Игупшысэ щыIэныгъэм къыпкъырэкIы
Цэй Ерстэм исабыигъо-кIэлэгъур хэгъэгумкIи, цIыфхэмкIи къин дэдэхэу зыщытыгъэ лъэхъан зытефагъэр — гъаблэр, Хэгъэгу зэошхор. Ятэу Аюбэ заом ащи, 1944-рэ илъэсым хэкIодагъ. КъоджэлIхэу заом щыфэхыхэрэм яхьадагъэхэу къаIэтыщтыгъэхэм, нэмыкI къиныгъохэу зыхэтыгъэхэм илэгъу шъэожъые-пшъэшъэжъыемэ афэдэу кIэлэгъу уахътэр агъэкIэкIыгъ. Унэгъо хъызмэт IофхэмкIэ ным, шыпхъухэм IэпыIэгъушIоу яIагъ.
Гурыт еджапIэм зычIахьэм еджэным зыритынэу хъущтыгъэп, къыхэкIыгъ къычIэкIыжьэуи, чIэхьажьэуи. Зыгъэпсэфыгъо уахътэм колхозым ихэтэрыкI бригадэ щылажьэщтыгъ, фермэм шкIахъо кIощтыгъ. А лъэхъаныр ары клубым ихудожественнэ самодеятельность зыхэхьагъэри. Хэта зышIагъэр апэрэ лъэбэкъухэу клубым щидзыгъэхэр Ерстэм иегъэшIэрэ сэнэхьат егъэжьапIэ фэхъунхэу?
Ерстэм ыныбжь зикъукIэ дзэ къулыкъум ащэ, къызыкIожькIэ еджэным педзэжьы, еджапIэри къеухы. Зыгорэм кIонышъ, щеджэнэу амал иIагъэп. Бэ темышIэу колхозым икомсомол организацие исекретарэу хадзы, илъэсипшIым ехъурэ а IэнатIэр ыгъэцэкIагъ. НыбжьыкIэхэу колхозым Iоф щызышIэхэрэр комсомолым хэщэгъэнхэмкIэ, художественнэ самодеятельностым хэхьанхэмкIэ, спортым пылъынхэмкIэ, зэхэщэн-пIуныгъэ IофшIэныр гъэлъэшыгъэнымкIэ ыпшъэ ифагъэр бэ.
Клубым лъэшэу ынаIэ зэрэтетыр, ащ иIофшIэн лъэныкъо пстэумкIи къэIэтыгъэн зэрэфаер къыдалъыти, Ерстэм 1961-рэ илъэсым ащ пащэ фашIыгъ. Нэужым ар культурэм и Унэ ашIыжьыгъэу Iутзэ, Тэхъутэмыкъое районым пэгъунэгъу станицэу Северскэм дэт культурнэ-просветительскэ училищым чIахьэ, театральнэ-режиссёрскэ отделениер къеухышъ, сэнэхьат гъэнэфагъэ иIэу IофшIэным зыретыпэ.
Къызэрэщыгугъхэрэр къыгъэшъыпкъэжьэу культурэм и Унэу зипащэм самодеятельнэ творчествэм изытет щысэтехыпIэу щигъэпсыныр фызэшIокIыгъ Цэим. Механизатор кIалэхэм, IофшIэпIэ зэфэшъхьафхэм ащылэжьэрэ ныбжьыкIэхэм жабзэ къафигъотызэ, къырищалIэщтыгъэх къэшъокIо, орэдыIо, драматическэ коллективхэм, пщынэо пшъашъэхэм якуп агитбригадэм ахэлэжьэнхэу. Ары нэбгырабэ клуб самодеятельностым ягуапэу зыкIыхэтыгъэр. Драмкружокым пае пьесэ цIыкIухэр, сценариехэр ежь ытхыщтыгъэх ыкIи ыгъэуцужьыщтыгъэх. Ащ дакIоу игъусэмэ щысэ афэхъущтыгъ спектаклэхэм рольхэр къазэращишIыщтыгъэмкIэ.
Пьесэ инхэм ягъэуцун гу тыришIыхьи Цэим апэу зэрэригъэжьагъэр «КъокIасэр» (Цэй Ибрахьим), «Налмэс» (Лъэустэн Юсыф) зыфиIохэрэр ары.
Мыхэр Ерстэм ирежиссёр IофшIэнкIэ егъэжьэпIэшIу хъугъэх.
Ахэм къакIэлъыкIуагъ икъоджэгъоу, шIэныгъэлэжь цIэрыIоу Тхьаркъохъо Юныс ипьесэу «ШIулъэгъур Iахь мыгощ» зыфиIорэр. Мы спектаклымкIэ Аскъэлае итеатральнэ коллектив самодеятельнэ художественнэ творчествэм иапэрэ Всесоюзнэ фестиваль хэлэжьагъ ыкIи Цэй Ерстэм я 2-рэ лауреат ащ щыхъугъ, я 2-рэ шъуашэ зиIэ Дипломыр къыратыгъ. Ащ ыуж Ерстэм ежь ытхыгъэ пьесэхэр егъэуцух. Ахэр «КIапщ», «Гуащэм инысэ гъэшIуагъ», «ГукъэкIыжь», нэмыкIхэри.
