Хьисапым фэщагъэхэм яолимпиад
Хьисапым фэщэгъэ кIэлэеджакIохэр зыхэлэжьэхэрэ Кавказ олимпиадэр блэкIыгъэ бэрэскэшхо мафэм Мыекъуапэ къыщызэIуахыгъ. Ащ мэфитфым къыкIоцI Iоф ышIэнышъ, бэрэскэжъыем икIэуххэр зэфахьысыжьыщтых.Хьисап олимпиадэр илъэситфыкIэ узэкIэIэбэжьмэ апэрэу гъэсэныгъэ Гупчэу «Сириус» зыфиIорэм щызэхащагъ. Ащ ыуж илъэс зэкIэлъыкIохэм Мыекъуапэ ар щэкIо.
Олимпиадэм изэхэщакIох АР-м гъэсэныгъэмрэ шIэныгъэмрэкIэ и Министерствэ, Адыгэ къэралыгъо университетыр, республикэ естественнэ-хьисап еджапIэр, мыкоммерческэ партнерствэу гъэсэныгъэмкIэ технологиякIэхэм я Гупчэу «Матэма» зыфиIорэр. Урысые Федерацием и Президент игранткIэ Iофтхьабзэр зэхащагъ.
Олимпиадэр къыщызэIуахыгъ Адыгэ къэралыгъо университетым. Хабзэ зэрэхъугъэу, ар мэфэкI дахэу рекIокIыгъ. Ащ икъызэIухын хэлэжьагъ АР-м гъэсэныгъэмрэ шIэныгъэмрэкIэ иминистрэу КIэрэщэ Анзаур. КъызэIукIагъэхэм закъыфигъазэзэ, игуапэу министрэм ахэм шIуфэс къарихыгъ, илъэс къэс олимпиадэм хэлажьэхэрэм япчъагъэ зэрэхахъорэм мэхьанэшхо зэриIэр къыхигъэщыгъ.
— КъакIохэрэми, къэралыгъоу къызэрыкIыхэрэми япчъагъэ нахьыбэ зэрэхъурэм Кавказ олимпиадэм дунэе мэхьанэу иIэр нафэ къешIы, — къыIуагъ ащ.
Олимпиадэм икъызэIухын мызэу, мытIоу тлъэгъугъэу щытми, къэралыгъо зэфэшъхьафхэм, Кавказым исубъектхэм къарыкIыгъэ кIэлэ ыкIи пшъэшъэ ныбжьыкIэхэм ябыракъхэр аIыгъ-хэу сценэм къызэрэдэкIуаехэрэр зыплъэгъукIэ, гухэхъошхо хэогъуатэ. КIэлэеджакIоу къакIохэрэр къэралыгъоу къыздикIыгъэм ибаиныгъэ шъхьаIэхэу щытых. Урысыеми Адыгеими цыхьэ къафашIэу ахэр къызэрагъакIохэрэм мэхьанэшхо иI. ЕтIани джырэ уахътэм дунаир зэрэбырсырыр, зэпахырэ узэу къежьагъэр щынэгъошхоу зэрэщытыр къыдэплъытэмэ, Кавказ олимпиадэм нэмыкI къэралыгъохэм къарыкIыхэзэ кIэлэеджакIохэр къызэрэкIохэрэм ащ мэхьанэшхо зэрэратырэр къеушыхьаты.
Зэпахырэ узым зыкъызэриIэтыгъэм епхыгъэу къэралыгъохэм ялIыкIохэм япчъагъэ нахь макIэ хъун къытшIошIыгъэми, бэп къэмыкIуагъэр. Ащ фэдэу Тыркуем, Болгарием ыкIи Азербайджан ягъунапкъэхэр зэрэзэфашIыгъэхэм къыхэкIэу къэкIонхэ зымылъэкIыгъэхэм Интернетыр агъэфедэзэ хьисап олимпиадэм къыхэлэжьэнхэу амал яIагъ.
Олимпиадэм икъызэIухын хэлэжьагъэх зэлъашIэрэ творческэ коллективхэу, лъэпкъ орэдыIо ансамблэу «Ащэмэз», адыгэ къашъом иансамблэу «Синдика», творческэ купэу «Ошъад» ыкIи Адыгэ къэралыгъо университетым иорэдыIо ансамблэу «Шоколад» зыфиIохэрэр.
Олимпиадэм пае задачэхэр зэхигъэуцуагъэх хэушъхьафыкIыгъэ комитетэу кIэлэеджакIохэм хьисапымкIэ яолимпиадэхэм язадачэхэр къыхэзыхыхэрэм. Ащ хэтых Урысыем, Болгарием, Люксембург, Бельгием ыкIи Иран яшIэныгъэлэжь цIэрыIохэр.
