Псэм гур къыфытео
Къыблэм, Темыр Кавказым, тилъэпкъэгъухэр зыщыпсэухэрэ IэкIыб къэралыгъохэм ащыцIэрыIо орэдыIоу Быщтэкъо Азэмат ипчыхьэзэхахьэ «Налмэсым» и Унэ щыкIуагъ.
ШэнышIу зэрэфэхъугъэу, бзылъфыгъэхэм я Дунэе мафэ фэгъэхьыгъэ концерт хэхыгъэр Быщтэкъо Азэмат Мыекъуапэ щызэхищагъ. Адыгэгур къызэрэтеорэр, ихэку кIасэ орэд къызэрэфиIорэр, адыгабзэм изэгъэшIэн, игъэфедэн зэрагъэгумэкIырэр, лъэпкъ искусствэм изегъэушъомбгъун яхьылIэгъэ зэхахьэм гушъхьэ кIуачIэр къеIэты.
Къэбэртэе-Бэлъкъарым, Къэрэщэе-Щэрджэсым, Чэчэным, Краснодар краим, Адыгеим ирайонхэм къарыкIыгъэхэм мэфэкI зэIукIэгъур къагъэбаигъ. Мыекъопэ районым щыпсэурэ Николай Агеенкэм къызэрэтиIуагъэу, мыщ фэдэ концерт еплъы шIоигъоу бэшIагъэ зежэщтыгъэр. Шъхьащэфыжь щыщ пшъашъэхэр ягуапэу къуаджэм къикIыхи, Быщтэкъо Азэмат иорэд къэIуакIэ едэIугъэх, артист цIэрыIом гоуцохи нэпэеплъ сурэтхэр атырахыгъэх.
Быщтэкъо Азэмат ансамблэу «Мыекъуапэ инэфылъэхэм» илъэси 10-м нахьыбэрэ къыщышъуагъ, пщынаоу зигъасэщтыгъ. Иныбджэгъухэм ащыщ къызеушъыим, орэд къыIоу ригъэжьагъ. ГукIи, псэкIи искусствэм зыритын зэрилъэкIыгъэм ишIуагъэкIэ исэнаущыгъэ къызэIуихыгъ. Пщынаоу, «Налмэсым» икъэшъуакIоу зэрэщытыгъэм искусствэм еплъыкIэу фыриIэр, лъэпкъ гупшысакIэр къагъэбаигъ. Республикэ гимназием щеджэзэ спортым зыфищэищтыгъ. ЩыIэныгъэм илъэныкъуабэ зэригъэфедагъэр шIукIэ къетэжьыгъ, зэлъашIэрэ артист хъугъэ.
КъумпIыл Къадырбэч, Жэнэ Къырымызэ, ЯхъулIэ Сэфэр ягущыIэхэм атехыгъэхэ лъэпкъ шIэжь орэдхэу Адыгеим, тыкъэзыуцухьэрэ дунаим афэгъэхьыгъэхэр А. Быщтэкъом къызыхидзэкIэ, залым чIэс адыгэхэр, урысхэр, къэндзалхэр, нэмыкIхэри дежъыух. Бэгъ Нурбыйрэ Андзэрэкъо Чеславрэ зэдаусыгъэ сэмэркъэу орэдэу «Къэгъэзэжь, си Гуагор» концерт пэпчъ щызэхэтэхы.
— Орэдым хэлъ гущыIэхэр сшIогъэшIэгъоных, зыми фэдэхэп. Усэмрэ орэдымрэ зэдештэх, — къытиIуагъ А. Быщтэкъом.
Театрализованнэ пычыгъохэм орэдыр къагъэбаигъ. Ансамблэ цIэрыIоу «Налмэсым» иартистхэр концертым чанэу хэлэжьагъэх. КIалэмрэ пшъашъэмрэ зызэфагъэгусэ, пчэгум къыщышъохэзэ зэшIужьых.
А. Быщтэкъор «Налмэсым» икъэшъуакIохэм адэуджы.
КIэлэцIыкIухэу сэкъатныгъэ зиIэхэри концертым еплъыгъэх. Дунэе нэфыр зымылъэгъурэ шъэожъыеу курэжъыем исым Азэмат екIуалIи орэд къыфиIуагъ, гукIэгъу зыхэлъ гущыIэ фабэхэмкIэ еушъыигъ ыгу ымыгъэкIодынэу.
Орэдхэу лъэпкъым, шIэжьым, ным яхьылIагъэхэр къыIохэзэ, адыгабзэм псэ къыпегъакIэ, гущыIэм тамэ реты, орэдышъоу зэхэпхырэм тхьакIумэр егъашIо. ШIулъэгъу къабзэм фэмыусэгъэ тхакIо, композитор щыIэу тшIэрэп. Быщтэкъо Азэматрэ ишъхьэгъусэу Фатимэрэ гум къикIыхэрэ орэдхэр къызэдаIуагъэх. Мэшэлахь, Азэмати, Фатими лъэпкъ искусствэр дахэу лъагъэкIотэн алъэкIы.
Си Адыгееу сихэку, Сиорэд закъори оры! Си Адыгееу сихэку, Сидунай дахэри оры!
Ащ фэдэ усэхэм атехыгъэ орэдыр къэзыIорэ артистым залым чIэсхэр фэтэджы- хэ, дежъыухэ зыхъукIэ, щытхъоу фаIорэм лъэпкъ мэхьанэу ептырэм зеIэты. Шъопсэу, Азэмат, Фатим! ТыжъугъэгушIуагъ, Тхьэм бэгъашIэ, насыпышIо шъуешI!