Культурэм иунэхэм ядраматическэ коллективхэу нахь гъэхъагъэ зиIэхэм 1970-рэ илъэсхэм цIэ гъэшIуагъэу «Народнэ театрэкIэ» яджэхэу хъугъэ. Теуцожь районымкIэ а цIэр аскъэлаемэ яколлектив рапэсыгъ. Адыгэ хэку драматическэ театрэм илъэс заулэрэ ар икъутамэу щытыгъ. Режиссёрхэр, артистхэр кIохэти, IэпыIэгъу афэхъущтыгъэх. Театрэм испектаклэхэу репертуарым хэмытыжьхэм ядекорациехэу, щыгъынхэу, нэмыкIхэу къызкIэлъэIухэрэр аIэкIагъахьэщтыгъ. МыщкIэ Цэй Ерстэм блэгъэныгъэ театрэм дишIыгъагъ. Народнэ театрэм иIофшIэн нахь гъэлъэшыгъэнымкIэ, спектаклэхэр нахь творческэ лъэгапIэм нэгъэсыгъэнхэмкIэ хэку театрэм ишIуагъэ къызэрэкIощтыгъэр нэрылъэгъугъ. ХэпшIыкIэу театральнэ искусствэм цIыфхэр нахь фэщагъэ хъущтыгъэх. Ау нэужкIэ филиалхэр зэфашIыжьыгъэх.
Цэй Ерстэм ипьесэмэ ащыщэу «Гуащэм инысэ гъэшIуагъ» зыфиIорэр 1995-рэ илъэсым Мыекъуапэ щагъэуцугъ. Зыгъэуцугъэр Камернэ музыкальнэ театрэу Хьанэхъу Адамэ ыцIэкIэ щытым ихудожественнэ пащэу, Урысыем, Адыгеим искусствэхэмкIэ язаслуженнэ IофышIэшхоу Сулейман Юныс. Артист IэпэIасэхэу Пэрэныкъо Чатибэ, Бэджэ Дзэхъан, Нэгъой Маринэ, Шъхьэбэцэ Схьатбый театрам ригъэблагъэхи, спектаклэр къагъэлъэгъуагъ. Джарэущтэу апэрэу профессиональнэ сценэм техьагь Ерстэм ипьесэ.
ТхылъыкIэу «Пьесэхэр» Цэй Ерстэм къыдигъэкIыгъ. Ащ къыдэхьагъэ пьесэхэм къоджэ щыIакIэр ятемэ шъхьаI. Ежь Ерстэм дэгъоу щыгъуаз игъашIэ зэпхыгъэ къуаджэм къыщыхъурэ-къыщышIэрэм, ащ хилъагъоу, ышIапэу щыт Iофыгъох къыIэтыхэрэр. Къыгъэлъэгъорэ персонажхэу шэн дэйхэр, емыкIу зекIуакIэхэр къызхафэхэрэр еумысых, ахэм апэуцужьхэрэм яобразхэр зэгъэфагъэу, лыягъэ гори хэмылъэу, гущыIэ щэрыохэр яшапхъэу къетых.
Драматургым ынаIэ зытетмэ ащыщ кIэлэеджакIом ипIуныгъэ-гъэсэныгъэ, Iэдэбынчъагъэ къызхафэрэм зыдебгъэшIэжьын зэрэфаер. Пьесэхэу «Щы хэмытэу теджэщт», «ЗэкIэми ти Тат», «ЗэщыхъуакIу» зыфиIохэрэр еджапIэхэм ядрамкружокхэм ащыбгъэуцунхэм къекIу шъыпкъэу щытых. Пьесэу «Къо уиIэмэ, нысэ уиIэщт» зыфиIорэм къегъэлъагъо унагъо ихьэгъэкIэ нысэр хъулъфыгъэ щыгъынкIэ зэрэфэпагъэр, изекIокIэ-шIыкIэхэм апае тыщым зэрэрагъэгъэзэжьырэр. Бэ темышIэу нысэр къащэжьы зэрэфэпэгъэн фаем тетэу фэпагъэу, гущыIакIи ышIэу, Iэдэб зекIокIэ-шIыкIэр къыхэщэу. УнэгъуитIур зэгурэIо.
Тхылъым пьеситIу къыдэхьагъ лъэпкъым ихъишъэ фэгъэхьыгъэу. Я ХIХ-рэ лIэшIэгъум къуаджэм къыщыхъугъэ жъалымыгъэ-зэфэнчъэгъэ гухэкIыр драмэу «Пыикъу» зыфиIорэм итемэ шъхьаI. Социальнэ лъапсэм къыпкъырыкIырэ зэшIонэныгъэм тхьамыкIагъоу къызыдихьырэр IупкIэу къыгъэлъэгъон ылъэкIыгъ авторым. Пщыр жъалымыгъэкIэ зыдэзекIогъэ фэкъолI кIалэу нэпкъым хьакъурэжхэмкIэ харигъэIулIагъэм ыкъоу Пыикъу зыфаусыгъэр лIыпкъым зиуцокIэ пыеу къызэрэфыкъокIырэр, ащ игущыIэ щэрыохэу аджалыщэу къытефэрэмэ зэрэзэхагъафэрэр лъышIэжьэу зэрэщытыр къыбгурыIоу, гупшысэ хэхыгъэ уигъэшIэу драмэр гъэпсыгъэ.
