Урысыем изаслуженнэ артисткэу, Адыгэ Рес­публикэм инароднэ артисткэу Жэнэ Нэфсэт имэфэкI мафэ непэ хегъэунэфыкIы.

Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм иактрисэ цIэрыIоу Жэнэ Нэфсэт иIофшIэгъухэм, искусствэр зышIогъэшIэгъонхэм къаIуатэхэрэм шъуащытэгъэ­гъуазэ.

Пэрэныкъо Чатиб — Урысыем изаслуженнэ артист, Адыгэ Республикэм инароднэ артист.

— Жэнэ Нэфсэт къепIолIэн фаер бэ. Ар орэдыIу, театрэм иартистк. ГИТИС-м щеджэзэ уна­гъо ихьагъ. Ишъхьэгъусэу Айтэчыкъо Мыхьамоди, АбреккIэ еджэщтыгъэх, артистэу щытыгъ. А. ХьакIаком ипьесэу «Сабыим ихьатырым» сишъхьэгъусэу Рае, Жэнэ Нэфсэт рольхэр къыща­шIыгъэх. Спектаклэм сэри сыхэлэжьагъ.

Мурэтэ Чэпае «Ным игумэкI» зыфиIоу ытхыгъэм роль шъхьаIэр Нэфсэт къыщишIыгъ. Къэгъэ­лъэгъонэу «Шъузабэхэм» Жэнэ Нэфсэт зэрэхэлэжьагъэр сщы­гъупшэрэп. Къуаджэм шъузабэхэу дэсхэм Хэгъэгу зэошхом ыуж агу ихъыкIырэр, IофшIэнэу агъэцакIэрэр актрисэм гукIи, псэкIи къыгъэлъэгъуагъэх.

Ролэу къышIырэм ыкупкI лъы­Iэ­сын зэрилъэкIырэр, сценэм щы­зекIо зыхъукIэ шъэбагъэу къызыхигъафэрэр тэ, артистхэм, дгъэшIагъощтыгъ. Iоф дэтшIэ­- ным тыкIэхъопсыщтыгъ. Мэкъэ Iэтыгъэ дахэкIэ орэдыр къызыхидзэкIэ жьы къэтымыщэу тедэIоу къытщыхъущтыгъ.

Кукэнэ Мурат — Урысыем, Адыгеим янароднэ артист.

— Николай Гоголым ытхыгъэ «Ревизорым» техыгъэ къэгъэ­лъэгъоным Хлестаковым ироль къыщысшIыгъ. Жэнэ Нэфсэт Анна Андреевнам ироль фэгъэзэгъагъ. Сэнэхьатэу къыхэсхыгъэм щысэтехыпIэу Нэфсэт щысиIагъ. ИгущыIэ зэригъэпсырэр, нэплъэ­гъукIэ къыуиIон ылъэкIырэр, орэд къызэриIорэр сшIогъэшIэгъоныгъэх. ЕтIани Нэфсэт шIушIагъэу фэслъэгъущтыгъэр къыгот артис­тым зытыримыIэтыкIэу, ролэу къы­шIырэмкIэ зылъищэным сыди­гъуи зэрэфэхьазырыгъэр арыгъэ.

Фильмэу «ШIугуащэр» зытесэхым, Жэнэ Нэфсэт роль шъхьаIэр къышIыгъ. Исэнэхьат зэрэфе­джа­гъэр, ицIыфыгъэ къэгъэлъэ­гъоным къыщыхэщыгъэх. Фильмыр тетхыным фэшI уахътэу къытатыгъэр мэкIагъэ. Пьесэр къызэ­рэтшIыщт шIыкIэм зыфэдгъэхьазырынэу уахътэ къыхэкIыщты­гъэп. Нэфсэт занкIэу эфирым къихьэзэ, «ШIугуащэр» теттхэу къыхэкIыгъ. Зигъэгусэщтыгъэп, Iорэ-шIэрэ зыми къыпигъэкIыщтыгъэп. Исэнэхьат зэрэфэшъып­къэр, иIофшIэн хэшIыкI зэрэфыриIэр щыIэныгъэм къыщылъэгъуа­гъэх. Адыгеим имузыкальнэ искусствэ хэхъоныгъэхэр ышIынхэмкIэ Жэнэ Нэфсэт шIушIагъэу иIэм джырэ нэс икъоу ты­темыгу­щыIагъэу сэлъытэ. Лъэпкъ куль­турэр лъагэу зыIэтыгъэхэм ар ащыщ.

Зыхьэ Заурбый — Урысыем, Къэбэртэе-Бэлъкъарым, Пшызэ язаслуженнэ артист, Адыгеим инароднэ артист.

