КIэщакIоу тыщэрэт
Адыгабзэм изэгъэшIэн фэгъэхьыгъэ Iофтхьабзэхэм ащыщ диктант тхыгъэныр.
Республикэм гъэсэныгъэмрэ шIэныгъэмрэкIэ и Министерствэ, Дунэе Адыгэ Хасэр, республикэ общественнэ движениеу «Адыгэ Хасэр», Адыгэ къэралыгъо университетыр, гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэр, фэшъхьафхэу зэхэщэн Iофхэм чанэу ахэлэжьагъэхэм яшIушIагъэ тэгъэлъапIэ.
— Нэбгыри 110-мэ диктантыр Мыекъуапэ щатхыгъ, 21-мэ «5» къахьыгъ, зы хэукъоныгъи хэзымышIыхьагъэхэр 13 мэхъух, — къыщиIуагъ зэфэхьысыжь зэхахьэм Адыгэ къэралыгъо университетым адыгэ филологиемрэ культурэмрэкIэ ифакультет ипащэу Хьамырзэкъо Нурыет.
КIэлэегъаджэхэр, журналистхэр, студентхэр, прокуратурэм, министерствэхэм якъулыкъушIэхэр, Адыгэ Хасэм хэтхэр диктантым итхын хэлэжьагъэх.
— ЗэкIэми тафэраз, ау зы хэукъоныгъи хэзымышIыхьагъэхэр къыхэдгъэщыхэ тшIоигъу, — къыIуагъ Адыгэ Хасэм игъэцэкIэкIо куп хэтэу Болэкъо Аслъан. — Ахэр: Анзэрэкъо Светлан, Ацумыжъ Джульет, Вэрэкъо Хъурет, Гедыоджэ Марин, Къатмэс Эмм, Мамый Марыет, Мыгу Анжел, ПчыхьакIэ Марин, Темзэкъо Марин, Теуцожь Казбек, Тэу Замир, Хъунэго Аминэт, Шъэфрыкъо Марыет.
КIэлэцIыкIу IыгъыпIэм иIофышIэ зы хэукъоныгъэ химышIыхьагъэмэ шIукIэ къыхэбгъэщы хъущт, ау адыгабзэм икIэлэегъаджэ, журналистым хэукъоныгъэ хамышIыхьэмэ умыгъэшIагъомэ хъущтэу зылъытэхэрэм адетэгъаштэ. КIэлэегъаджэхэри, журналистри бзэм фэгъэсагъэх, дэгъу дэдэу тхэнхэр япшъэрылъ. Зэнэкъокъум лъапсэ ышIыным фэшI кIэлэегъаджэхэри, журналистхэри зэрэхэлэжьагъэхэр дэгъу. Гъэсэныгъэмрэ пIуныгъэмрэ яхьылIэгъэ Iофым нахь зиушъомбгъуным пае лэжьэкIо къызэрыкIохэр, бизнесым пылъхэр, IэнэтIэ хэхыгъэхэм аIутхэр, лъэпкъ шIэжьым ыгъэгумэкIыхэрэр, культурэм хэтхэр, спортсменхэр, полицием икъулыкъушIэхэр, нэмыкIхэри диктантым итхын хэрэлажьэх.
Сисэнэхьат сырылажьэзэ, ансамблэхэм якъэшъуакIохэм, спортсменхэм, кIэлэеджакIохэм бэрэ саIокIэ. Гъэхъагъэу ашIырэр макIэп, ащ тегъэгушхо шъхьае, алъэкъуацIэхэр адыгабзэкIэ тэрэзэу къаIон амылъэкIэу къызэрэхэкIырэм ипчъагъэ къэлъытэгъуае мэхъу. Спортсменыр янэ еупчIыжьыгъэми, лъэкъуацIэр тэрэзэу къыримыIоу къыхэкIы. УрысыбзэкIэ къызэраIорэр дэгъу, ау адыгабзэр сыда ащ имыгъусэщт, сыда пыдзы зыкIашIырэр?!
Бзэ зимыIэр
Бзэ зимыIэр лъэпкъ шъхьафэу дунаим тетын зэримылъэкIыщтыр тэшIэ. Адэ сыда тиныдэлъфыбзэ мэхьэнэ икъу зыкIетымытырэр? Сыда тызфакIорэр? Тэ къытэлъытыгъэр тэр-тэрэу дгъэцэкIэн тлъэкIыщтба? ЛъэкъуацIэу тхьырэм, лIакъоу тызщыщым ятарихъ зэтымыгъэшIэнэу зыми къытиIорэп. Унагъом къыщырарэгъажьи, ныбжьыкIэхэм алъэкъуацIэхэр зэрэрагъашI. Ащ пыдзагъэу кIэлэцIыкIу IыгъыпIэхэм, еджапIэхэм Iофыр лъарэгъэкIуат.
Теуцожь Казбек прокуратурэм икъулыкъушI, Тэу Замирэ журналист, Темзэкъо Маринэ кIэлэегъадж, Гедыоджэ Маринэ колледжым щеджэ. ЗэкIэми къызэрэтаIуагъэу, адыгабзэр ашIогъэшIэгъон. Мамый Марыет ятэу Хьабибэ ныдэлъфыбзэм иIофыгъохэм зэрапылъыгъэр тшIэщтыгъэ. Адыгэкъалэ къикIызэ адыгабзэм изэгъэшIэн ыгъэгумэкIэу гъэзетэу «Адыгэ макъэм» иредакцие къызэрэкIощтыгъэр тщыгъупшэрэп. Марыет диктантыр дэгъу дэдэу зэритхыгъэм дакIоу, зэхэщэн Iофхэр ыгъэцэкIагъэх.
КъэкIощт илъэсым адыгабзэмкIэ диктантыр зэратхыщтым, ащ хэлэжьэщтхэм непэ тягупшысэ. КIэлэегъаджэхэм, журналистхэм арэмытх тIорэп. Адыгэ Хасэм итхьаматэу ЛIымыщэкъо Рэмэзан къызэрэтиIуагъэу, адыгабзэр нахьышIоу зэдгъэшIэным фэшI тхэным, еджэным апыщагъэхэм япчъагъэ хэдгъэхъон фае. Адыгэ литературэр бай дэд, дунаим щашIэх титхакIохэу КIэрэщэ Тембот, МэщбэшIэ Исхьакъ, Къуекъо Налбый, фэшъхьафхэри. Тиныдэлъфыбзэ игъэлъэпIэн тэ къытщерэжь.