Адыгэ Республикэм самбэмкIэ изэнэкъокъу Мыекъуапэ щыкIуагъ. Илъэс 13 – 14 зыныбжь кIалэхэр апэрэ чIыпIэхэм афэбэнагъэх.

Яонтэгъугъэхэм ялъытыгъэу чIыпIэхэр къыдэзыхыгъэхэм шъуа­щытэгъэгъуазэ.

НэмытIэкъо Иляс, кг 35-рэ, Кушъу Амерлан, кг 38-рэ, Анцокъо Амир, кг 42-рэ, Едыдж Сэлым, кг 46-рэ, Хьатхъохъу Рустам, кг 50, Кушъу Долэт, кг 54-рэ, Бжьэц Алан, кг 59-рэ, Давид Абиян, кг 65-рэ, Кощэкъо Рэмэзан, кг 71-рэ, Мэлыщэ Аскэр, кг 71-м къехъу, зыцIэ къетIогъэ бэнакIохэм апэрэ чIыпIэхэр афагъэшъошагъэх.

Хъот Тамерлан, Хьакъуй Эльдар, Джарымэ Ибрахьим, Аврам Карабаджаковым, Нэпсэу Алим, БжьэшIо Расул, Дзэсэжъ Беслъан, Нэфышъ Айдар, Вадим Рудниковым, ДзэлI Рэмэзан ятIонэрэ чIыпIэхэр къыдахыгъэх.

ШIуцIэ Азэмат, Батмэн Амин, Нэхэе Бислъан, Ацумыжъ Рус­лъан, Пщыдатэкъо Сэлым, фэшъхьафхэм ящэнэрэ чIыпIэхэр къа­хьыгъэх.

Зэнэкъокъум бэнэкIуи 150-м нахьыбэ хэлэжьагъ. Тренерхэу Б. Нэныжъым, Б. Шъэумэным, А. Хьабэхъум, Р. Джарымэкъом, М. Дэгужъыем, О. Хъыщтым, З. Ацу­мыжъым агъэсэрэ кIалэхэм апэрэ чIыпIэхэр афагъэшъошагъэх.

ХагъэунэфыкIырэ чIыпIэхэр къыдэзыхыгъэхэ кIалэхэр Урысыем иныбжьыкIэхэм якIэух зэнэ­къокъоу Новороссийскэ щыкIощтым хэлэжьэщтых. Тренерхэу ГуIэтыжь Хъалидэ, Джарымэкъо Аслъан, нэмыкIхэм къытаIуагъ къэлэ-лIыхъужъэу Новороссийскэ тибэ­накIохэр зыкIохэкIэ, революционнэ лIыхъужъ ыкIи лэжьэкIо щытхъум япхыгъэ чIыпIэхэр зэрагъэ­лъэгъунхэм фэшI зэIукIэгъухэр зэрэзэхащэщтхэр.

Хэгъэгу зэошхом фашист техакIохэр щызэхакъутэхи, тидзэ­кIолIхэм ТекIоныгъэр къызыдахыгъэр илъэс 75-рэ зэрэхъурэм фэгъэхьыгъэ зэхахьэхэм тиспорт­сменхэр ахэлэжьэщтых. Новороссийскэ икъэухъумэн фэгъэхьыгъэ заохэм Адыгеим щыщ дзэ­кIолIхэм лIыхъужъныгъэу щызэрахьагъэр тарихъым хэкIокIэщтэп. Тренер кIэлэегъаджэхэм ныбжьыкIэхэм пIуныгъэ дэгъу аратыным, шIэжь яIэу щыIэныгъэм хэщэгъэн­хэм пылъых. Спортым гъэхъагъэу щашIырэр лIыхъужъхэм афагъэ­хьы.

Сурэтым итхэр: самбэмкIэ бэнакIохэмрэ тренерхэмрэ.