«Москва ушумкIэ ижъуагъохэр» зыфиIорэ Ду­нэе зэIукIэм къэралыгъо 27-мэ къарыкIыгъэ бэнэкIо 300-м нахьыбэ хэлэжьагъ.

Адыгэ Республикэм испорт еджапIэу N 2-м зыщызыгъасэхэрэм зэнэкъокъум хагъэунэфыкIырэ чIыпIэхэр къыщыдахыгъэх. IэкIыб къэралыгъохэм ябэнакIохэм Адыгеим испортсменхэр аIукIагъэх. Анахьэу тызыгъэгушIуагъэмэ ащыщ Муслим Атлыевыр. Батырыр килограмм 60-м нэс къэзыщэчыхэрэм якуп хэтыгъ, 2002 — 2003-рэ илъэсхэм къэхъугъэ­хэм янэкъокъугъ. Муслим бэнэпIэ алырэгъум иIэпэIэсэныгъэ къыщигъэлъэгъуагъ. Рэхьатэу зэ­IукIэгъухэр ригъажьэхэзэ, текIоныгъэр къыдихыгъ, апэрэ чIыпIэр къыфагъэшъошагъ.

Адыгэ къэралыгъо университетым физкультурэмрэ дзюдом­рэкIэ и Институт ия 4-рэ курс щеджэрэ Кристина Морозовам изэIукIэгъухэм текIоныгъэр къащыдихыгъ, дышъэр ишIухьафтынхэм къахэхъуагъ. Килограмм 70-м нэс къэзыщэчыхэрэм пшъашъэр янэкъокъугъ. Институтым ипащэу Бгъуашэ Айдэмыр къытиIуагъ Кристина Морозовар общественнэ Iофыгъохэм, Адыгеим имэфэкI мафэхэм чанэу зэрахэлажьэрэр.

Виктория Чугреевам, кг 60, Семен Чивкиным, кг 70-рэ, джэрз медальхэр къахьыгъэх.

Заур Магомедовыр апэрэу Ду­нэе зэIукIэгъушхом хэлэжьагъ. Финалым и 1/4-м нэсыгъэу зэIу­­кIэгъум къыхэзыгъ. Урысыем ихэ­шыпыкIыгъэ командэ итренер шъхьаIэу Ачало Магомедэминовыр зэнэкъокъум еплъыгъ, Заур Магомедовым къыщытхъугъ. Бэнэ­­кIо ныбжьыкIэм иIэпэIэсэныгъэ хигъэхъонымкIэ шIыкIэу ыгъэфе­дэн­хэ ылъэкIыщтхэр къыфиIотагъэх.

Адыгэ Республикэм изаслужен­нэ тренерэу НэмытIэкъо Ас­кэр тибэнакIохэр ушум фегъасэх.

— Республикэм физкультурэмкIэ ыкIи спортымкIэ и Комитет, тиспорт еджапIэу N 2-м ипащэу Хъот Юныс зэхэщэн Iофыгъо­хэмкIэ IэпыIэгъу къызэрэтфэ­хъугъэхэм фэшI тафэраз, «тхьа­шъуегъэпсэу» ятIожьынэу тыфай, — къытиIуагъ НэмытIэкъо Аскэр. — ТибэнакIохэм Адыгэ Респуб­ликэм ибыракъ зэнэкъокъум щагъэбыбэтагъ. Рес­публикэм имэфэкI мафэхэм, зэ­нэкъокъухэм тахэлэжьэнэу зы­тэгъэхьазыры.

Сурэтым итхэр: Адыгеим ихэ­шыпыкIыгъэ командэу Москва щыкIогъэ зэнэкъокъум хэлэжьагъэр.