Адыгабзэм иухъумакIу
КIэлэегъадж. Мы гущыIэм нэбгырэ пэпчъ ежь мэхьэнэ гъэнэфагъэ реты. ЗыхэмкIэ — ар ным фэд, адрэхэмкIэ — шIэныгъэ языгъэгъотырэ цIыф, ящэнэрэхэмкIэ — щыIэныгъэм илъэгъотещ.
Непэ зигугъу къэсшIымэ сшIоигъо Анзэрэкъо Светланэ Аскэрбый ыпхъум а гущыIэ пстэури фэгъэхьыгъ, ар кIэлэегъэджэ шъыпкъ, исэнэхьат хэшIыкIышхо фызиIэ специалист. Ищытхъу аригъаIозэ илъэс пчъагъэм Адыгэ кIэлэегъэджэ колледжым (училищым) адыгабзэмкIэ икIэлэегъаджэу Iоф щишIагъ. Непэ къызнэсыгъэми ригъэджагъэхэм шIукIэ агу къэкIыжьы, шъхьэкIэфэныгъэшхо фашIы. ИIофшIэнкIи, ищыIэныгъэ еплъыкIэкIи, изекIуакIэкIи ащ фэдэ фыщытыкIэр къызэрилэжьыгъэм щэч хэлъэп. Адыгабзэм изэгъэшIэн, икъэухъумэн ары анахьэу зыпылъыр. НыбжьыкIэхэм, студентхэм ямызакъоу, тиIэшъхьэтетхэми ныдэлъфыбзэр аIулъэу рыгущыIэнхэм сыдигъуи мэхьанэшхо ритыгъ.
— Сыд фэдэрэ цIыф лъэпкъи къыкIурэ гъогур ыбзэ епхыгъ. Лъэпкъыр багъомэ, бзэми зеужьыжьы, хахъо ешIы, лъэгапIэ горэми нэсы. Сыд фэдиз къин лъэпкъым ылъэгъугъэми, сыд фэдизрэ кIодыпIэ ифэми, бзэм ахэр дещэхых. Адыгабзэм фэгъэхьыгъэу анахь хъугъэ-шIэгъэ иныр къэралыгъуабзэ зэрэхъугъэр ары. Ар лъэгапIэ гор, ау ащ пытэу утетыныр зыIэ илъыр тэры — ар зиныдэлъфыбзэхэр ары, — еIо Светланэ.
Анзэрэкъо Светланэ лъэпкъ просвещением иотличник, АР-м лъэпкъ гъэсэныгъэмкIэ изаслуженнэ IофышI, Урысыем гъэсэныгъэмрэ шIэныгъэмрэкIэ и Министерствэрэ АР-м и Парламентрэ ящытхъу тхылъхэр, Адыгеим и ЛIышъхьэ ирэзэныгъэ тхылъ, нэмыкI щытхъуцIэхэр, тын лъапIэхэр бэу къыфагъэшъошагъэх, IофшIэным иветеран. Лъэпкъ проектэу «Гъэсэныгъ» зыфиIорэм къыдыхэлъытагъэу кIэлэегъаджэхэм азыфагу щызэхащэгъэ зэнэкъокъум 2008-рэ илъэсым текIоныгъэ къыщыдихыгъ.
Ныдэлъфыбзэр шIу алъэгъуным, ащ дахэу рыгущыIэнхэм ыкIи хэукъоныгъэ хэмытэу тхэнхэм фэзыщэгъэхэ Анзэрэкъо Светланэ инэу фэразэх республикэм щызэлъашIэхэрэ журналистхэу Дэрбэ Тимур, ТIэшъу Светланэ, ХьацIэцIэ Ларисэ.
— Гурыт еджапIэм тыщезыгъэджэгъэ ШъэоцIыкIу Арамбый Якъубэ ыкъом адыгабзэр дэгъоу тигъэшIагъэ, къытIуилъхьагъ. Я 8-рэ классыр къэсыухи, Адыгэ кIэлэегъэджэ училищым сызычIахьэм, синасып къыхьи, Анзэрэкъо Светланэ Аскэрбый ыпхъум сытефагъ. Тиадыгэ тхакIохэм ятхыгъэхэр нахь куоу зэдгъэшIэнхэм, зэхэтфынхэм, ныдэлъфыбзэр шIу тлъэгъуным ыкIи къэтыухъумэным ащ тыфищагъ, зэрифэшъуашэу, мыпшъыжьэу Iоф къыддишIагъ. ТикIэлэегъаджэхэм шIэныгъэу къытатыгъэр ары непэ тиIофшIэн щыдгъэфедэрэр, тиIэубытыпIэр. Арышъ, Светланэ Аскэрбый ыпхъум инэу сыфэраз, псауныгъэ пытэ иIэу, ибын-унагъо датхъэу щыIэнэу сыфэлъаIо, — еIо гъэзетэу «Адыгэ макъэм» иредактор шъхьаIэу, АР-м изаслуженнэ журналистэу Дэрбэ Тимур.
