Хъишъэмрэ чIыпIацIэхэмрэ
Нартхэм ялъэуж хэкIуакIэрэп
Темыр Кавказым ис лъэпкъхэм нарт эпосыр яунаеу алъытэ. НэмыкI лъэпкъхэм ялъытыгъэмэ, тэ, адыгэхэм, мыр къырыдгъэшъыпкъэжьынэу IэубытыпIэ тшIыщт щысэхэм тащыкIэрэп.
[caption id="attachment_72097" align="aligncenter" width="800"] Хэсэ гупчагъэр хъураеу къэгъэчъыхьагъ. Хабзэм къыдигъэкIыгъэ картым Темыр-Кавказым игупчэ икоординатхэр тетых.[/caption]Нартхэм япхыгъэ саугъэтхэр бэ хъухэу Адыгеим итых, зыдэщыIэхэр тэшIэх. Типщыналъэмэ ахэт лIыхъужъхэм зэряджэхэрэр адыгацIэх, ямэхьанэхэмкIэ адыгэ гущыIэх. Эпосыр лъэныкъуабэкIэ тилъэпкъ зэрепхыгъэр пщыналъэхэм дэгъу шъыпкъэу къаушыхьаты. КъэбарIуатэмэ хъугъэ-шIагъэхэр зыщыхъугъэхэр гъэнэфагъэу къагъэлъэгъуагъэх, чIыпIэмэ ацIэхэр къыраIуагъэх, лIыхъужъхэр зычIэлъ Iуашъхьэхэр зыдэщытхэр агъэгъощагъэхэп. Нартхэм япхыгъэ Iуашъхьэхэр археологие саугъэтхэу адыгэ чIыгужъым илъэныкъуабэмэ ащыIэх. Пасэм зэхалъхьэгъэ пщыналъэмэ гъэнэфагъэу къыщаIо нартхэр зэрэадыгэхэр. Ар мызэу, мытIоу къэбарIуатэмэ къыкIагъэтхъыгъ.
ИжъыкIэ Черкесием чIынэлъэшхо ыубытыщтыгъэ. Ащ елъытыгъэмэ, джырэ Адыгеим къыгъэгъунэрэр мэкIэжъый. Кавказ заом ыпэкIэ, я XVIII-рэ лIэшIэгъум иублапIэ, тигъунапкъэхэр Темэн хыгъэхъунэныкъом (Таманский полуостров) къыщыкIэдзагъэу Къалмыкъым, Дагъыстан, Чэчэным, Ингушетием, Осетием анэсыщтыгъэх, къыблэмкIэ Абхъазым еолIэжьыщтыгъэх. Зэо мэхъаджэм тилъэпкъ ыужъгъэйи, тызаштэм, тичIыгухэу аунэкIыгъэхэм нэмыкI лъэпкъхэр къарытIысхьагъэх. Ащ ыпкъ къикIэу нарт саугъэтхэм ащыщхэр, чIыпIэхэр тиреспубликэ игъунапкъэхэм акIыб хъугъэх.
[caption id="attachment_72100" align="aligncenter" width="800"] Нарт чIыпIэхэу Пщыщэ Iутхэр.[/caption]ТилъэпкъыкIэ анахь мэхьэнэ шъхьаIэ зиIэу ахэм къахэдгъэщырэр Кургъо тамэ тет пытэпIэжъэу Iалэджыпщым икъуадж ары. Мы чIыпIэр адыгэмэ яижъырэ тарихъ гупчэ шъыпкъ. А чIыпIэу лъэпкъ хэсэ зэфэсыпIэщтыгъэр 2014-рэ илъэсым дгъэунэфыжьыгъэ. Мы чIыпIэм хъугъэ-шIэгъабэ епхыгъ, нарт цIэрыIохэр щыпсэугъэх, хэушъхьафыкIыгъэу, игъэкIотыгъэу ахэм уакъытегущыIэныр ыкIи зэкIэ адыгэхэм ябгъэшIэныр игъо шъыпкъ. Мыщ дэжьым къыхэгъэщыгъэн фае пытэпIэжъыр ижъыкIэ зэрэщытыгъэм тетэу, зэхъокIыныгъэшхохэр фэмыхъугъэхэу тилъэхъанэ къызэрэнэсыжьыгъэр.