— Адыгеим итеатральнэ искусствэ хэхъоныгъэхэр ышIынхэм Жэнэ Нэфсэт зэрэхэлэжьагъэр зыми хэкIокIэщтэп. Щытхъу лые мыхъоу, зытетым тетэу къэпIотэныр сэ къыхэсэхы. Нэфсэт уригъусэу ролыр къэпшIыныр хъо­псагъоу щытыгъ. Зыфэгъэзэгъэ ролым иобраз гукIэ ухещэшъ, залым чIэсхэм уадегъэгущыIэ, уалъегъэIэсы.

Искусствэр лъагэу ыIэтызэ, артистэу къыготыри апшъэрэ лъэгапIэм зэрэнигъэсыщтым пылъ. ГущыIэкIэ римыIощтыр иIокIэ-шIыкIэхэмкIэ гурегъаIо. ЦIыф цыхьэшIэгъоу зэрэщытым къыпкъырыкIэу шъхьэихыгъэу уимурадхэр еоIох. Къиныр къыбдеIэты, хъярыр къыбдегощы. ИкIалэхэр дэгъоу ыпIугъэх. Нэф­сэт лъытэныгъэу фэтшIырэр гущыIэкIэ къитIотыкIын тымы­лъэ­кIыщтэу къысщэхъу.

Шъхьаплъэкъо Къэсэй — театровед, Адыгэ Респуб­ликэм искусствэхэмкIэ изаслуженнэ IофышIэшху.

— Драматическэ артисткэу, орэдыIоу Жэнэ Нэфсэт щыIэныгъэм шIукIэ щашIэ. Лъэпкъ театрэм къыщишIыгъэхэ рольхэм гупшысэшхо уагъэшIы, иорэдмэ уаIэты. Ащ къызэрэтиIуагъэу, ирольхэмрэ иорэдхэмрэ игу­шIуагъох.

Музыкальнэ-литературнэ къэтынхэу Къэралыгъо телерадиокомпаниеу «Адыгеим» щызэхищэщтыгъэхэр титхэкIо цIэрыIохэм афэгъэхьыгъагъэх. «Шъутщыгъу­пшэрэп, шIу шъутэлъэгъу» зыфиIорэм лъэпкъ гупшысэу щыпхырищырэр щыIэныгъэм иIотакIоу тлъытэщтыгъ.

Тилъэпкъ культурэ лъэгъо шъхьаф къыщызыгъэнэгъэ Жэнэ Нэфсэт ишIушIагъэ сегъэгушхо.

Сулейманов Юныс — Урысыем, Адыгеим искусствэхэмкIэ язаслуженнэ IофышIэшху.

— Камернэ музыкальнэ театрэу Хьанэхъу Адамэ ыцIэ зыхьырэр зызэхэтэщэм, апэу IэпыIэгъу къытфэхъугъэмэ Жэнэ Нэфсэт ахэтэлъытэ.

ГИТИС-м музыкальнэ коме­диемкIэ икъутамэ Жэнэ Нэфсэт къыухыгъ. Сэри ащ сыщеджэзэ, тикIэлэегъаджэхэм Нэфсэт аIу­кIагъ. Профессорэу Михаил Морд­виновым ригъэджагъэхэм Н. Жанэр ащыщыгъ. Сэри Морд­виновыр сипэщагъ. Гуфэбэныгъэ зыхэлъ зэдэгущыIэгъоу Михаил Мордвиновымрэ Жэнэ Нэф­сэтрэ зэдыряIагъэр гъашIэм щыс­­щыгъупшэщтэп. Кадрэхэм ягъэхьазырын лъапсэу фашIы­гъэр щыIэныгъэм щылъагъэкIотагъ.

Болэкъо Аслъан — респуб­ликэ общественнэ движе­ниеу ­«Адыгэ Хасэм» игъэ­цэ­кIэкIо куп хэт.

— Жэнэ Нэфсэт спектаклэу зыхэлажьэрэмэ бэрэ сяплъыгъ, иорэдхэм сядэIугъ. Игуетыныгъэ­­рэ исэнаущыгъэрэ иIофшIэн лъа­псэ фэхъугъэх. Дискым тетхэгъэ орэд­хэм сигуапэу непи сядэIу, иорэд дахэхэмкIэ сыдэгущыIэу сэлъытэ.

ЕплъыкIэхэр

Жэнэ Нэфсэт «Налмэсым», «Ислъамыем», Нэхэе Тэмарэ, Быщ­тэкъо Азэмат, Нэфышъэ Чэ­римэ, КIыкI Софие, Кушъэкъо Си­мэ, Дзыбэ Мыхьамэт, нэмыкI­хэм яконцертхэм, спектаклэхэм яплъэу тырихьылIагъ. Искусствэм ицIыф шъыпкъэ джары зэрэ­псэун фаер. Опсэу, Нэфсэт! Насып ущымыкIэу Тхьэм бэгъашIэ уешI.

ЕмтIылъ Нурбый.