ГурыIогъошIум узыIэпещэ
Бзылъфыгъэр художественнэ творчествэм зэрэхэщагъэм фэгъэхьыгъэ къэгъэлъэгъон Мыекъуапэ къыщызэIуахыгъ.
Адыгэ Республикэм культурэмкIэ и Министерствэ исурэт къэгъэлъэгъуапIэ зэхахьэу щыкIуагъэм хэбзэ къулыкъушIэхэр, сурэтышIхэр, студентхэр, нэмыкIхэри хэлэжьагъэх. Министерствэм иотдел ипащэу Шэуджэн Бэлэ, сурэт къэгъэлъэгъуапIэм итхьаматэу Бырсыр Абдулахь, фэшъхьафхэм къаIуагъ искусствэм пыщагъэхэм яIофшIэгъи 100-м нахьыбэ къызэрагъэлъагъорэр. Темыр Кавказым, Къыблэм ясурэтышIхэу Ф. ПэтIыуащэм, А. Бырсырым, Э. Овчаренкэм, П. Амасьян, М. Тыгъужъым, Г. Абрэджым, С. Цэим, нэмыкIхэм ятворчествэ гурыIогъошIу, узыIэпащэ.
Адыгеим инароднэ артисткэу Шъэожъ Розэ сурэтым дахэу къыщэлъагъо. «Нэнэжърэ пхъорэлъфхэмрэ» зыфиIорэр, шъхьаныгъупчъэм дэжь щыт пшъа- шъэм исурэт, фэшъхьафхэри гум къегущыIыкIых. Гъыбзэ орэдэу «Адыифыр» зыфаусыгъэ пшъашъэр, шыур лъэгъупхъэх. Сурэтым уеплъызэ пшъэшъэ ищыгъэм тхьамыкIагъоу къехъулIагъэм, кIалэм гумэкI-гупшысэу къекIугъэм, ныбжьыкIэхэм апашъхьэ щыт шыр епэгъогъохэу къызэрэплъэрэм гур агъэрэхьатырэп.
ГушIуагъо зыхэлъ сурэтхэри къагъэлъагъох. Цэй Саидэ иIэшIагъэхэр гум къегущыIыкIых. «ЩыIэныгъэм хэслъагъорэр сурэтхэмкIэ къэсIуатэ сшIоигъу», — къытиIуагъ Цэй Саидэ.
Хъулъфыгъэр, шIулъэгъур, зэгъэпшэнхэр. Ахэри щыIэныгъэм къыхэхыгъэх, Бырсыр Абдулахь тизэдэгущыIэгъу къыщыхигъэщыгъ сурэтышIхэм искусствэр къызэрагъэбаирэр. ГущыIэкIэ къэпIон умылъэкIырэр сурэтым къыщыбгъэлъэгъонэу амалхэр къызэрэбгъотыхэрэр искусствэ шъыпкъэм къыбгурегъаIо.
СурэтышI-модельер цIэрыIоу СтIашъу Юрэ ныбжьыкIэхэм гущыIэгъу зафэхъум, искусствэм лIэужхэр зэрэзэфищэхэрэм ехьылIэгъэ къэбархэр къыIотагъэх. Гъэтхапэм и 14-м къэгъэлъэгъоныр зэфашIыжьыщт. ЗэхэщакIохэм искусствэр зышIогъэшIэгъонхэр къэгъэлъэгъоным рагъэблагъэх.