Лъэпкъ шIэжьым ипкъыгъох
ЗэлъашIэрэ археологэу, тарихълэжьэу, Адыгэ Республикэм искусствэхэмкIэ изаслуженнэ IофышIэшхоу ЛэупэкIэ Нурбый ищыIэныгъэ фэгъэхьыгъэ къэгъэлъэгъоныр Мыекъуапэ къыщызэIуахыгъ.
Адыгэ Республикэм и Лъэпкъ музей щыкIогъэ зэхахьэм сэнэхьат зэфэшъхьафхэр зиIэ нэбгырабэ щытлъэгъугъ. Студентхэм къэбар гъэшIэгъонэу зэхахырэр ашIомакIэу археологхэм, шIэныгъэлэжьхэм гущыIэгъу афэхъугъэх, упчIэжьэгъу ашIыгъэх.
Музеим ипащэу Джыгунэ Фатимэ зэIукIэгъур зэрищэзэ, зэфэхьысыжьхэр ышIыгъэх. ЛэупэкIэ Нурбый лIэужхэр зэфэзыщэрэ цIыф цIэрыIоу зэрэщытыр зэгъэпшэнхэм къащыхигъэщыгъ.
Археологие саугъэт 92-рэ Н. ЛэупакIэм къызэIуихыгъ, ахэр лIэшIэгъухэм ятарихъ къизыIотыкIыхэрэм ащыщых. Мыекъопэ культурэм, исп унэхэм, ижъырэ мыотIхэм, нэмыкIхэм ятарихъ ехьылIагъэхэм уагъэгъуазэ.
Теуцожь районым, Мыекъуапэ дэжь, фэшъхьафхэм ащытIагъ. Псым ычIэгъ хъугъэ КъэзэныкъоякIэм, Аскъэлае, ХьакIэмзые, Псыфабэ, Сырыфыбг, нэмыкIхэм уплъэкIунхэу ащишIыгъэхэм мэхьэнэ ин зиIэ пкъыгъо гъэшIэгъонхэр къащигъотыгъэх.
Къошынхэм, унагъом ищыкIэгъэ Iэмэ-псымэхэм, гъучIым хэшIыкIыгъэ пкъыгъохэм уяплъызэ, лъэпкъым итарихъ нахьышIоу зэогъашIэ.
Адыгеим иапэрэ археолог цIэрыIоу Аулъэ Пщымафэ, музеим иIофышIэу Петр Дитлер ягъусэу Н. ЛэупакIэм тарихъым епхыгъэу къыгъотыгъэр макIэп. Музеим къыщагъэлъагъохэрэм якъэбар якъэугъоин чанэу хэлэжьагъ Елена Черных. Археологхэу Аулъэ Пщымафэ, ЛэупэкIэ Нурбый, Тэу Аслъан, фэшъхьафхэм яIофшIагъэ Е. Черных IупкIэу къытегущыIагъ. Тхылъ пчъагъэ къыдэзыгъэкIыгъэ Н. ЛэупакIэм ишIушIагъэ уасэу фашIырэм узыIэпещэ. Тэу Аслъан зэрилъытэрэмкIэ, тхылъ пэпчъ щыIэныгъэр нахьышIоу къыбгурегъаIо. Адыгэхэм ятарихъ чIыгу къырыкIуагъэр нахь дэгъоу тшIэнымкIэ Н. ЛэупакIэм уплъэкIунэу ышIыгъэхэр шIэныгъэм епхыгъэх.
ЕплъыкIэхэр
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым ипащэу Кушъу Нэфсэт, Адыгэ Республикэм гуманитар ушэтынхэмкIэ иинститут ипащэ игуадзэу Беданыкъо Марзет, Адыгэ къэралыгъо университетым тарихъымкIэ ифакультет ипащэу ПэкIэшхо Нурбый, Урысыем игеографическэ обществэ икъутамэу Адыгеим щыIэм иIэшъхьэтетэу Игорь Огай, нэмыкIхэу къэгъэлъэгъоным икъызэIухын фэгъэхьыгъэ зэхахьэм къыщыгущыIагъэхэм Н. ЛэупакIэр тарихъым, искусствэм, литературэм афэщагъэу зэрэщытыр хагъэунэфыкIыгъ.
СурэтышI цIэрыIоу Н. ЛэупакIэм итворчествэ нахь гъэшIэгъон къэзышIырэр шъо зэфэшъхьафхэр зэдиштэхэу зэригъэфедэхэрэр ары. Тыкъэзыуцухьэрэ дунаим идэхагъэ, шIулъэгъу къабзэм ишъэф, пшъашъэм игупшысэ, нэмыкIхэм афэгъэхьыгъэ сурэтхэр лъэгъупхъэх.
— НыбжьыкIабэ къэгъэлъэгъоным икъызэIухын зэрэхэлажьэрэр тигуапэ. Археологхэм, тарихъым изэгъэшIэн пылъхэм студентхэр гущыIэгъу афэхъугъэх. ШIэныгъэлэжьхэу Ергъукъо Щамсэт, Къуекъо Маринэ, нэмыкIхэм яеплъыкIэхэри тшIогъэшIэгъоных, — къытиIуагъ Тэу Аслъан.
Н. ЛэупакIэм ишъхьэгъусэу Фатимэ, ыкъоу Хьатыу, фэшъхьафхэм кытфаIотагъэр щыIэныгъэм дештэ. ЛэупэкIэ Нурбый лъэныкъуабэ къызэлъиубытызэ Iоф ешIэ. Игупшысэхэр шIэжьым къыпкъырэкIых.
— Археолог, шIэныгъэлэжь цIэрыIом ехьылIэгъэ тхылъ къыдэзгъэкIы сшIоигъу, — тизэдэгущыIэгъу лъегъэкIуатэ Iэтэжьэхьэ Светланэ. — Къэгъэлъэгъоным сеплъызэ, гупшысэу сшIыгъэхэр тхылъым къыдэхьащтых.
— ЛэупэкIэ Нурбый бэшIагъэу синэIуас, — къеIуатэ Игорь Огай. — Археологием, тарихъым зафэбгъазэмэ, IофшIагъэу иIэр гъунэнчъ. Сэ ащ щысэ тесэхы, упчIэжьэгъу сыфэхъу.
— Студентхэм яхьэкIэ лъапIэу ЛэупэкIэ Нурбый лъэпкъ шIэжьым ехьылIагъэу къыIуатэрэр щыIэныгъэм къыхехы, — къытиIуагъ ПэкIэшхо Нурбый. — Псэ пытэу, жьы кIэтэу гукъэкIыжьхэм ныбжьыкIэхэр ащегъэгъуазэх.
Къэгъэлъэгъоным ехьылIэгъэ къэбархэр ЛэупэкIэ Нурбый зэхахьэм къыщиIотагъэх. Музеим къэкIогъэ пшъашъэхэм къытаIуагъ къэгъэлъэгъоным еплъынхэу япшъэшъэгъухэр ягъусэхэу музеим къызэрэкIощтхэр.
ЕмтIылъ Нурбый.