет ащ ыуж зэIукIэу иIагъэм унашъо щашти, «Адыгэ къэралыгъо университетым идоктор гъэшIуагъ» зыфиIорэ щытхъуцIэр къыфаусыгъ.

Кукэнэ Мурат Адыгэ къэралыгъо университетым иобщественнэ Iофыгъохэм чанэу ахэлажьэ, кIэлэегъаджэхэм, студентхэм аIокIэ.

Адыгэ къэралыгъо университетым иректорэу Мамый Даутэ шIэныгъэмкIэ Советым, иIофшIэгъухэм ацIэкIэ Кукэнэ Мурат къыфэгушIуагъ, игъэхъагъэхэм ахигъэхъонэу фиIуагъ. ГъэшIогъэ щытхъуцIэр зэрэфаусыгъэр къэзыушыхьатырэ тхылъыр, шъуашэу ащ епхыгъэр ритыжьыгъэх. ШIоу щыIэр къыдэхъунэу фэлъэIуагъ.

— Адыгэ къэралыгъо кIэлэегъэджэ институтым филологиемкIэ ифакультет къэсыухыгъ. Театрэм, музыкэм ыкIи кином яапшъэрэ еджапIэу Ленинград дэтым сишIэныгъэхэм ащыхэзгъэ­хъуагъ, — къыщиIуагъ зэхахьэм М. Куканэм. — Театрэм иартист сыхъуным фэшI филфакым ишIогъэшхо къысэкIыгъ.

Студентхэм япчыхьэзэхахьэ­хэм, театральнэ къэшIынхэм Кукэнэ Мурат ахэлажьэщтыгъ, усэхэм къяджэщтыгъ. Филфакым гъэсэныгъэу щызэригъэгъотыгъэр щыIэныгъэм къыщетэжьыгъ. Адыгэ къэралыгъо кIэлэегъэджэ институтым щеджэзэ, зы фэтэрым нэбгыри 4 щызэдисыгъ. Алексей Дубовик генерал-лейтенантэу къулыкъум къыхэкIыжьыгъ. Валерий Дворниковымрэ Анатолий Шалинымрэ Киев консерваториер къыщаухыгъ, ящыIэныгъэ искусствэм епхыгъэу мэпсэух. Кукэнэ Мурат культурэм, искусствэм ащызэлъашIэ.

— Адыгэ къэралыгъо университетым илъэсыбэрэ иректорэу щытыгъэ Хъунэго Рэщыдэ, филфакым ипащэу Пэнэшъу Уцужьыкъо, Адыгэ къэралыгъо университетым иректорэу Мамый Даутэ, нэмыкI кIэлэегъаджэхэм сафэраз, — къыIуагъ Кукэнэ Мурат. – Зэхэщэн IофыгъохэмкIэ IэпыIэгъу тызэфэхъужьы, неущрэ мафэм телъытэгъэ мурадэу тиIэр щыIэныгъэм щыпхырытщынымкIэ шIыкIэшIухэм талъэхъу.

Общественнэ IофышIэу, артист цIэрыIоу Кукэнэ Мурат доктор гъэшIуагъэ зэрэхъугъэмкIэ тигъэ­зетеджэхэм ацIэкIэ тыфэгушIо. Опсэу, Мурат! Тхьэм бэгъашIэ, насыпышIо уешI.

Сурэтым итхэр: Мамый Даутэрэ Кукэнэ Муратрэ.

ЕМТIЫЛЪ Нурбый.