«Налмэсыр» Адыгеим къыщэшъо
Адыгэ Республикэм и Къэралыгъо академическэ лъэпкъ къэшъокIо ансамблэу «Налмэсым» иконцертхэр тикъуаджэхэм ащэкIох.
Джэджэ районым лъэпкъыбэ щэпсэу. «Налмэсым» ипчыхьэзэхахьэу псэупIэу Джаджэм щызэхащагъэм нэбгырабэ еплъыгъ. Тэхъутэмыкъое районым культурэмкIэ и Унэшхо щыкIогъэ концертым Щынджые, Нэтыхъуае, Инэм, Козэт, нэмыкI гъунэгъу къуаджэхэм къарыкIыгъэхэр еплъыгъэх.
— Адыгэ къашъохэр къэтшIыхэзэ, лъэпкъ шъуашэм идэхагъэ, тишэн-хабзэхэр къэтэгъэлъагъох, — къытиIуагъ «Налмэсым» ихудожественнэ пащэу, Адыгэ Республикэм инароднэ артистэу, Абхъазым, Пшызэ язаслуженнэ артистэу Хъоджэе Аслъан. — Джэджэ районым иадминистрацие ипащэу, Александр Бутусовыр, искусствэр зышIогъэшIэгъонхэр гуфэбэныгъэ ахэлъэу къытпэгъокIыгъэх, тиартистхэм къащытхъугъэх.
Тэхъутэмыкъое районым иадминистрацие культурэмкIэ игъэIорышIапIэ ипащэу Ацумыжъ Рустам изэфэхьысыжьхэм къащыхигъэщыгъ «Налмэсыр» районым джыри зэрэрагъэблэгъэщтыр.
Лъэпкъ къашъоу «ЗэфакIор», «Адыгэ уджхэр», «Кавказ ис лъэпкъхэм якъэшъо зэхэтхэр», къашъоу «Ислъамыер», нэмыкIхэри искусствэм пыщагъэхэм агу рехьых. Тыркуем щыпсэухэрэ тилъэпкъэгъухэм якъашъоу ансамблэм бэмышIэу щагъэуцу-гъэри цIыфхэм ашIогъэшIэгъон. Красногвардейскэ, Кощхьэблэ, фэшъхьаф районхэм «Налмэсыр» ащыуджыщт, лъэпкъ искусствэм идэхагъэ къащигъэлъэгъощт.