Нарт пщыналъэмэ чIыпIабэмэ ацIэхэр къахэфэх. Iалэджыпщыр зыдэсыщтыгъэ пытэпIэжъым щыублагъэу. Пщыщэ ипсыпэ Пшызэ зыщыхэлъэдэжьырэм нэсэу нэпкъхэм нарт хъишъэм хэт чIыпIэхэр ащыIэх. Ахэми, нэмыкI саугъэтхэми ацIэхэр къетIоных, такъытегущыIэн.
[caption id="attachment_72101" align="aligncenter" width="800"] Хъудымыжъ иуджыпI. Къунчыкъохьаблэ ыгузэгу Гъыщмэ яхапIэ хэт.[/caption]Дэнджыу бжъап. Пщыщэ иджабгъурэ бгышъхьэ нэпкъ лъэгэ кIыхьэу станицэхэу Бжедуховскэмрэ Рязанскэмрэ азыфагу къыриубытэрэр Шытхьалэ (Белореченскэ) районым икъохьапIэкIэ ыгъун. Мы чIыпIэм Дэнджыу бжъап е Кургъо там раIо. Тилъэхъанэ мы станицитIумэ азыфагу а бгы цакIэм къутыр цIыкIоу Гливенкэр тес. Ащ итемыркIэ нарт Iалэджыпщыр зыдэсыщтыгъэ пытэпIэжъыр къыпыщыт шъыпкъ. Ары Ижъырэ Адыгеим итарихъ гупчэу къыхэдгъэщыжьыгъэр. Мыр пытэпIэ ухъумапIэщтыгъэ, къыблэмкIэ зы дэхьэпIэ закъо фашIыгъагъ, ащ кукIэ удэкIоеныр къин хьазырэу, дысэу гъэпсыгъэ. Джыри мы гъогу лъэгъо закъор ары узэрэдэхьащтыр. ЫпэкIэ къызэрэтIуагъэу, пытэпIэжъым изытет ижъыкIэ зэрэщытыгъэм фэдэу къызэтенагъ. Тилъэхъанэ уни пкъэуи зыпари рагъэуцуагъэп.
Дэнджыу бгышъхьэ зэныбжь, жъокIупI, губгъо хъоо-пщау. ПсыхъомкIэ гъэзэгъэ лъэныкъор нэпкъ лъэгэ занд, гъуй шъхьэндэ IужъухэмкIэ, чъыгхэмкIэ зэхэкIыхьагъэхэу хъотэшхо куухэм зэпабзы. А Кургъо тамэ, Пщыщэ бгышъхьэ, чылэжъхэу Бэжъуйрэ Къутэмэгурэ тесыщтыгъэхэу къэбарыжъхэм тагъэ- гъуазэ, ау ахэр зыдэщыIэхэр дгъэунэфыжьынхэу хъугъэгохэп.
[caption id="attachment_72099" align="aligncenter" width="800"] Iалэджыпщым икъуаджэ дэхьэпIэ закъоу иIэр.[/caption]Iалэдж ихэпIагъэр. Нарт пщыналъэмэ зэрахэтымкIэ, Пщыщэ иджабгъурэ бгышъхьэ лъагэ, Дэнджыу бжъапэ, нарт Iалэджыпщым иунэу тхьэ щэкI (метрэ 30 фэдиз) зикIыхьэгъагъэр чыжьэкIэ къэлъагъоу тетыщтыгъэ. КъызэраIотэжьырэмкIэ, хэсищыр: Хэку Хасэр, Ны Хасэр, ЖъыукI Хасэр мыщ щызэфэсыщтыгъэх. Унэшхор зыдэтыгъэ хапIэр Iошъхьэшхо лъагэу, плIэмыяшъоу, шыгуитIоу чIыопсым ыгъэпсыгъ. А бгышъхьитIумэ азыфагу иуфэнагъэу къэлъагъо. Мы ижъырэ пытапIэр Пщыщэ иджабгъурэ бгышъхьэ лъагэ хэушъхьафыкIыгъэу къыхэщы. Ыбгъухэр зандэх, хъоу куушхокIэ къэгъэгъунагъ. КъокIыпIэмкIэ гъэзэгъэ шыгур нахь шъуамбгъу ыкIи нахь лъаг, къохьапIэмкIэ щыIэр — нахь лъхъанч. КъокIыпIэмкIэ ыбгъу зэндэрыкъ, мэкъупIэ, уц дэгъухэр къытекIэх, шъхьэндэ куашэхэр тетых. Iужъоу зэхэкIыхьэгъэ хъотэшхом ыкIыб метри 150-кIэ пэчыжьэу асфальт гъогу шъофымкIэ блэкIы. Ащ мафэ къэс ебгъукIорэ гъогурыкIохэм зэхэкIыхьэгъэ кIырхэм пытэпIэжъыр арагъэлъэгъурэп.
