Урысыем и ЛIыхъужъэу Олег Дукановым фэгъэхьыгъэ зэнэкъокъоу Налщык щызэхащагъэм ныбжьыкIэхэм спорт бэнэнымкIэ яIэпэIэсэныгъэ къы­щагъэлъэгъуагъ.

Адыгэ Республикэм икIыгъэхэм ащыщэу Михаил Плутовыр килограмм 92-м нэс къэзыщэчыхэрэм панкра­тионымкIэ янэкъокъугъ.

— ЗэIукIэгъухэм якъызэIухын фэ­гъэхьыгъэ зэхахьэр гъэшIэгъонэу агъэ­псыгъ, — къытиIуагъ Адыгэ Респуб­ликэм ибэнакIохэм пэщэныгъэ ады­зе­зыхьэгъэ Къэлэшъэо Аскэр. — Адыгэ быракъхэр зэнэкъокъум щагъэбыбэтагъэх, тилъэпкъ къашъохэр къашIыгъэх.

Тренерэу ЕлIэшIэ Бислъан ыгъэсэрэ Михаил Плутовым купэу зыхэтым апэрэ чIыпIэр къыщыдихи, хэушъхьафыкIыгъэ шIухьафтыныр къыфагъэ­шъошагъ. Адыгэ Республикэм икомандэ я 5-рэ чIыпIэр къыхьыгъ.

— Советскэ Союзым и ЛIыхъужъэу Андырхъое Хъусен фэгъэхьыгъэ зэнэкъокъур Мыекъуапэ щызэхэтщэнэу зытэгъэхьазыры, — игупшысэхэм тащегъэгъуазэ Къэлэшъэо Аскэр. — Титарихъ нахьышIоу тшIэным ехьылIэгъэ зэIукIэгъухэр республикэм щызэ­хэтщэщтых.

Сурэтым итхэр: М. Плутовым къы­фэгушIох.