Мы кIэлэегъэджэ шIагъом ригъэджагъэхэм сэри сащыщ. Сыдигъуи сщыгъупшэрэп кIэлэегъэджэ училищым чIэхьагъэхэм сахэтэу тикуп ипащэу агъэнэфэгъэ Светланэ Аскэрбый ыпхъум нэIуасэ сызэрэфэхъугъагъэр. Илъэс 14 — 15 зыныбжь кIэлэ Iэтахъохэм уагурыIоныр, жабзэ къадэбгъотыныр псынкIэп. Ау а пшъэрылъыр зэрифэшъуашэу тикIэлэегъаджэ зэшIуихыгъ. Нэбгырэ пэпчъ екIолIэкIэ гъэнэфагъэ къыфигъотыщтыгъ, сэмэркъэушхо хэлъэу, ным фэдэу шъабэу къыддэгущыIэщтыгъ, ымакъэ къымыIэтэу мытэрэзыгъэу къытхэфагъэр къыдгуригъаIощтыгъ. АщкIэ сыдигъуи тыфэрэзагъ, непи арэущтэу щыт. Адыгабзэр ежь шIу зэрилъэгъурэм, ыгу зэрэфэузырэм фэдэу тэри ащ уасэ фэтшIыным ынаIэ тетыгъ. Уиныдэлъфыбзэ урыгущыIэн, урытхэн, къэуухъумэн зэрэфаер ащ тигъэшIагъ. Светланэ непи бэмэ упчIэжьэгъу афэхъу, опытышхоу IэкIэлъымкIэ адэгуащэ.
ХьацIэцIэ Ларис — Адыгэ къэралыгъо телевидением иинформационнэ къулыкъу ишеф-редактор, АР-м изаслуженнэ журналист:
— Андырхъое Хъусен ыцIэ зыхьырэ кIэлэегъэджэ колледжым сызэрэщеджагъэр насыпыгъэу зыфэсэлъэгъужьы. Ар сэзыгъаIорэм ителъхьэпIэ шъхьаIэр тезыгъэджагъэхэр ары. Тызэрэадыгэ группэм къыхэкIэу ныдэлъфыбзэм изэгъэшIэн мэхьанэ ин ратэу тидесэхэр зэхэщэгъагъэх. ИлъэсиплIым къыкIоцI адыгабзэмкIэ тикIэлэегъэджагъ Анзэрэкъо Светланэ. ТиныдэлъфыбзэкIэ къабзэу тытхэу, IупкIэу теджэу ыкIи дгъотыгъэхэ шIэныгъэхэмкIэ еджапIэм щедгъэджэшъунхэу тызгъэсагъэр Светлана Аскэрбый ыпхъур ары. Ащ десэхэр зэрэзэхищэщтыгъэ шIыкIэхэм яхьатыркIэ къин къытщымыхъоу теджагъ. Адыгабзэм играмматикэ нахь гурыIогъошIу къытфэхъунымкIэ щысэу къытфихьыщтыгъэхэр джы непэрэ мафэхэми тиIофшIэнкIэ къытшъхьапэжьых. Информационнэ къэтынхэу «Къэбархэр» эфирым фэдгъэхьазырхэу, текстхэм сяджэжьы зыхъукIэ, тикIэлэегъаджэ тыгу рытигъэубытагъэхэ шапхъэхэм бэрэ къафэсэгъэзэжьы. КIэлэегъэджэ колледжыр къызысыухыгъэм къыщегъэжьагъэу ныдэлъфыбзэм Iоф рысэшIэ, аущтэу зэрэхъугъэм Анзэрэкъо Светланэ иIахь ин хэлъэу сэлъытэ ыкIи сырыкIэгъожьыгъэу мафэ къыхэкIыгъэп. Сыфэраз сикIэлэегъаджэ, бэгъашIэ хъунэу сыфэлъаIо.