ХэпIэ тхыцIэм къутырым щыщхэм яхэтитIу телъ. Къошын къутэфэ зэфэшъхьафхэу хъоеу къычIажъукIыгъэу хэлъхэм къызэраушыхьатырэмкIэ, мыжъо лIэшIэгъум икIэухым къыщыублагъэу цIыфхэр, илъэс мин пчъагъэхэм зэпымыоу, мыщ щыпсэугъэх. Арышъ, зэрэхъурэмкIэ, Iалэджыпщым ихэпIагъэр, къатыбэу зэтехъуагъэу, ижъырэ археологие саугъэт.
ПсэупIэжъым икъохьэпIэ лъэныкъо, Дэнджыу кIэи, бгы зандэ къое-чIэежъышхо ехы. Енэгуягъо мыркIэ жъыукIым ращалIэщтыгъэхэр зэрадзыхыжьыщтыгъэхэр. Нарт Жъэмадыу иIоф жъыукIым зыщыхагъэкIым, а хъотэжъыр арынкIи хъун зыдадзэжьыгъагъэр. Лъэпкъыр бэрэ хэзыщыжьыгъэу, шIогъабэ фэзышIэгъэ Жъэмадыу зэраукIыгъэр Саусэрыкъо зешIэм, нартхэм ахэзэухьи жъыукIыныр харигъэнэгъагъ.
Кургъо мэз щыщэу рамыупкIыгъагъэм пытэпIэжъыр къеухъурэи. Джыри хьэкIэ-къуакIэхэр зэрэхэсхэм ишыхьатэу цызэхэм чъыгхэр къачъыхьэх. Iалэджыпщым ихэпIагъэр зыдэщытыри, пэблэгъэ чIыпIэхэри дэхэ дэдэх, язытетэу къызэрэзэтенагъэхэмкIэ, чIыопсым исаугъэт пшIыгъэми ухэукъощтэп.
Ижъырэ Черкесием игупчэ, нартхэм яхэсэ зэфэсыпIэщтыгъэм, хъугъэ-шIэгъабэ щыхъугъ. Iалэджыпщымрэ ащ ишъхьэгъусэу БэтIынэрэ хасэмэ ятхьаматэщтыгъэх. Апхъу закъоу Iакуандэ-Дахэр нарт эпосым анахь пшъэшъэ дахэу къыхафэрэмэ ащыщ. Псэлъыхъуабэу къыфакIощтыгъэмэ къэлэпчъэ дэхъэгъур псынжъ куоу, ухэнэнкIэ щынагъоу, яшыхэм зэхаутыхьэгъагъ. Пшъашъэм епсэлъыхъонхэу къэкIогъэгъэхэ Шэбатныкъорэ Саусэрыкъорэ Iалэджыпщым шъхьакIо зарехым, пщым ичылэ цIыф къыдамыгъэкIэу, даубытэгъагъэх. Iалэджыпщыр шъэфэу Лъэпшъ дэжь кIуи, щэмыохъуитIу къыригъэшIыгъагъ. КъэкIожьызэ, шым къыридзыхи зы щэбзащэр зэпикIыгъагъ. Нарт пщыналъэмэ къызэраIорэмкIэ, адрэ къыфэнэгъагъэмкIэ Iалэджыпщым пытэпIэжъым ылъапэ нарт Шэбатныкъо щиукIыгъ. Джыдэдэм пытапIэм узэрэдахьэу сэмэгубгъумкIэ чъыгышхомэ Iошъхьэ закъо ачIэт, арынкIи хъун Шэбатныкъо икъэ. Къутырым дэсхэм якъэхалъэ ащ тырашIыхьагъ. Къащхэмрэ къэнэтIэхэсхэмрэ зэфэдэкIэ тетых.
