ГъэцэкIэжьынхэм ауж
Теуцожь районымкIэ къуаджэу Очэпщые дэт культурэм и Унэ гъэцэкIэжьынышхохэр зырашIылIэхэ нэуж мэфэкI шIыкIэм тетэу гъэтхапэм и 4-м къызэIуахыжьыгъ.
Лъэпкъ проектэу «Культурэм» къыдыхэлъытагъэу ащ пэIухьащт сомэ миллион 25,6-рэ къатIупщыгъ.
А мылъкумкIэ унашъхьэр, шъхьангъупчъэхэр, пчъэхэр ыкIи джэхашъохэр зэблахъугъэх, ыкIоцI ищыкIэгъэ IофшIэнхэр агъэцэкIагъэх, мэшIо мэкъэгъэIум, видеолъыплъэным ясистемэхэр хагъэуцуагъэх, электролиниер агъэкIэжьыгъ, газыр ращагъ, сценэр икIэрыкIэу агъэпсыжьыгъ, чIэхьапIэхэр «Iэрыфэгъу щыIакIэм» диштэу ашIыгъэх, щагур агъэкIэрэкIагъ.
Культурэм и Унэ 1979-рэ илъэсым совхозэу «Псэкъупсэ» имылъкукIэ ашIыгъагъ. Джащ къыщегъэжьагъэу гъэцэкIэжьынхэр рашIылIагъэхэп.
Непэ культурэм и Унэ лъэныкъо зэфэшъхьафхэмкIэ клуб 13 щызэхэщагъ, ахэм нэбгыри 155-рэ ахэт. КъэшъокIо купэу «ХьакIулащ» зыфиIорэм щытхъуцIэу «образцовэр», театральнэ купэу «ХьакIулащэм» «народнэр» ахьы. Ащ итворческэ купхэр республикэ ыкIи район Iофтхьабзэхэм ахэлажьэх.