Урысыем футболымкIэ иапшъэ­рэ куп хэт командэ­хэм мэзаем и 28-м — гъэ­тхапэм и 1-м я 20-рэ ешIэгъухэр яIагъэх.

КIэуххэр

«Крылья Советов» — «Оренбург» — 1:1, ЦСКА — «Урал» — 1:1, «Динамо» — «Спартак» — 0:2, «Зенит» — «Локомотив» — 0:0, «Ахмат» — «Ростов» — 1:1, «Тамбов» — «Рубин» — 0:0, «Краснодар» — «Уфа» — 2:0, «Шъачэ» — «Арсенал» — 1:2. ЕшIэгъур аухынкIэ такъикъ заулэ къэнагъэу «Локомотивым» хъагъэм Iэгуаор ридзэнымкIэ амалышIу иIагъ. А. Миранчук иза­къоу «Зенит» икъэлэпчъэIутэу Лодыгиным екIугъ, ау Iэгуаом зеом, къэлэпчъэIутым шъхьа­пыридзын ылъэкIыгъэп.

Къалэу Шъачэ икомандэ зэ­хъо­кIыныгъабэ фэхъугъ. Тренер шъхьаIэу В. Федотовыр загъэ­на­фэм, ешIэкIо макIэп къыра­гъэ­блэгъагъэр. «Зенит» нахьыпэкIэ хэтыгъэ А. Кокориныр «Шъа­чэм» щешIэ. «Шъачэр» «Ар­се­налым» зыIокIэм, А. Кокориныр ухъумэкIуитIумэ аIэкIэкIи, дахэу хъагъэм Iэгуаор ридзагъ. ЗэIукIэгъур аухынкIэ нэгъэупIэпIэгъу заулэ къэнагъэу «Арсеналым» къэлапчъэм Iэгуаор дидзи, 2:1-у текIоныгъэр къыдихыгъ.

«Краснодар» къалэу Уфа иешIакIохэм гугъэ аритыгъэп. Метрэ 11 тазырыр Ари дэгъоу ыгъэцакIи, хъагъэм Iэгуаор зыредзэм, текIоныгъэр зыхьыщтыр къэпшIэнэу щытыгъ. «Краснодар» Европэм и Кубок фэбанэхэрэм якуп хэхьаным ишъыпкъэу пылъ.

ЧIыпIэхэр

1. «Зенит» — 46 2. «Краснодар» — 38 3. «Ростов» — 35 4. ЦСКА — 35 5. «Локомотив» — 35 6. «Арсенал» — 28 7. «Урал» — 25 8. «Уфа» — 25 9. «Спартак» — 25 10. «Динамо» — 24 11. «Тамбов» — 22 12. «Ахмат» — 20 13. «Рубин» — 20 14. «Оренбург» — 20 15. «Крылья Советов» — 19 16. «Шъачэ» — 15.

Я 21-рэ зэIукIэгъухэр

07.03. 14:00 «Оренбург» — «Арсенал» 07.03.16:30 «Динамо» — «Тамбов» 08.03. 14:00 «Рубин» — «Кр.Советов» 08.03. 16:30 «Шъачэ» — «Урал» 08.03. 19.00 «Локомотив» — «Ахмат» 09.03. 14:00 «Ростов» — ЦСКА 09.03. 16.30 «Спартак» — «Краснодар» 09.03. 19.00 «Зенит» — «Уфа».

Апэ ишъыгъэхэр зэдешIэщтых, зэIукIэгъухэр гъэшIэгъон хъущтхэу тэгугъэ. Ауж къинэхэрэм рэхьат яIэп, апшъэрэ купым къыхэзынхэмкIэ гумэкIыгъо хэфагъэхэр команди 6-м къыщыкIэрэп.