Аужырэ нартэу чIыгужъым къинэжьыгъэгъэ Уачэ Iалэдж иунэ чIэсыжьыгъагъэу къаIотэжьыгъ. ЗыщылIэщт уахътэр Уачэ ешIэти, Пакукъо Тэтэршъао къелъэIужьыгъагъ ыгъэтIылъыжьынэу. ЗыфиIогъэ уахътэм Iалэдж иунэ зэкIом, Уачэм ыпсэ хэкIыгъэу джэхашъом телъэу Пакукъом къыгъотыжьыгъагъ ыкIи а хапIэм щигъэтIылъыжьыгъ, нартмэ ямылъкуи къыфэнэжьыгъагъ.
[caption id="attachment_72098" align="aligncenter" width="800"] Нарт Шэбатныкъор (Бадынэкъор) Iалэджыпщым зыщиукIыгъэ пытэпIэжъ лъапэр.[/caption]Дэнджыу бгышъхьэ ехырэ гъогур. Къутырэу Гливенкэр зэпызычырэ урам закъор итемыр-къохьапIэкIэ етIэ гъогуитIоу зэгокIы. ДжабгъумкIэ зыр пытэпIэжъым дэхьэ, адрэр сэмэгумкIэ егъазэшъ, чыжьэу бгышъхьэм ехы ыкIи лъэгуанэм ит Кургъо мэз хэкIуадэ. Мычыжьэу мыщ дэжьым мэзым пхырычъырэ Пщыщэ иджабгъукIэ Дэнджыу ихьалыгъуанэ къыдэчъэхышъ, бгы лъапшъэм къеуцуалIэ.
Дэнджыу псыхъожъыер. Мыщ фэдэ псыхъо чIыпIацIэмэ афэгъэхьыгъэ гущыIалъэмэ адагъэхьагъэп. Зыхэт закъор нарт къэбархэр ары. Ащ Дэнджыу ыцIагъэми къашIэжьырэп, ау ащ ыцIэкIэ бгышъхьэм Дэнджыу бжъап фаусыгъ. ИжъыкIэ Кургъо мэз зэрыт лъэгуанэм Дэнджыу псыхъожъые ихьалыгъуанэу Пщыщэ къыхэчъырэр бгышъхьэ лъапшъэм къычIэуцощтыгъэ, ащ готэу заулэрэ кIоти, етIанэ зыIуищэити, зиIуантIэмэ, зищантIэзэ кIэй темэнылъэм хэкIодэжьыщтыгъэ. А темэныр я XX-рэ лIэшIэгъум ия 60-рэ илъэсхэм агъэгъушъи, пындж лэжьыпIэ ашIыгъагъ.
Джырэ лъэхъаным псыхъожъыер тамбыкIэ зэпырагъэIыгъ, псыр рычъэжьырэп: псыуцхэмрэ къамылхэмрэкIэ лъэшэу зэхэкIыхьагъ, чIыпIэ-чIыпIэу псы шъоф зырызхэр иIэх.
