БгъэлъапIэрэр къыотэжьы
Адыгабзэмрэ тхыбзэмрэ я Мафэ фэгъэхьыгъэ зэхахьэу Адыгэ Республикэм и Къэралыгъо филармоние щыкIуагъэр лъэпкъ шIэжьым итарихъ къыпкъырэкIы, щыIэныгъэм лъагъоу щыпхырищырэм уегъэгъуазэ.ЛIэуж зэфэшъхьафхэр зэфэзыщэгъэ зэхахьэр Адыгэ Республикэм изаслуженнэ журналистэу ТIэшъу Светланэ зэрищагъ. Ащ ипэублэ гущыIэхэр лъэпкъ тхыбзэм лъапсэ фэзышIыгъэ шIэныгъэлэжьэу Бэрсэй Умарэ, адыгабзэм тамэ езытыгъэ тхакIохэм яусэхэм яхьылIэгъагъэх.
КIэлэцIыкIу театральнэ зыгъэсапIэу «Щыгъыжъыем» хэтхэм адыгабзэм изэгъэшIэн, игъэфедэн афэгъэхьыгъэ едзыгъохэр узыIэпащэу къашIыгъэх. Адыгабзэм лъэпкъыр зэрэзэфищэрэр Хьаджэбыекъо Адыиф, Шыхъостанэхэу Аминэтрэ Камилэрэ, Хьаужьыр Дианэ, МэщфэшIу Гунэф, КIубэхэу Аланрэ Дамиррэ, Цопсынэхэу Эльбрузрэ Налбекрэ, Беданыкъо Тембот, нэмыкIхэм театрализованнэ пычыгъохэм къащагъэлъэгъуагъ. Художественнэ пащэу Уджыхъу Марыет пIуныгъэ амалышIухэр зэригъэфедэхэрэр зэхахьэм къыщыхэщыгъ.
Общественнэ IофышIэу МэщфэшIу Нэдждэт, шэнышIу зэрэфэхъугъэу, адыгэ лъэпкъэу дунаим щитэкъухьагъэм иныдэлъфыбзэ къызэриухъумагъэр, шэн-хабзэхэр щыIэныгъэм зэрэщыпхырищыхэрэр усэхэмкIэ къыIотагъ. Ным игущыIэхэр гум зэримыкIыжьыхэрэр зэгъэпшэнхэм къащыхигъэщыгъ.
Къэралыгъо телерадиокомпаниеу «Адыгеим» ижурналистхэу Аджырэ Замирэ, ГъукIэлI Сусанэ, Беданыкъо Замирэ, Унэрэкъо Гулэз ижъырэ адыгэ гущыIэ щэрыохэу щыIэныгъэм епхыгъэхэр къызэраIуагъэхэр сыда зымыуасэр?! Тинахьыжъ пIашъэхэм тхакIи, еджакIи амышIэщтыгъэми, лъэпкъ гупшысэр пхыращызэ, къытфагъэнэгъэ гущыIэ щэрыохэм уагъасэ, уапIу, щыIэныгъэм уфащэ. ГущыIэжъхэр зэгъэфагъэхэу, гурыIогъошIухэу, зыщищыкIагъэм театральнэ пычыгъохэр къэшIыным зэрэщагъэфедагъэхэм къеушыхьаты тиадыгабзэ зэрэбаир.
Зэхахьэм зэрэщыхагъэунэфыкIыгъэу, тиадыгабзэ дунаим тет бзэ анахьыжъхэм ахалъытэ. «Щыгъыжъыем» фэдэ театрализованнэ зыгъэсапIэхэр тиIэхэу, журналистхэм пэсэрэ гущыIэ щэрыохэу къаIуагъэхэр зэхэпхыгъэхэу «адыгабзэр мэкIоды» зыIохэрэм адедгъэштэн тлъэкIыщтэп, ахэр лъэ-шэу хэукъох.
Бзэр — псэ
Адыгабзэр щыI, тэгъэфедэ, тырэгушхо. Адыгэ Республикэм и Къэралыгъо филармоние иорэдыIохэу Баджэ Дзэхъанэ, Нэгъой Маринэ, Нэгъой Бэллэ лъэпкъ орэдхэр зэхахьэм щагъэжъынчыгъэх. Гупшысэ куум, шIулъэгъу къабзэм яхьылIэгъэ орэдхэр щыIугъэх. Набэкъо Бэллэ фортепианэмкIэ къадежъыугъ.
Советскэ Союзым и ЛIыхъужъэу Андырхъое Хъусен къызыхъугъэр илъэси 100 зэрэхъугъэр республикэм игъэкIотыгъэу щыхагъэунэфыкIы. ЗэхэщакIохэм ар къыдалъыти, Хъ. Андырхъуаем иусэхэм къяджагъэх. Жэнэ Къырымызэрэ Тхьабысымэ Умаррэ зэдаусыгъэ орэдэу Андырхъое Хъусен фэгъэхьыгъэр артистхэм къыхадзагъ. Зэхахьэм хэлажьэхэрэр артистхэм къадежъыугъэх, Iэгу афытеуагъэх.
Адыгабзэр, адыгэ хабзэр псынэкIэчъ къабзэм фэтэгъадэх. Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм ипащэу ЛIыIужъу Адам, медицинэм иIофышIэ цIэрыIоу Жэнэ Аскэр, зэлъашIэрэ тхакIоу Цуекъо Юныс, гъэзетэу «Адыгэ макъэм» иредактор шъхьаIэу Дэрбэ Тимур, республикэм гъэсэныгъэмрэ шIэныгъэмрэкIэ и Министерствэ икъулыкъушIэу Мамый Марыет, Адыгэ къэралыгъо университетым адыгэ филологиемрэ культурэмрэкIэ ифакультет ипащэу Хьамырзэкъо Нурыет, республикэ общественнэ движениеу «Адыгэ Хасэм» игъэцэкIэкIо куп хэтэу Болэкъо Аслъан, бзэхэр зыщызэрагъэшIэрэ Гупчэу «Активым» ипащэу Едыдж Мэмэт, хэкужъым къэзыгъэзэжьыгъэ тхэкIо цIэрыIоу Енэмыкъо Мэулид, нэмыкIхэу гущыIэгъу тызыфэхъугъэхэм тагъэгушхуагъ.
Зэхахьэм общественнэ-политикэ мэхьэнэ ин иIэу алъытагъ. Бзэр щэIэфэ лъэпкъыр зэрэщыIэщтыр яIэубытыпIэу рагъэжьэгъэ IофшIэныр зэрэлъагъэкIотэщтым тицыхьэ телъ.
Анахь дэгъоу зытхыгъэхэр
Адыгэ республикэм диктантыр щызытхыгъэхэм яшIушIагъи зэхахьэм къыщаIотагъ. Нэбгыри 110-м щыщэу 21-мэ «5» афагъэуцугъ. ГъэшIэгъоныр зы хэукъоныгъэ хэзымышIыхьагъэу къыхахыгъэм ипчъагъи зэрэбэр ары. Нэбгырэ 13 ахэр мэхъух.
Дунэе Адыгэ Хасэм ищытхъу тхылъхэр диктантыр анахь дэгъоу зытхыгъэхэм Болэкъо Аслъан аритыжьыгъэх, шIоу щыIэр къадэхъунэу афиIуагъ. ЗыцIэ къыраIуагъэхэм афэгъэхьыгъэ тхыгъэхэр къыхэтыутыщтых.
ЕмтIылъ Нурбый. Сурэтхэр зэхахьэм къыщытетхыгъэх.