Урысыем, Адыгеим янароднэ артистэу, ком­по­зиторэу Дмитрий Шостакович ыцIэкIэ агъэ­нэфэгъэ шIухьафтыныр къызы­фа­гъэ­шъошэгъэ Нэхэе Аслъан лъэпкъ музыкальнэ искусствэм фэгъэхьыгъэу гущыIэгъу тыфэхъугъ.

Урысыем и Правительствэ ишIухьафтын къызыфагъэшъо­шэгъэ «Ислъамыем» республикэм имузыкальнэ искусствэ хэ­хъоныгъэ ышIынымкIэ елъытыгъэр бэ.

— Аслъан, мэзаем и 27-м пчыхьэзэхахьэу республикэ фи­лармонием щыкIощтым «Нарт симфониекIэ» шъуеджагъ. Сыда ар къызхэкIыгъэр?

— Нарт эпосыр адыгэ лъэпкъым щыIэныгъэ гъогоу къыкIугъэм епхыгъ. Тарихъым инэкIубгъохэм зафэдгъазэмэ, лъэпкъыр зэрыгушхорэ лIыхъужъхэр къыхэтэгъэщых. Саусэрыкъо, Ащэмэз, Шэбатныкъо, нэмыкIхэм яхьылIэгъэ орэдхэр лъэпкъым ыусыгъэх.

— «Ислъамыем» ахэр къеIох.

— Ары. ШIэжьым ахэр епхыгъэх.

— Концертыр едзыгъуи 5 зэ­рэхъурэм гъэзетеджэхэр къы­кIэупчIэх.

— Нартхэм машIор къазэрэфахьыжьыгъэм, быслъымэн динымрэ адыгэхэмрэ афэгъэхьы­гъэм, цIыфым щыIэныгъэм чIыпIэу щыриIэм, музыкальнэ Iэмэ-псымэу скрипкэм, нэмыкIхэм типчыхьэзэхахьэ тащытегущыIэщт.

— Скрипкэмрэ шыкIэпщы­нэмрэ зэпхыныгъэу яIэри къэ­шъуIотэщта?

— Адыгэхэм шыкIэпщынэр ары ижъырэ лъэхъаным къыщегъэ­жьагъэу агъэфедэрэр. ШыкIэпщынэр тинепэрэ щыIакIэ зэрэщыдгъэфедэрэр пчыхьэзэхахьэм щышъулъэгъущт.

— ШыкIэпщынэм ибзэпсхэр зыпэтшIын щыIэп. Бзэпси 2-р е 4-р лъэпкъ искусствэм щашIэ.

— Лъэпкъ искусствэм зиушъом­бгъунымкIэ музыкальнэ Iэ­мэ-псымэхэм тапэкIи татегущыIэ сшIоигъу.

— Дэгъу. Концертым ия 5-рэ едзыгъо къэпIотагъэгоп.

— «Чэщ гупшысэхэр» зыфиIорэр щыIэныгъэм къыпкъырэкIы. ЦIыфыр къызыхъукIэ, пытэу ылъэ теуцо шIоигъу. Щы­IэкIэ-псэукIэу иIэм егупшысэзэ дунаим зэрехыжьыщтыр къы­гурыIон фае. Сыда цIыфым шIу­шIагъэу дунаим къыщигъанэрэр? УзэплъэкIыжьмэ, сыда уакIыб щыIэу плъэгъурэр?

— УпчIэхэр куух, мафэ къэс уягупшысэн фае.

— ЩыIэныгъэр зэрэлъыкIуа­тэрэр къыдэтлъытэзэ, «Ислъа­мыем» инеущрэ мафэ зыфэдэщтым непэ тегупшысэ.

— Шъуиконцерт дэгъоу зэрэ­кIощтым сицыхьэ телъ. 2021-рэ илъэсым «Ислъамыер» илъэс 30 хъущт.

— Адыгэ Республикэм «Ис­лъамыер» илэгъу. Илъэс 30-р псынкIэу кIуагъэу къытщэхъуми, IофшIагъэу тиIэр макIэп. Тирес­публикэ гупсэ икъэралыгъо гъэ­псыкIэ пытэ хъугъэ. Юбилей зэ­хахьэхэм зафэдгъэхьазырыщт. Ти ЛIышъхьэу КъумпIыл Мурат, Правительствэр тиIэпыIэгъухэу тимурадхэм тафэкIо. — ТизэдэгущыIэгъу икIэух сыда къыщыхэбгъэщы пшIоигъор?

— Искусствэр зышIогъэшIэ­гъонхэу къытлъыплъэхэрэм гъунэ имыIэу тафэраз. «Ислъамыер» Урысыем, IэкIыб къэралхэм шIу­кIэ ащашIэ, игъэхъагъэхэм ахигъэхъоным фэхьазыр.

— ШъуигухэлъышIухэр Тхьэм къыжъудегъэхъух.

— Тхьауегъэпсэу.