Гъобэкъуае дэс нэжъ-Iужъхэм непэ къызэраIуатэрэмкIэ, темэныр агъэгъушъы зэхъум хъуатэхэр зытIыщтыгъэ тракторымкIэ иныжъым ышъхьэ къычIагъэщыгъагъ. Ащ цIыфым илъэгагъэ фэдиз иинэгъагъ. Къагъотыгъэр шIэныгъэлэжьхэм зашIэкIэ, яIофшIэнхэр зэтырагъэуцонхэшъ, пынджыпкъыр арамыгъэшIынкIэ енэгуйи, колхоз тхьаматэм къупшъхьэхэр чIаригъэгъэбылъыхьажьыгъагъэх. Ащ нэмыкIэу, къызэраIорэмкIэ, темэныр агъэгъушъы зэхъум пкъэушхохэр къыхагъэщыгъагъэх. Нарт къэбархэм ахэм афэдэ пхъэшхохэр Iалэджыпщым иунэ кIэсэнэу иIагъэх.
ЧIыпIалъэм тарихъ гъэшIэгъон пылъ, ау шIэныгъэлэжьхэр ащ джыри нэсыгъэхэп. Ушэтынхэр ащ щыпшIымэ, Тхьэм ышIэн ащ хьаламэтэу къыщычIэщыщтыр.
Кургъо мэз щыщэу лъэгуанэм щырамыупкIыгъэу къинагъэм Пщыщэ инэпкъитIу зэлъеубыты. Чъыгышхохэр хэтых, кIыры. Краснодар псыIыгъыпIэр ашIынэу зыфежьэхэм, IэрышI хым чIэбыщт Кургъо мэз инахьыбэр зытыраупкIым, мыщ дэжьым псыр къынэсынэу щытыгъэпти, чъыгхэр къагъэнэгъагъэх. ХьамышхунтIэу къыхэкIагъэхэр шъхьэндэ къодыехэп, ныбжьышхо яIэу, ягъумагъэкIэ чъыг шъыпкъэх.
Iалэджыпщым ичылэжъ 2014-рэ илъэсым Даур Хъусенрэ сэрырэ къыхэдгъэщыжьыгъ. Нэужым игеографие координатхэр GPS приборымкIэ дгъэунэфыгъэ.
Къошко дэкIыгъор. Гъобэкъуае пэчIынатIэу Пщыщэ инэпкъ лъагэ, джырэ станицэу Рязанскэр зытес бгышъхьэм, хъотэшхоу ехы. Къэбарыжъхэм зэрахэтымкIэ, а тIуакIэр къохъусэжъым диутыгъ. Аужырэ нартэу къэнэжьыгъэгъэ Уачэ, ятэ осыет къыфишIыжьыгъагъэти, ар къыушэкIужьыгъагъ.
Лъэпшъ икIыщ лъачI. КъызэраIотэжьырэмкIэ, Гъобэкъуае пэчIынатIэу Пщыщэ иджабгъу псырыкIым инэпкъ ар тетыгъ. ЧIыпIэм «Лъэпшъ икIыщ лъачI» аIозэ еджэх. А чIыпIэм джы чырбыщ заводыжъыр щыт. Iалэджыпщым ипытэпIэжъ къокIыпIэмкIэ мыщ километритIукIэ пэчыжь.
Лъэпшъ зыщыгъукIэщтыгъэр Адыгеим ичIыпIэ заулэмэ къащагъэлъагъо.
ЯтIонэрэ чIыпIэр Пэнэжьыкъуае икъыблэкIэ ПкIашъэ Iус къутырэу Кочкиным дэжь щыт мэзыр.
Нарт Бгъэбзыу. Къунчыкъохьаблэ икъокIыпIэкIэ Пщыщэ уикIэу, кIэир зэпыпчымэ, бгышъхьэм узэрэдэкIуаеу Бгъэбзыу зытесыщтыгъэ псэупIэжъэу жъокIупIэм хэтым уIокIэ. Ащ итемыркIэ къутырэу Фокинэр зы километрэрэ ныкъорэкIэ пэчыжь. «Нартхэм» яяблэнэрэ том ия 140-рэ нэкIубгъо мары зэритхагъэр: «Моу Пщыщэ узэпырыкIэу Фокинэм дэжьыджэ узыдэкIуаеджэ бгышъхьэшкоу иIэм Бгъэбзыу тесытыгъ». МыутIэхэм ялъэхъан ашIыгъэгъэ къошынхэм якъутафэхэр ащ хъоеу телъых. Гурыт лIэшIэгъум къыхиубытэхэрэри ахэолъагъох. ПсэупIэжъым икъокIыпIэкIэ мычыжьэу Iошъхьэшхо жъуагъэм хэт. Ар Лъэгуц-ЖакIэм ыкъомэ язырэм икъэ Iуашъхь.
