Урысые Iофтхьабзэу футбол цIыкIум ишIуагъэ еджапIэхэм нахь дэгъоу ащашIэным фэгъэ­хьыгъэм зеушъомбгъу.

Къыблэм ыкIи Темыр Кавказым яеджакIохэм футбол цIыкIумкIэ язэнэкъокъу Ставрополь щыкIуагъ. Гъобэкъое гурыт еджа­пIэм икIэлэеджэкIо командэ Адыгэ Республикэм ыцIэкIэ зэIукIэгъухэм ахэлэжьагъ.

— ПэшIорыгъэшъ ешIэгъухэм текIоныгъэр къащыдэтхи, финалныкъом Чэчэным къикIыгъэхэм тащыIукIагъ, — къытиIуагъ Гъо­бэкъуае иеджапIэ итренерэу ЗекIогъу Юрэ. — ТикIалэхэм гуетыныгъэу ахэлъыр зэхэщакIохэми агъэшIэгъуагъ. Къэлапчъэм бэрэ благъэу екIугъэх, тазырыр агъэцакIэзэ гъогогъуитIо дэуа­гъэх, ау хъагъэм Iэгуаор радзэнэу янасып къыхьыгъэп. Тиухъума­кIохэм хэукъоныгъэу ашIыгъэр Чэчэным иешIакIохэм агъэфеди, къэлап­чъэм Iэгуаор къыдадзагъ, 1:0-у зэIукIэгъур тшIуахьыгъ.

Ящэнэрэ чIыпIэм икъыдэхын фэгъэхьыгъэ ешIэгъур Адыгеим икомандэ 6:2-у Дагъыстан къи­кIыгъэхэм къашIуихьыгъ. Теуцожь Ислъам гъогогъуи 3, Нэныжъ Иляс гъогогъуи 2, Бэрэтэрэ Анзор зэ хъагъэм Iэгуаор радзагъ.

Къалмыкъым апэрэ чIыпIэр къыдихыгъ, Чэчэным иешIакIохэм ятIонэрэ чIыпIэр ахьыгъ, Адыге­им икомандэ джэрзыр къыфагъэшъошагъ.

Мыекъопэ футбол клубэу «Зэ­къошныгъэм» итренер шъхьаIэу Ешыгоо Сэфэрбый къуаджэхэм якомандэхэм алъэплъэ, ешIэкIо анахь дэгъухэу къыхихыщтхэм Гъобэкъуае щыщхэр ахэфэнхэу угугъэ хъущт.

Сурэтым итыр: зэнэкъокъум хэлэжьэгъэ командэр.