Адрэр, пьесэу «Пщымафэр», илъэсишъэ горэкIэ узэкIэIэбэжьмэ къуаджэр зыкIэрыс Iуашъхьэм шыудзэ плъыжьэу къытехьагъэм, гъунэгъу чылэм лъыгъачъэу дишIыхьагъэм фэдэ къямыхъулIэным пае Iашэ амыIыгъэу щыгъу-пIастэкIэ апэгъокIынхэ зэралъэкIыгъэм, яцIыфышъхьэ къызэраухъумагъэм фэгъэхьыгъ. ТиблэкIыгъэрэ джырэ лъэхъанымрэ зыщызэгъусэхэ тхылъыр жэбзэ чанкIэ тхыгъэ, сценэм къытепхьанхэм тегъэпсыхьагъэх. Лъэпкъ гупшысакIэр, шъхьэлъытэжьыр, шIэжьыр, гумэкIыгъо инэу тилъэпкъ иIэхэр тхыгъэхэм къахэщы, унаIэ атырыуагъадзэ, зыгорэ пфызэшIокIынэу щытмэ, рэхьатэу ущымысыным укъыфаIэты. Драматургым итхэкIэ шапхъэ диштэ шъыпкъэу, зыщищыкIэгъэ чIыпIэм тефэу гущыIэжъхэр бэу хэпхъагъэх: «Узэмышхъорэм дэмышхъуае къыкъокIы», «Пырамыбжьыр мэшъхьалъэ, шъхьадж ылъапсэ еожьы», «СишIушIэ симыгъо, сигъунэгъу сипый», «Ибэр ебэкIырэп — икIэмэ тэджыжьрэп»… ГущыIэжъхэу ыгъэфедэхэрэр пьесэмэ мэхьанэ купкIэу ахэлъыр къыплъыIэсыным, къыгъэлъэгъорэ цIыфхэр зыфэдэ шъыпкъэхэр пшIэнхэм афэIорышIэх.
Цэй Ерстэм икъуаджэ, ирайон ямызакъоу, Адыгэ Республикэм культурэм зыкъыщегъэIэтыгъэнымкIэ илъэсипшI пчъагъэм ыгуи ыкIуачIи хилъхьэзэ Iофышхоу ышIагъэм ущэгушхукIы. Драматург хъунри иакъылрэ итворческэ кIуачIэрэ къахьыгъ. Ари гушIуагъо.
Ерстэм ыгъэхъагъэмэ япэсыгъэ тын лъапIэх илъэс зэфэшъхьафхэм къыфагъэшъошагъэхэр: медалэу «За доблестный труд», РСФСР-м и Апшъэрэ Совет и Президиум и Щытхъу тхылъ, РСФСР-м культурэмкIэ изаслуженнэ IофышI, Теуцожь районым ицIыф гъэшIуагъ, бгъэхалъхьэхэр, щытхъу тхылъхэр.
Цэй Ерстэм мыр иятIонэрэ тхылъ, апэрэр 2012-рэм къыдэкIыгъ. Литературэм ижанрэ анахь къинэу драматургиер зэрэщытыр нафэ. Арэу щытми, пьесэ тхыныр къыхихыгъэу Ерстэм ащ Iоф дешIэ, иIэпэIэсэныгъэ епсыхьэ. Ипьесэхэр драматическэ коллективхэм къашъхьэпэнхэу щыт.
ЕдзыгъуитIу хъурэ драмэ зэгъэфагъэу «Пыикъу» зыфиIоу тхылъыр къызэрэзэIуихырэм ти Лъэпкъ театрэу Цэй Ибрахьимэ ыцIэкIэ щытым ынаIэ тыридзэмэ, сценэм ар къытехьаным ущыгугъыщт. Джащыгъум спектаклыр театрэмкIи драматургымкIи творческэ ушэтыпIэ дэгъоу зэрэхъущтым уехъырэхъышэжьынэу щытэп.
Цэй Аюбэ ыкъоу Ерстэм! Гъэтхапэм и 10-м уныбжь илъэс 85-рэ зэрэхъугъэм пае лъэшэу тыпфэгушIо. Уипсауныгъэ пытэ зэпытэу, тхылъыкIэхэр къыдэбгъэкIыхэу, жъышъхьэ мэфэ шъыпкъэ къыпфэкIонэу тыпфэлъаIо.
Шъхьаплъэкъо Къэсэй. Театровед, культурэмкIэ общественнэ Советэу Адыгэ Республикэм культурэмкIэ и Министерствэ щыIэм итхьамат.