— Олимпиадэм пшъэрылъэу иIэр ныбжьыкIэхэр шIэныгъэ куухэм ахэщэгъэнхэм, ахэр наукэм фэщэгъэнхэм ямызакъоу, Урысыем и Къыблэ, Кавказым исубъектхэм, КъокIыпIэ Благъэм ащыпсэухэрэ кIэлэеджакIохэр зэхэхьанхэр, зэрэшIэнхэр, ныбджэгъуныгъэ азыфагу илъыныр ары, — еIо олимпиадэм ижюри ипащэу, Адыгэ къэралыгъо университетым иректорэу, Урысыем и КъыблэкIэ олимпиаднэ движением кIэщакIо фэхъугъэу, республикэ естественнэ-хьисап еджапIэр зыгъэпсыгъэу Мамый Даутэ.
Олимпиадэм къекIолIагъэхэр аныбжь елъытыгъэу зэтефыгъэхэу зэнэкъокъугъэх. Апэрэ купым я 8 — 9-рэ классхэм ащеджэхэрэр хэтыгъэх, я 2-рэ купым (лигэм) я 10 — 11-рэ классхэр хахьэщтыгъэх.
Зэнэкъокъур уцугъуитIоу кIуагъэ. Уцугъо пэпчъ кIэлэеджакIохэм задачи 4 къыщашIын фэягъ. Мы чIыпIэм къыщысIомэ сшIоигъу задачэхэм якъэшIын зы мэфэ псауи, мэфитIуи апэIухьэу олимпиадэм къызэрэщыхэкIырэр.
ЯтIонэрэ уцугъом зэнэкъокъур лъагъэкIотагъ, задачэхэр къашIыгъэх, кIэлэеджакIо пэпчъ икомандэ текIоныгъэ къыдихыным фэбэнагъ. Ащ фэдэу зэнэкъокъум зыхэм задачэхэр къыщашIыхэ зэхъум, нэмыкIхэр республикэ естественнэ-хьисап еджапIэм лекцие гъэшIэгъонэу Всероссийскэ олимпиадэм хьисапымкIэ ижюри итхьаматэу Назар Агахановым къыщишIыгъэм щедэIугъэх. Ар олимпиадэм гъэцэкIэнэу къыдилъытэхэрэр зэрэзэхагъэуцохэрэм фэгъэхьыгъагъ. Iэнэ хъураеу олимпиадэм щызэхащагъэр кIэлэеджакIохэр хьисапымкIэ олимпиадэхэм зэрэфагъэхьазырхэрэм ехьылIэгъагъ.
Пчыхьэм «Интеграл по городу» зыфиIорэ квест-джэгукIэр Мыекъуапэ щыкIуагъ. БлэкIыгъэ илъэсым фэдэу къалэм щыпсэурэ унагъохэр ащ хэлэжьагъэх. Пчыхьэм кIэлэеджакIохэр зыщыпсэухэрэ хьакIэщэу «Туристым» джэгукIэ зэфэшъхьафхэр щызэхащагъэх. Олимпиадэм изы мафэ пэпчъ шIуагъэ къытэу, гъэшIэгъонэу зэрэкIощтым зэхэщакIохэр пылъыгъэх. Ащ фэдэу УФ-м и Президент и Премие къызэратыгъэу, Кавказ хьисап олимпиадэм и Координационннэ Совет хэтэу, Урысыем щызэлъашIэрэ шIэныгъэлэжьэу Николай Андреевым илекциеу «Хьисапымрэ музыкэмрэ» зыфиIорэм ягуапэу кIэлэеджакIохэр едэIугъэх. 2011-рэ илъэсым УФ-м и Президент и Премие къызэратыгъэу, научнэ статья 200-м ехъу зытхыгъэ шIэныгъэлэжьэу Андрей Райгородскэм илекции кIэлэеджакIохэм лъэшэу ашIогъэшIэгъоныгъ, зыIэпищагъэх.
Республикэ естественнэ-хьисап еджапIэм Iэнэ хъураеу щызэхащагъэри гъэшIэгъонэу рекIокIыгъ. Ар фэгъэхьыгъагъ сэнаущыгъэ зыхэлъ ныбжьыкIэхэр къыхэгъэщыгъэнхэм, ахэр хьисапым фэщэгъэнхэм.
Ащ фэдэу гъэшIэгъонэу олимпиадэм имафэ пэпчъ рекIокIыгъ. ЯшIэныгъэхэм зэрахагъэхъуагъэм нэмыкIэу ахэм языгъэпсэфын программи дэгъу дэдэу афызэхащэгъагъ. Олимпиадэр окIофэ музейхэм, тарихъым епхыгъэ нэмыкI чIыпIэхэм кIэлэеджакIохэр ащыIагъэх.
Олимпиадэм имафэхэм тызIукIэгъэ хьакIэхэм къызэраIуагъэмкIэ, ар гъэшIэгъон дэдэу зэхэщагъэ хъугъэ, къызыдэкIогъэхэ республикэр агу рихьыгъ, зэрэщырэхьатыпIэм гу лъатагъ, къащэгъэ ныбжьыкIэхэр къызэрэухъумагъэхэм рэхьатныгъэ ежьхэм къахилъхьэщтыгъ. Хьисап олимпиадэр неущ зэфашIыжьыщт.
Сихъу Гощнагъу. Сурэтхэр Iэшъынэ Аслъан тырихыгъэх.