Дагъыстан иIэпэIасэхэр
КъокIыпIэм щыпсэурэ лъэпкъхэм искусствэхэмкIэ я Къэралыгъо музееу Мыекъуапэ дэтым Дагъыстан исурэтышIхэм яIофшIагъэхэм якъэгъэлъэгъон фэгъэхьыгъэ зэхахьэ тыгъуасэ щыкIуагъ.
Музеим ипащэу Кушъу Нэфсэт къызэриIуагъэу, лъэпкъхэм язэпхыныгъэ гъэпытэгъэнымкIэ искусствэм иамалышIухэр агъэфедэхэзэ Iофтхьабзэр зэхащагъ. Дагъыстан исурэтышI 14-мэ яIэпэIэсэныгъэ дунэе шапхъэхэм адештэ. Адыгэ Республикэм культурэмкIэ иминистрэу Аулъэ Юрэ къыIуагъ Дагъыстан иIэпэIасэхэм яIофшIагъэ нахьышIоу зыщагъэгъозэным фэшI Адыгеим куп икIынышъ, Д. Махачкала зэрэкIощтыр.
— Дагъыстан сэ сыщыIагъ, сурэтышI цIэрыIохэм саIукIагъ, упчIэжьэгъу сшIыгъэх. КIэлэегъаджэу нэбгырабэ уиIэн плъэкIыщт, ау икъу фэдизэу узыгъэсэн зиамалыр къахэпхыным уфэхьазырыныр нахышIу. Сэ Дагъыстан ащ фэдэ цIыфхэр щызгъотыгъэх, гъунэ имыIэу сафэраз, — къыIуагъ Адыгеим исурэтышI цIэрыIоу Еутых Асе.
ЗэлъашIэрэ сурэтышIэу, архитекторэу Бырсыр Абдулахь, Краснодар краим исурэтышI цIэрыIоу Михаил Скворцовыр, Дагъыстан исурэтышIхэм я Союз ипащэу, Урысыем изаслуженнэ сурэтышIэу, Дагъыстан и Правительствэ ишIухьафтын къызыфагъэшъошэгъэ Курбанали Магомедовыр, нэмыкIхэри зэха- хьэм къыщыгущыIагъэх.
СурэтышI пэпчъ иIофшIагъэ уасэ фэтшIызэ, бгъэфедэн плъэкIырэ искусствэм икъэгъэлъэгъон ехьылIэгъэ зэхахьэм студентхэр бэ хъухэу зэрэхэлэжьагъэхэр, сурэтышI цIэрыIохэу Эдуард Овчаренкэм, СтIашъу Юрэ, ПэтIыощэ Феликс, нэмыкIхэм язэфэхьысыжьхэр тшIогъэшIэгъоных.
Арсен Асхабовым, Курбан Алмасовым, Джабраил ыкIи Ибрахьим Гусейновхэм, СултIан Магомед, Магомедовым, фэшъхьафхэм яIофшIагъэхэм псынкIэу узыIэпащэ. Тхыпхъэхэр дахэх, унэм идэпкъхэр къагъэкIэрэкIэщтхэу пэшIорыгъэшъэу уяплъы. Диным пыщагъэхэм ящыкIэгъэ пIуаблэхэр, тхыпхъэхэр лъэгъупхъэх.
Магомед Омаровым керамикэм хишIыкIыгъэхэр дахэм идэхэжьых. «Сабантуй» зыфиIорэр гъэшIэгъон дэд. Лъэпкъ зэхахьэхэм ащагъэфедэрэ пкъыгъохэр, музыкальнэ Iэмэ-псымэхэр, лъэпкъ шъуашэхэр лъэгъупхъэх. Магомед Омаровым «Сикъуадж» зыфиIоу ышIыгъэр щыIэкIэ-псэукIэм къыхихыгъ. МэфэкIыр зезыщэрэм шэн-хабзэхэр зэрэзэрихьэхэрэр IэпэIасэм керамикэм хишIыкIыгъэхэмкIэ къегъэлъагъо. Шъонтырпаори лъэгъупхъэу пчэгум ит.
Къамэхэр, нэпэеплъ Iэпэщысэхэр, нэмыкIхэри сурэтышIхэм яIофшIагъэхэм ахэтэлъагъох. Шыур джэгуакIом фэтэгъадэ. Лъэпкъ музыкальнэ Iэмэ-псымэр зэригъэфедэрэ шIыкIэр гум рехьы, шым тесэу орэдышъор ыгъэжъынчын имурад. «Кунак» зыфиIорэри гъэшIэгъонэу гъэпсыгъэ. Дагъыстан лъэпкъыбэ зэрэщыпсэурэр, искусствэм ыбзэ гурыIогъошIоу зэрэщытыр, мамыр псэукIэм игъэдэхэн сурэтышIхэр зэрэпылъхэр музеим щыолъэгъух.
ЕМТIЫЛЪ Нурбый. Сурэтхэр музеим къыщытетхыгъэх.