Лъэгуц-ЖакIэм ичылэ зыдэщысыгъэр. Белореченскэ районым ит къутырэу Беляевскэр джы зыдэщысым икъохьапIэкIэ нарт Лъэгуц-ЖакIэм ичылэ щысыщтыгъэ. Пщыщэ иджабгъу нэпкъ мы чIыпIэм нахь лъхъанчэ щэхъу ыкIи Краснодар псыIыгъыпIэм еуцуалIэ. Беляевскэм икъыблэкIэ километриплIэу пэIудзыгъэу Пщыщэ исэмэгу нэпкъ Къунчыкъохьаблэ тес.
Лъэгуц-ЖакIэм ыкъомэ яIуашъхьэхэр. Белореченскэ районым ит станицэу Рязанскэм удэкIэу итемыр-къохьапIэкIэ километрих фэдизэу асфальт гъогумкIэ узыкIокIэ, къутырэу Фокинэм унэмысыпэзэ, сэмэгумкIэ Iошъхьэшхоу зышъхьашъо зэныбжьэу хъураеу жъокIупIэм итыр къэлъагъо. Ащ пэчIынатIэу, джабгъумкIэ гъогум пэмычыжьэу, чъыгхэмрэ шъхьандэхэмрэ ышъхьашъо зэлъаубытэу, къэгъэсэишхо щыт. Ащ ыкIыбкIэ, мэз шъолъырмэ зэпабзырэ губгъошхом, зэкIэлъыкIохэу Iошъхьитф ит. Лъэгуц-ЖакIэм ыкъомэ якъэхэлъэ Iуашъхьэхэр блы мэхъух.
«КъызэраIотэжьырэмкIэ, зэшыхэр шэкIоным лъэшэу пыщэгъагъэх, ау анахьыкIэм инасып нахь хэлъэу, зэшихымэ анахьыбэ къыушэкIущтыгъэ. Нахьыжъхэр ешъугъущтыгъэх. Зэгорэм къесыгъакIэу анахьыкIэр дэкIыгъ. Адрэхэри шакIо ежьагъэх. Мэфэ реным зэшыхэм зыпари къамыушэкIугъэу, пшъыгъаехэу къэкIожьхэзэ, ашынахьыкIэ лэучэцI укIыгъэ ыпашъхьэ илъэу, шъхьаукъэу чъыгым кIэрысэу шъхьарыхьагъэх. Ягухьэ-гужъ къызэкIани, язырэм щэмрэ бзэмрэ зэIуилъхьи еуагъ. Щэбзащэр чъыгым тефи, кIалэр къыгъэущыгъ. Къызыщылъэти, шым зыридзи, къыкIиIагъ. Адрэхэр лъежьагъэх. Зылъигъачъэхэзэ хьэкIапсэ (ижъырэ зэокIэ шIыкI) ышIи, зэкIэкIищыгъэх, къытыригъази ышнахьыжъих зырызэу ыукIыгъэх, ежьыри хьадэгъущэ тефагъэти, ыпсэ хэкIыгъ. Нарт кIалэхэр зыщыфэхыгъэхэм щагъэтIылъыжьхи, Iуашъхьэхэр атырашIыхьагъэх».
Дзэгъащтэ зыкъосыгъэр. Къунчыкъохьаблэ икъыблэ-къокIыпIэкIэ Пщыщэ ипсыхьалыгъонэжъ лъэшэу кIэим зыщеIуантIэ. А псыхъом ыгъэпсыгъэ къуачIэм, Бгъэшэтыку, Дзэгъащтэ зыдэсыгъэ чылэр итыгъ. Мы чIыпIэм Кургъо мэз Iужъоу къикIэщтыгъэ. РаупкIыгъэу жъокIупIэ губгъошхо иI. Тилъэхъанэ, я XX-рэ лIэшIэгъум ия 30-рэ илъэсхэм, псыхъо хьалыгъуанэр аузэнкIи, Къунчыкъохьаблэ икъокIыпIэ, Мыжъокъущым, нагъэсыгъ.
