КIэлэеджакIохэм ашIогъэшIэгъон
Адыгэ Республикэм и Лъэпкъ театрэу Цэй Ибрахьимэ ыцIэ зыхьырэм «Нартмэ яды-шъэ бгырыпх» зыфиIорэ спектаклэр къыщагъэлъэгъуагъ.
Адыгабзэмрэ тхыбзэмрэ я Мафэ фэгъэхьыгъэ къэгъэлъэгъоныр пшысэм техыгъ. АдыгабзэкIэ зытхыгъэр ыкIи зыгъэуцугъэр режиссерэу, Адыгэ Республикэм искусствэхэмкIэ изаслуженнэ IофышIэшхоу Нэгъой Инвер.
IофшIэным цIыфыр зэрипIурэм, шъхьахынэхэм щыIэныгъэм зыкъыщагъотын зэрамылъэкIырэм, адыгагъэр зехьэгъэным ныбжьыкIэхэр фэгъэсэгъэнхэм ехьылIэгъэ къэгъэлъэгъоным хэлэжьагъэхэ артистхэу ХьатхьакIумэ Аскэрбый, Жъудэ Аскэрбый, Къэбэхьэ Анзор, Болэкъо Адамэ хъулъфыгъэ рольхэр къашIых. Нэхэе Мэрджанэт, Бэрэкъэе Заремэ, Болэкъо Аминэт, Къуижъ Людмилэ бзылъфыгъэ рольхэм афэгъэзагъэх.
Залым тIысыпIэ нэкI имыIэжьэу адыгэ, урыс, нэмыкI лъэпкъхэм ащыщ кIэлэеджакIохэр спектаклэм еплъыгъэх. Къэгъэлъэгъоныр къызаухым, зэхэщэкIо купым хэтхэм зэфэхьысыжьхэр ашIыгъэх.
Адыгэ Республикэм культурэмкIэ иминистрэ игуадзэу ШъэуапцIэкъо Аминэт, министерствэм иотдел ипащэу Шэуджэн Бэлэ, Лъэпкъ театрэм ихудожественнэ пащэу ХьакIэгъогъу Къэсэй, режиссерхэу Нэгъой Инвер, Хьакъуй Аслъан, тхакIоу Цуекъо Юныс, археологэу Тэу Аслъан, артистхэу Зыхьэ Заурбый, Кушъу Светлан, Жъудэ Аскэрбый, шIэныгъэлэжьэу Агъыржьэнэкъо Симхъан, нэмыкIхэри зэхахьэм хэлэжьагъэх, адыгабзэкIэ агъэуцухэрэ спектаклэхэм къатегущыIагъэх.
«Нартмэ ядышъэ бгырыпх» зыфиIорэм фэдэ спектаклэхэр, кIэлэеджакIохэмрэ ныбжьыкIэхэмрэ ягъэсэныгъэ фэгъэхьыгъэхэр нахьыбэрэ къагъэлъэгъонхэу унашъо зэдаштагъ.
НэкIубгъор зыгъэхьазырыгъэр ЕмтIылъ Нурбый.