Урысыем дзюдомкIэ изэнэкъокъу Тюмень щыкIуагъ. Илъэс 23-м нэс зыныбжьхэр алырэгъум щыбэнагъэх.

Къыблэм ихэшыпыкIыгъэ командэ хэтхэу Адыгэ Республикэм щыщ кIалэхэр зэIукIэгъухэм ахэ­лэжьагъэх. Пщыжъхьаблэ щапIугъэ нарт шъаоу Датхъужъ Алый килограмм 90-рэ къэзыщэчыхэрэм янэкъокъугъ.

Москва. Иркутскэ, Дагъыстан, Урал ябэнакIохэм Датхъужъ Алый атекIуи, дышъэм икъыдэхын фэгъэ­хьыгъэ зэIукIэгъум зыфигъэ­хьазы­рыгъ. Екатеринбург къикIыгъэ Е. Назировымрэ А. Датхъу­жъымрэ яшъыпкъэу зэнэкъокъугъэх. НахьыпэкIэ ахэр алырэгъум щызэIукIэ­хэуи къыхэкIыгъ. Урысыем и Кубок фэгъэхьыгъэ зэха­хьэу Мыекъуапэ щыкIуагъэм Датхъужъ Алый текIоныгъэр къыщыдихи, апэрэ чIыпIэр къыфагъэшъошагъ.

БатыритIури Тюмень зыщызэбэнхэм Е. Назировым апэрэ чIыпIэр ыхьыгъ, А. Датхъужъым тыжьыныр къыдихыгъ.

— КIуачIэр нахь ыпсыхьанэу, икъулайныгъэ хигъэхъонэу Датхъужъ Алый тегъэгугъэ, — къытиIуагъ бэнакIор зыгъасэу, Адыгэ Республикэм изаслуженнэ тренерэу Беданэкъо Рэмэзанэ. — Тюмень тыщыIэу бэнэгъухэм тяплъыгъ, тренерхэм, спортсменхэм гущыIэгъу тафэхъугъ. Адыгеир, Мыекъопэ бэнэпIэ еджапIэу Кобл Якъубэ лъапсэ зыфишIы­гъэр Урысыем дэгъоу щашIэх, упчIабэ къытатыгъ….

— Тюмень щыкIогъэ зэнэкъо­къум бэнэкIо 516-рэ хэлэжьагъ, — зэдэгущыIэгъур лъегъэкIуатэ Адыгэ Республикэм дзюдомкIэ ихэшыпыкIыгъэ командэ итренер шъхьаIэу, спорт еджапIэу Кобл Якъубэ ыцIэ зыхьырэм ипащэу Бастэ Сэлымэ. — ТибэнакIохэу ТхьакIущынэ Ахьмэд, кг 100, Ордэн Заур, кг 81-рэ, Бэгъ Ас­лъан, кг 90-рэ, Вардкез Акопян, кг 100-м къехъу, апэрэ чIыпIи 10-р къыдэзыхыгъэхэм ащыщых.

Датхъужъ Алый Урысыем дзюдомкIэ ихэшыпыкIыгъэ командэ аштагъ, Европэм изэнэкъокъу хэлэжьэнэу зегъэхьазыры.