НэкушIои иIуашъхь. Къунчыкъохьаблэ икъыблэкIэ къэлъагъорэ мэзым икъокIыпIэкIэ пэмычыжьэу шъоф лэжьэкIупIэм Iошъхьэ закъоу ит. Гъэ къэс ышъхьашъо ажъо. «Нарт НэкушIой ащ ышъхьагъ хэчъыягъэу телъэу Саусэрыкъо зырехьылIэм, зэкIоцIипхагъ. Къэущи къызэплъэм, зэрэ Саусэрыкъор къышIагъ. ЗыкъыригъэтIэтэжьы шIоигъоу къызелъэIум, Iуагъэ зэдашIымэ къытIэтэжьыщтэу ыгъэгугъагъ. Зэзэгъыхи, НэкушIои стхъумбыл чъыгышхо риупкIыгъ, куахьибл ифэу хьэкъуашъо ышIи, ащкIэ щыгъу къыригъахьыгъ».
Хъудымыжъ иуджыпI. Къунчыкъохьаблэ ичылэгу шъыпкъэ, Гъыщхэм яхэтэ гузэгу, Хъудымыжъ иуджыпIэ ит. Хъураеу иубыкIыгъэ мэшэшхом ыкIоцI Iошъхьэ лъхьанчэ къыхэщы. Хатэр илъэсыбэрэ ажъуагъэти, Iошъхьэ шыгур тешъо хъугъэ. Къошын къутафэхэу ащ ыкIоцIрэ хатэмрэ къахэкIыхэрэмкIэ лъэхъанэу загъэпсыгъэщтыр джэрз лIэшIэгъур ары. Енэгуягъо мыр Мыекъопэ культурэм хэхьэрэ археологие саугъэткIэ. ИгъэпсыкIэкIэ зэрэтхьэлъэIупIагъэр гъэнэфагъэ. Пщыщэ исэмэгубгъу джырэ унагъохэр зытесхэм къыщыхэдгъэщыгъэ ижъырэ псэупIэу джэрз лъэхъаным щыIагъэм епхыгъэн ылъэкIыщт. А лъэныкъомкIэ къикIэу Хъудымыжъ иуджыпIэ дэхьапIэ иI.
ГъучIыпцIый Iуашъхьэ Лъэпшъ чIалъхьажьыгъагъэу хъишъэм хэт. Краснодар псыIыгъыпIэр ашIы зэхъум Едэпсыкъуае зыдэщысыщтыгъэм ар щатIыгъагъ.
ШыкIэкI иIуашъхь. Пэнэжьыкъуаерэ Адыгэкъалэрэ азыфагурэ гъогумкIэ псыхъожъыеу Шэндыкъо узэрикIэу, километритIу фэдизэ узыкIокIэ, сэмэгубгъумкIэ Iошъхьэ ин закъоу жъокIупIэ хъоо-пщаум итыр къэлъагъо. Ар нарт ШыкIэкI иIуашъхь, метрибл фэдиз илъэгагъ, гъогум метрэ шъиплI фэдизкIэ пэчыжь. Тыдэрэ лъэныкъокIи къэплъэгъоу лъэгапIэм тет, ышъхьашъо зэфэдэкIэ илъэс къэс ажъо, етIагъэхэу уж иIэп. Археологхэм зэрагъэунэфырэмкIэ, мыщ фэдэ Iошъхьэ закъохэу анахь лъэгапIэмэ атетхэм ныбжьышхо яI. Лъэхъанэу зэхьылIэгъэщтыр джэрз лIэшIэгъум иублапI, Мыекъопэ культурэм хэхьэрэ уахът, илъэс 4000 – 5000 фэдизкIэ узэкIэIэбэжьмэ.
Тэу Аслъан. АР-м Лъэпкъ музей шIэныгъэмкIэ иIофышIэ шъхьаI, Урысыем ижурналистхэм я Союз хэт.