Адыгэ Республикэм и Къэралыгъо орэдыIо-къэшъокIо ансамблэу «Ислъамыем» ипчыхьэзэхахьэ республикэ филармонием игъэкIотыгъэу щыкIуагъ.

Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэр илъэс 90-рэ зэрэхъугъэм фэгъэхьыгъэ концертым лъэпкъ зэфэшъхьаф­хэр еплъыгъэх. «Ислъамыем» ихудожественнэ пащэу, Урысыем, Адыгеим янароднэ артистэу, композиторэу Дмитрий Шостакович ыцIэкIэ агъэнэфэгъэгъэ шIухьафтыныр къызыфагъэшъошэгъэ Нэхэе Аслъан ипэублэ гу­щыIэ къыщыхигъэщыгъэ гуп­шысэр лъэпкъ шIэжьым, музыкальнэ искусствэм зегъэушъомбгъугъэным, адыгабзэм изэгъэшIэнрэ игъэфедэнрэ япхыгъ.

— Гуманитар ушэтынхэмкIэ Адыгэ республикэ институтым иIофышIэхэм ижъырэ лъэпкъ орэдишъэ пчъагъэ къаугъоигъ, ахэр яфонд хагъэхьагъэх, — къы­Iуагъ Нэхэе Аслъан. — ШIэныгъэ­лэжьхэм къаугъоигъэ ыкIи зэрагъэфэжьыгъэ орэдхэм ащыщхэм непэ шъуядгъэдэIущт…

Институтым ипащэу ЛIыIужъу Адамэ къыIуагъ дунаим щыцIэрыIо хъугъэ ансамблэу «Ислъамыемрэ» шIэныгъэлэжьхэмрэ зэгъу­сэхэу лъэпкъ искусствэм хэхъоныгъэ зэрэрагъэшIырэм зэрэрыгушхорэр.

Нарт эпосым къыхэхыгъэ орэдхэу Саусэрыкъо, Пэтэрэз афэгъэ­хьыгъэхэр, IофшIэным, шэн-хабзэхэм яхьылIэгъэ орэдхэр артистхэм агъэжъынчыгъэх. Кавказ заоу адыгэ лъэпкъым къиныгъуа­бэ къыфэзыхьыгъэри «Ислъамыем» ирепертуар хэт. Айдэмыр­къан, Къоджэбэрдыкъо Мы­хьа­мэт, нэмыкI лIыхъужъхэм афэгъэ­хьыгъэхэр, «Сэрмафэр», фэшъхьафхэри Къумыкъу Щамсудинэ, Эльдарэ Айдэмыр, МэщбэшIэ Саидэ, нэмыкIхэм къаIуагъэх. «Мэкъуаомэ яорэд» Дзыбэ Руслъан мэкъэ IэтыгъэкIэ къызыхе­дзэм, тишъолъыр идэхагъэ, къушъ­хьэ лъапэхэр нэгум къыкIигъэуцуагъэх. «Гощэгъэгъым игъыбзэ» ХъокIо Сусанэ къэIуакIэу къыфигъотыгъэр дунэе искусствэм ишэпхъэ лъагэхэм адиштэу тэлъы­тэ. Макъэр къабзэ, Iэтыгъэ, нэгъэупIэпIэгъу зэпыугъохэр зэригъэфедэхэрэ шIыкIэри гум щэчэрэгъу.

Шъымырзэ Казбек, Уджыхъу Руслъан, Тыгъужъ Асыет, Агъыр­жьэнэкъо Саныет, нэмыкIхэм гушIуагъо зыхэлъ орэдхэр къыхадзэх, жъыуакIохэм уащытхъунэу япшъэрылъхэр агъэцакIэх. «Орэдыр лъэпкъым ылъапс, орэдыр сиадыгабз», — еIо А. Тыгъужъым.

Лъэустэнджэл Рузанэ, Ахътао Светланэ, Сихъу Руслъан, нэ­мыкI къэшъуакIохэм пчэгур къагъэдэхагъ. Пщынаохэу Лъэцэр Светланэ, Мышъэ Андзаур, фэшъхьаф музыкантхэм «Ислъамыем» иорэд­хэм тамэ араты.

Къэралыгъо упчIэжьэгъоу Тхьа­кIущынэ Аслъан, республикэм и Парламент и Тхьаматэу Владимир Нарожнэр, Темыр Кавказым идирижер цIэрыIоу Темыркъэнэ Петр, нэмыкIхэри пчыхьэзэхахьэм къыщыгущыIагъэх.

— Нэхэе Аслъан фэдэ композиторхэр арых дунэе музыкальнэ искусствэр щыIэныгъэм щылъызы­гъэкIуатэхэрэр, — къытиIуагъ Урысыем, Къэбэртэе-Бэлъ­къарым, Адыгеим искусствэхэмкIэ язаслуженнэ IофышIэшхоу, зэлъашIэрэ композиторэу ХьаIупэ Джэбраил. — Пчыхьэзэхахьэр сщымыгъуп­шэжьынэу сыгу къинагъ. ЗэкIэ хэ­лэжьагъэхэм «тхьашъуегъэ­псэу» ясIожьы сшIоигъу.

ТIысыпIэ нэкI имыIэжьэу концертыр зэрэкIуагъэм филармонием ипащэу Къулэ Мыхьамэт ыгъэгушхуагъ. «Ислъамыер» лъэпкъ­хэм яансамблэ цIэрыIоу зэрилъытэрэр къытиIуагъ.