ТIэшъу Светлан — КъТРК «Адыгеим» ипродюсер, Адыгеим изаслуженнэ журналист:
— 1988 — 1992-рэ илъэсхэм Адыгэ кIэлэегъэджэ училищым сыщеджагъ. Шъыпкъэу къэсIон, анахь илъэс тхъагъохэу, IэшIугъэкIэ сыгу къинагъэу а уахътэр щыт. КIэлэегъэджэ Iушхэм, гъэсэгъэшхохэм, губзыгъэхэм тырагъэджагъ, тагъэсагъ. Сщымыгъупшэнэу, шIэныгъэу къыситыгъэхэмкIэ сищыIэныгъэ хъугъэ адыгабзэр дэгъоу зэрэсигъэшIагъэмкIэ сыфэрэзэ дэдэу къыхэсэгъэщы Анзэрэкъо Светланэ Аскэрбый ыпхъу. «Адыгабзэм егугъу, Iэпэдэлэл умышIы, уикIэлэегъаджэхэм ядэIу», — сянэ къысиIо зэпытыгъ. Синыдэлъфыбзэ сиIофшIэн зэрэхъущтыр къылъэгъугъэм фэдагъ. ЕджапIэм сызычIэсми адыгабзэр шIу слъэгъуныр стхьакIумэ ригъэкIыгъэп, нэужым кIэлэегъэджэ училищым сызычIахьэми Анзэрэкъо Светланэ идесэхэм сынаIэ атетынэу къысфигъэпытэщтыгъэ. АщкIэ къасIомэ сшIоигъор: тиунагъо фыригъунэу мы кIэлэегъэджэ гъэшIуагъэм икъэбар ашIэщтыгъэ. БэмышIэу мары адыгэ Iорытхым тыхэлэжьагъ. КъэсIонкIэ тIэкIу емыкIункIи мэхъу, къысфагъэгъун еджэхэрэми, ау диктантым сыкъеджэнэу сырагъэблэгъагъ, сикIэлэегъаджэу Анзэрэкъо Светланэ ар зытхыгъэхэм ахэтыгъ. Мырэущтэу мыр къызкIыхэзгъэщырэм лъапси иI. Адыгэ журналистэу Iоф сшIэнэу, къэбархэр адыгабзэкIэ сIотэнхэу, стхынхэу, адыгэ тхакIохэм яусэхэр шIу слъэгъунхэшъ, ахэм езбырэу сыкъяджэзэ сшIынэу, джы мары цIыф гъэсагъэхэм, шIэныгъэлэжьхэм, сикIэлэегъаджэ апашъхьэ ситэу Iорытхым сыкъеджэшъун амал зэрэзгъотыгъэм иапэрэ лъэгъохэщхэр зыдэсыублагъэр Анзэрэкъо Светлан ары. СикIэлэегъаджэ псауныгъэ пытэ иIэу, гушIогъо мафэхэр игъашIэкIэ къебэкIэу, ибын ихъяр нэмыкI ымылъэгъоу щыIэнэу сыфэлъаIо.
Ныдэлъфыбзэм изэгъэшIэнкIэ непэ гумэкIыгъохэу щыIэхэм, щыкIагъэхэм Светланэ анахьэу ынаIэ атыредзэ. Ахэр дэгъэзыжьыгъэнхэм фэшI адыгэ пстэуми яIо зэхэлъэу, зыкIыныгъэ азыфагу илъэу зэхэтынхэм, абзэ къаухъумэным мэхьанэшхо реты.
— IэкIыб къэралыгъомэ арысхэ адыгэмэ бзэр зэраIэкIэзырэм зэкIэми тыщыгъуаз. УмыгъэшIэгъон плъэкIырэп насыпым тыдэ ыдзыгъэхэми, сыд къин алъэгъугъэми, тилъэпкъэгъухэм егъэшIэрэ шIулъэгъоу хэкум фыряIэр зэрамыгъэкIодыгъэр, къызэрэзыдырахьакIыгъэр. Джэнэтэу Кавказым къезыпхыхэрэ бзэ лъэмыджыр мыпытэмэ, ар зэпыкIын зэрилъэкIыщтыр гъэнэфагъэ. Зэгорэм зыкъэтшIэжьынэу щытмэ, игъо къэсыгъ, — къыхегъэщы С. Анзэрэкъом.
IофшIэнымкIэ гъэхъэгъэшIухэр зэриIэхэм дакIоу Светланэрэ ащ ишъхьэгъусэу Чеславрэ унэгъо дахэ зэдашIагъ, зэгурыIоныгъэ азыфагу илъэу сабыитIу зэдапIугъ. Долэтрэ Марзетрэ дэгъу дэдэу еджагъэх, ящыIэныгъэ гъогу пытэу теуцуагъэхэу, янэрэ ятэрэ къамыгъэукIытэжьхэу сэнэхьатэу къыхахыгъэхэм непэ Iоф арашIэ.
Мы унэгъо шIагъом псауныгъэ пытэ илъынэу, Светланэ Аскэрбый ыпхъум игухэлъышIухэр къыдэхъунхэу тыфэлъаIо. ТикIэлэегъаджэ тапэкIи илъэпкъ зэрэфэлэжьэщтым, ныдэлъфыбзэм изэгъэшIэн ыкIи икъэухъумэн зэрэпылъыщтым тицыхьэ телъ. Тэ, ригъэджагъэхэм, сыдигъуи шъхьэкIэфэныгъэшхо фэтшIыщт, шIукIэ тыгу илъыщт.
ТХЬАРКЪОХЪО Адам. Адыгеим изаслуженнэ журналист.