Мыекъуапэ дэт кIэлэцIыкIу IыгъыпIэу N 39-м икIэлэпIухэу Мэлгощ Разиетрэ Ирина Шаповаловамрэ ны-тыхэм зэпхыныгъэ дэгъу адыряIэу IофшIэнышхо агъэцакIэ. Ахэм Iоф зыдашIэрэ купхэр лъэпкъ зэфэшъхьафхэм къахэкIыгъэхэ кIэлэцIыкIух.

Илъэсым къыкIоцI мыхэм Iофтхьэбзэ зэфэшъхьафхэр Iыгъы­пIэм щызэхащэх. Анахь шъхьаIэу анаIэ зытырагъэтыхэрэм ащыщых ныдэлъфыбзэм и Дунэе мафэ, адыгабзэм ыкIи славян тхыбзэм я Мафэ. Iоф­тхьабзэхэм яхэгъэунэфыкIынкIэ Разиет Иляс ыпхъумрэ Ирина Анатолий ыпхъумрэ пшъэдэкIыжь ин ахьызэ яIофшIэн агъэпсы. Утренникхэр зэхащэх, кIэлэцIыкIухэр усэхэм къяджэх, лъэпкъ орэдхэр къаIох, къашъо­хэр къа­шIых. Джащ фэдэу Iоф­тхьабзэм къырагъэблагъэх орэ­дыIохэр, пщынаохэр, къэшъуа­кIохэр. Мы илъэс еджэгъур къызихьагъэм къыщыублагъэу Мэлгощ Разиет­рэ Ирина Шаповаловамрэ Мые­къуапэ итарихъ ыкIи иархитектурнэ чIыпIэхэр кIэлэцIыкIу­хэм арагъэлъэгъугъэх. Нэужым ны-тыхэр ягъусэхэу АР-м и Лъэпкъ музей щыIагъэх. Адыгэхэм япсэукIэ, ящыгъынхэм ыкIи ялъэпкъ шъуашэхэм яплъыгъэх. Ащ нэмыкIэу экспозициехэу «Псэушъхьэхэм ядунай», «Хэ­гъэгу зэошхом илъэхъан адыгэхэр» зыфиIохэрэр кIэлэцIыкIухэм ашIогъэшIэгъоныгъэх. Нэужым ягупшысэхэр къыраIотыкIыхэзэ кIэлэцIыкIу сурэтышI­хэм язэнэкъокъоу «Адыгеир — зэкIэми зэдытиун» зыфиIо­рэм хэлэжьагъэх. Джащ фэдэу изобразительнэ искусствэм иурокхэм адыгэ ыкIи урыс тхып­хъэхэр ащарагъэшIых.

Музеим ыуж тематическэ егъэджэнхэу «Уиныдэлъфыбзэ сыд фэда?» «Адыгэхэм ящыIакIэ ыкIи якультурэ» зыфиIохэрэр афызэхащэх. Къыхэгъэщыгъэн фае, ны-тыхэм ыкIи кIэлэцIыкIухэм ягукъэкIыкIэ къэгъэлъэгъонхэр зэхащэх, джэголъэ нысхъапэхэм лъэпкъ шъуашэхэр ащыгъхэу, шэкI зэфэшъхьафхэм ахэшIыкIыгъэу къэралыгъо быра­къыр къыщагъэлъагъох, лъэпкъ Iэмэ-псымэхэм яшIын фэгъэхьыгъэ тарихъ тхылъхэр къахьых, ахэр зэрагъашIэх.

Илъэс еджэгъум къыкIоцI кIэлэцIыкIухэм кIэлэпIухэр ягъу­сэхэу Урысыем ыкIи Адыгеим ягимн зэрагъашIэ. Литературэм иурокхэм Родинэм фэгъэхьы­гъэу Цуекъо Джэхьфар, МэщбэшIэ Исхьакъ, Къуекъо Налбый яусэхэм къащяджэнхэр якIасэх. Джащ фэдэу адыгэ ыкIи народнэ пшысэхэр зэрагъашIэх. КIэлэцIыкIухэмкIэ анахь хъугъэ-шIэгъэ шъхьаIэ хъугъэр Пэрэныкъо Мурат ипшысэу «Хэт нахь лъэшыр?» зыфиIорэмкIэ сценкэ зэрагъэуцугъэр ары. Мыщ ны- тыхэри чанэу къыхэлэжьагъэх, ащыгъыщтхэр къафагъотыгъэх, зыкъызщагъэлъэгъощт сценэр афагъэпсыгъ. Джащ фэдэу гущы­Iэжъхэр зыдэт зэхэубытэгъэ тхылъ цIыкIоу «Жемчужины народной мудрости» зыфиIоу Блэгъожъ Зулкъаринэ къыдигъэ­кIыгъэр кIэлэцIыкIухэм ашIогъэ­шIэгъоныгъ.

Разиет Иляс ыпхъумрэ Ирина Анатолий ыпхъумрэ кIэлэцIыкIу IыгъыпIэм икупэу «Тюльпан» зыфиIорэм щапIухэрэм лъэныкъо зэфэшъхьафхэмкIэ пIуныгъэ Iоф­шIэнхэр адызэрахьэх. Анахьэу адыгэ ыкIи урыс лъэпкъ джэгукIэхэу афызэхащэхэрэр кIэлэцIыкIухэм агу рехьых. Анахь якIасэ джэгукIэ­хэр «Шыу» («Всадник»), «ПэIокIадз» («Подлог шапки») зыфиIохэрэр арых.

Ны-тыхэмрэ кIэлэпIухэмрэ зэгурыIоныгъэ азыфагу имылъмэ, кIэлэцIыкIухэм пIуныгъэ тэрэз ябгъэгъотын плъэкIыщтэп. Къыхэгъэщыгъэн фае Мэлгощ Разиетрэ Ирина Шаповаловамрэ пшъэрылъэу зыфагъэуцужьыгъэр къадэхъуным фэшI шIыкIэ зэфэшъхьафхэр зэрагъэфедэхэрэр: ны-тыхэр аугъоих, хэушъхьафыкIыгъэ зэдэгущыIэгъухэр адашIых, «КIэлэцIыкIухэм гушъхьэлэжь баиныгъэ яIэу пIугъэнхэр» зыфиIорэмкIэ Iофтхьабзэхэр зэхащэх. Ны-ты ныбжьыкIэхэм ашIогъэшIэгъонхэу мыщ фэдэ Iофтхьабзэхэм ахэлажьэх.

Iофтхьэбзэ инхэу, творческэ проектэу «Адыгэхэм яхабзэхэр ыкIи яшэн-зэхэтыкIэхэр» зыфиIохэу мы кIэлэпIухэр кIэщакIо зыфэхъугъэхэм коллектив зэгурыIожьри, сабыйхэм яунагъохэри зэфещэх.

Гу кIуачIэ яIэу, агухэр зэIухыгъэу кIэлэцIыкIухэм Iоф зарадашIэрэм фэшI мы кIэлэпIуитIум лъэшэу тафэраз!

Дэчлэжъ Свет.